Шомуродовнинг ишлари юришиб кетадиган бўлди. “Рома” Элдорни яхши биладиган мураббий танлади!
“Рома” раҳбарияти бош мураббийлик Клаудио Раньерини тайинлашга қарор қилди. Бу бежиз эмас албатта. Пойтахт клубининг ашаддий мухлислари жамоани ким бошқаришига алоҳида эътибор қаратади. Улар учун ёки ўта машҳур мураббий, ё тақдири “Рома” билан боғланган мутахассис ишлаши муҳим.
“Рома” мухлислари клуб афсонаси Даниэле де Россининг истеъфога чиқарилишини ёқламади, хорватиялик Иван Юрични бош мураббий сифатида қабул қилмади.
Бу ўзгаришлар туфайли танқидлар остида қолган клубга хўжайинлик қилувчи Фридкинлар оиласи барча римликлар ўзиники деб биладиган Клаудио Раньерини қайтариш орқали яна римлик фанатлар ҳурматини қозонишга ҳаракат қилади.
Раньяри ўтган мавсум “Кальяри”ни А Серияда олиб қолганидан кейин мураббийлик фаолиятини якунлаганини эълон қилганди. Ўшанда у фақат “Рома”дан таклиф бўлсагина қарорини ўзгартиришини айтганди.
Шундай бўлиб чиқди.
- “Рома” жиддий масалаларни ҳал қилиши керак, шу боис улар мени чақиришди. Мен тайёрман. Клубга бораман, - деди Клаудио Раньери “бўрилар”ни учинчи бор бошқаришга тайёрлигини билдириб.
Клаудио Раньери олдига узоқ муддатли лойиҳаларни амалга ошириш вазифаси қўйилгани йўқ, 73 ёшли мутахассис жамоани қисқа фурсат ичида ижобий томонга ўзгартириши, жамоада кескин бурилиш ясаши керак.
Мавсумни бошлаб берган икки мураббий – Даниэле де Росси ва Иван Юрич қўл остида “бўрилар” дастлабки дастлабки 12 та учрашувда кўп очко йўқотди. Римликлар А Сенрияда учта ғалаба қозонган ҳолда тўртта дуранг ва бешта мағлубиятга учради.
Европа лигасининг умумий гуруҳ босқичидаги тўртта беллашувдан учтасида очко йўқолди. Демак, нуфузли халқаро турнирда ғолиб чиқиш имконияти жуда паст. Бу аҳволда “Рома” ҳеч қачон ўзи орзу қилган Европа Чемпионлар лигасига чиқа олмайди.
- Раньери “Рома”ни учинчи бор бошқаришга киришяпти. Илгари 2009 ва 2019 йилларда ҳам жамоага устозлик қилганди.
Бу гал Клаудио Раньери жамоадан ўзининг бир неча шогирдларига дуч келади. 2019 йили тажрибали мутахассис ҳозир ҳам жамоа таркибида бўлган Лоренцо Пеллегрини, Брайан Кристанте ва Стефан Эл-Шааравига устозлик қилган.
Раньери ўзбек ҳужумчиси Элдор Шомуродов билан ўтган мавсум “Кальяри”ни А Серияда олиб қолди.
Тажрибали мутахассис “Рома” бош мураббийи сифатидаги дебютини 24 ноябрь куни “Наполи” билан Марадона номидаги аренада ўтказади. Раньери неаполликларга 1991-1993 йилларда устозлик қилган эди, - деб ёзмоқда tuttomercatoweb.com сайти эксперти Дебора Карлетти.
Элдор Шомуродовнинг “Рома”даги фаолиятига эътибор қаратсак, легионеримиз қандай ўйнашидан қатъи назар, бош мураббийлар унга етарли даражада имкон бермаганини кўришимиз мумкин.
Хусусан, Жозе Моуриньо ва Иван Юричда шундай бўлди. Даниэле де Росси Элдорни Римда олиб қолди, унга ҳамюртимизнинг ҳаракатлари маъқул келди. Бироқ римлик мураббийнинг ўзи “Рома”ни тарк этишга мажбур бўлиб қолди.
Клаудио Раньери Шомуродовнинг салоҳиятини яхши билади. Ўтган мавсум 29 ёшли ҳужумчимиз энг муҳим учрашувлардаги гол ва ассистлари билан бу мутахассисга “Кальяри”ни юқори дивизионда олиб қолишга кўмаклашиб юборган.
Энди Клаудио Раньери қўл остида Элдор Шомуродовнинг “Рома”даги ишлари изига тушиб кетишига ва ҳужумчимиз етарлича ўйин амалиётига эга бўлишига умид қиламиз.
Ўзбекистон Қатарни неча марта ютган? Бу гал нима бўлади?
Файзуллаев ва Европа: Аббосга икки хил баҳо!
Фикрлар