Мундиалда ўйнаган футболчи вафот этди
Қитъанинг энг нуфузли мусобақаси ҳисобланган Чемпионлар лигасидаги ғалаба ва 2026 йилги жаҳон чемпионатидаги дебют – 25 ёшли ярим ҳимоячининг карьераси 2026 йил ёзида тез суръатларда ўсиб бораётган эди.
Бироқ Жанубий Африка Республикаси миллий терма жамоаси жаҳон чемпионатининг плей-оффидан чиқиб кетганидан кўп ўтмай даҳшатли воқеа юз берди.
Яқиндагина орзу ва режаларга тўла бўлган футболчи ҳаётдан кўз юмди.
Буни ҳеч ким кутмаган эди
Жанубий Африка Республикаси терма жамоаси жаҳон чемпионатида тарихий натижа қайд этиб, илк бор гуруҳ босқичидан плей-оффга чиққан эди.
25 ёшли ярим ҳимоячи Жейден Адамс гуруҳ босқичида учта ўйинда майдонга тушди. У Мексика ва Чехияга қарши баҳсларни асосий таркибда бошлади, Жанубий Кореяга қарши эса захирадан майдонга тушди.
Кейинчалик маълум бўлишича, бу унинг терма жамоа сафидаги сўнгги учрашуви бўлган экан.
Канадага қарши плей-офф ўйинида Адамс захирада қолди. Терма жамоа мезбонларга ютқазиб, жаҳон чемпионатини тарк этганидан бир неча кун ўтиб, футболчи вафот этди.
Бу ҳақда Soccer Laduma нашри хабар берди.
- Бу йўқотиш ҳаммамизни ларзага солди. Биз эндигина жаҳон чемпионатидан қайтган эдик ва шундай хабарни эшитдик. Куни кеча у билан гаплашган эдик, у янги мавсумни интизорлик билан кутаётганди. Шунинг учун ҳозир гапиришга сўз топа олмаяпмиз. Фақат оиланинг шахсий ҳаётига ҳурмат билан қарашларини сўраймиз. Ҳа, мен тасдиқлайман – у вафот этди. Буни ҳеч ким кутмаган эди, - деган футболчининг устози.
Ғалабалар ва депрессия
Футболчининг ўлими сабаблари ҳозирча ошкор қилинмаяпти. Айрим маълумотларга кўра, Адамс депрессиядан азият чеккан бўлиши мумкин.
Унинг руҳшунос маслаҳатчиси Брендин Жонсоннинг айтишича, жаҳон чемпионатидан кейин Жейден жуда яхши кайфиятда бўлган.
Спорт нуқтаи назаридан ҳам унинг ишлари яхши кетаётган эди. У ўтган йили “Мамелоди Сандаунз” жамоаси таркибида мамлакат чемпиони бўлди ва 2025/26 йилги мавсумида Африка Чемпионлар лигасида ғалаба қозонди.
Адамс барча муҳим учрашувларда, жумладан финалда ҳам асосий таркибда майдонга тушган.
2024 йилда у ЖАР терма жамоасида дебют қилди ва дарҳол Африка миллатлар кубоги совриндорига айланди.
2026 йилда эса жаҳон чемпионатида қатнашиб, терма жамоанинг тарихий натижасига ҳисса қўшди.
Ҳозирча унинг ўлими сабаблари бўйича аниқ маълумот йўқ. Жанубий Африка футбол ассоциацияси мамлакат ўзининг иқтидорли футболчиларидан бирини йўқотганини таъкидлади.
Фикрлар