“Навбаҳор”да ишлаган мураббий Файзуллаевга Европада ёрдамлашадиган футболчи топиб берди

Қишки трансферлар ойнаси очилишига яқин ЦСКАда ўйнаётган легионеримиз Аббосбек Файзуллаевга иккита жиддий клубдан қизиқиш бўлаётгани ҳақида маълумотлар тарқалди.

Хусусан, Франция ва Испаниянинг машҳур клубларидан “Монако” ва “Реал Сосьедад” ўзбек футболчисини ўз сафига қўшиб олиш имкониятларини ўрганиб чиқмоқда.

Таъкидлаш жоизки, ушбу ҳар икки клуб Россия футболини мунтазам кузатиб келади ва шу мамлакат лигасидан етишиб чиққан иқтидор эгаларини ўз сафига қўшиб олиш амалиётини қўллаб келади.  

Бугунги кунда россиялик чарм тўп усталаридан Александар Головин “Монако” ва Арсен Захарян  “Реал Сосьедад” аъзоси ҳисобланади.

Россиялик машҳур футбол эксперти, “Навбаҳор”нинг собиқ бош мураббийи Андрей Канчельскис Аббосбек Файзуллаевга Европадан бўлаётган эътиборга ўз муносабатини билдирди.

- Агар Аббосбек Файзуллаевга Европадан аниқ таклиф тушса ва ҳужжатлар имзоланадиган бўлса, бундан нималар келиб чиқишини сизга айтиб беришим мумкин.

Дарҳақиқат, Аббосни мен “Локомотив Москва” клубига олишни тавсия қилган эдим.  Файзуллаев жуда яхши футболчи. ЦСКАда асосий таркибга мустаҳкам ўрнашиб олди, мунтазам ўзини кўрсатиб келмоқда.

Энг муҳими, олдинга қадам босиш ва тўғри йўналишда ҳаракат қилиш.

Агар Аббос “Монако”га ўтадиган бўлса бу жамоадаги Александр Головин рус тилида гаплаша оладиган футболчи келганидан мамнун бўлиши керак. Қолаверса, унинг ўзи ҳам Файзуллаевга янги муҳитга мослашишида ёрдам бериши мумкин. Уларга фаолиятларда муваффақият тилаймиз, - деди Андрей Канчельскис.

Таъкидлаш жоизки, Россия футболининг таниқли экспертларининг аксарияти Аббосбек Файзуллаевга таклиф бўлса, Европага кетишни маслаҳат бермоқда.

Яқинда ФИФА мутасаддилари Россиянинг бир неча клубларига трансфер таъқиқини қўйган эди. Хусусан, бу санкцияга ўзбек футболчиларини ўз сафига қўшиб олган ЦСКА ва “Химки” клублари ҳам бор.

Бу хабардан кейин кўпчилик ФИФАнинг таъқиқи Аббосбек Файзуллаевнинг Европага йўл олишига тўсқинлик қилиши мумкинлиги ҳақида хавотир билдира бошлади.

Бироқ футбол соҳасидаги юристларнинг маълум қилишича, ФИФА  регламентида таъқиқлар янги ўйинчиларни таркибга қўшиш ва уларни мусобақалар қайдномасида рўйхатдан ўтказиш масалаларига қўйилгани белгиланган. Бу вазиятда ўйинчиларнинг таъқиқ қўлланилган клублардан бошқа жамоаларга ўтишига ҳеч қандай тўсқинлик йўқ. Бунда энг муҳим жиҳат – клубларнинг ўзаро келишуви ва ўйинчининг трансферга розилиги экани айтилмоқда.

Аббосбек Файзуллаевга хориж клубларидан чорлов бўлаётганини инобатга олган ЦСКА раҳбарияти жамоа етакчисига янги шартнома таклиф қиладиган бўлди.

Демак, тез орада 21 ёшли ҳужумкор футболчимиз келажаги бўйича бир қарорга келишига тўғри келади. Файзуллаев атрофидаги вазиятни кузатишда давом этамиз!

Элдорни нималар кутмоқда? Шомуродовга оид сўнгги янгиликлар

Файзуллаев, Испанияни танла!

Катта пул керак: Ҳусанов “Ланс”ни қутқарадими?