O‘runov qachon safga qaytishi ma’lum bo‘ldi!

4 oktabr, 2021, 08:30
Zohir Toshxo’jayev
1
Futbol

Rossiya premer-ligasining 10-tur uchrashuvlari yakunlandi. Tasodifni qarangki, bu turni o‘z uyida o‘tkazgan jamoalarning barchasi ochko yo‘qotdi – ikkita durang, oltita mag‘lubiyat. Bu mavsum chempionlik uchun kurashayotgan “Zenit”, “Dinamo”, “Lokomotiv” o‘z maydonida mag‘lubiyatga uchradi. TsSKA ochko bo‘lishishga majbur bo‘ldi.

10-tur natijalari quyidagicha ko‘rinish oldi:

“Rubin” - “Nijniy Novgorod” - 0:1

“Axmat” – “Spartak” - 0:1

“Lokomotiv” – “Rostov” - 1:2

“Zenit” - “Sochi” - 1:2

“Ufa” – “Ural” - 0:1

“Arsenal” – “Ximki” - 0:0

TsSKA – “Krasnodar” - 0:0

“Dinamo” – “Krilya Sovetov” - 0:1.

O‘zbekistonlik futbol ishqibozlarining e’tibori asosan ikki uchrashuvga qaratildi. Ibrohimxalil Yo‘ldoshev to‘p tepayotgan “Nijniy Novgorod” Qozon shahriga safar qilib, “Rubin”ni mag‘lubiyatga uchratib qaytdi.Legionerimiz 73-daqiqa o‘ynadi. Odatdagidek, faol harakatlari bilan ajralib turdi.

pobeda-Nizhnego-v-Kazani-1200x802

Premer-liga debyutanti hisoblangan “Nijniy Novgorod” o‘ninchi tur yakunlariga ko‘ra, 14 ochko bilan sakkizinchi o‘rinni egallab turibdi.

Oston O‘runovni o‘z tarkibiga qo‘shib olgan “Ufa” autsayderlar qatoriga qo‘shilib qoldi. O‘z muxlislari ko‘z o‘ngida liga debyutanti “Ural”ni qabul qilgan ufaliklar raqib ustunligini tan olishga majbur bo‘ldi.

Bu mag‘lubiyatdan so‘ng, O‘runov jamoasi sakkiz ochko bilan 15-o‘ringa tushib qoldi. Barmog‘idan jarohat olganidan keyin bir necha uchrashuvni o‘tkazib yuborgan hamyurtimiz umumiy guruh mashg‘ulotlarida qatnashgan bo‘lsa-da, “Ural”ga qarshi uchrashuv qaydnomasiga kiritilmadi.

Uchrashuvdan so‘ng, “Ufa” bosh murabbiyi Aleksey Stukalov o‘yin haqida fikr bildirish chog‘ida O‘runovning qachon maydonga qaytishini ham aytdi.

- Afsuski, bugun ham mag‘lub bo‘ldik. Muxlislardan uzr so‘rayman. Ular bunaqa natijaga loyiq emas. Umuman olganda, jamoa kurashyapti. Bitta xato qimmatga tushdi. Biz o‘zimiz yaratgan imkoniyatlardan foydalana olmadik. Timur Jamaletdinov safga yangi yildan keyin qaytishi mumkin. Oston O‘runov esa “Krasnodar”ga qarshi uchrashuvga to‘liq tayyor bo‘ladi, - dedi Aleksey Stukalov.

Oston O‘runov mavsum boshida “Spartak”dan ijaraga olinganidan keyin “Ufa” safida atigi ikkita uchrashuvda qatnashdi. Ufaliklar hamyurtimizni keyinchalik bir million evroga sotib olish huquqi bilan mavsum oxirigacha ijaraga olgan.

b062-2eff37a45cb2c7d8f0ee99c51789fd8b