Ўруновга хунук хабар. У фирибгарлик қурбони!
Ўзбекистон Суперлигасида “Навбаҳор” ва “Локомотив” жамоаларидаги ўйинлари билан юртимизнинг энг истеъдодли футболчиларидан бири эканини намойиш қилган Остон Ўруновнинг Россия премьер-лигасидаги муаммолари ҳали-бери тугамайдиганга ўхшайди.
Россия оммавий ахборот воситалари яна “Спартак” раҳбарияти ва собиқ бош директор Шамиль Газизов ўртасидаги можаро доирасида Остон Ўруновнинг трансферига доир турли маълумотларни тарқата бошлади.
Ўруновга истеъдодли ва юқори салоҳиятли ўйинчи эканини намойиш этиши учун 2020 йилнинг биринчи ярмида “Уфа” жамоаси сафида кўрсатган ўйинларининг ўзи кифоя қилганини ҳали унутганимиз йўқ.
Ҳамюртимизни Россия футболига олиб кирган Шамиль Газизов кейинчалик ўйинчи ортидан мўмай даромад кўришга ҳаракат қилгани легионеримизнинг фаолиятига салбий таъсир қилмоқда. Остоннинг Шамиль Газизов хатти-ҳаракатлари эвазига “Спартак” билан имзолаган ва 2025 йилнинг ёзигача давом этадиган шартномаси бор. Лекин Москва клуби Ўрунов трансферида Газизов фирибгарликка қўл урганини таъкидламоқда ва бу шароитда ҳеч қачон Ўруновни жамоага яқинлаштирмаслиги аниқ.
Остон бир ярим йил ичида икки марта “Уфа”га ижарага берилди. Ҳозир ҳам Бошқирдистон жамоасида ижара муддатини ўтамоқда. “Уфа” уни ёзда бир миллион евро эвазига трансфер қилиш ҳуқуқига эга. Лекин сўнгги маълумотларга қараганда, мураббийлар штаби вакиллари ўзбек футболчисининг кўрсатаётган ўйини ва спорт формасидан қониқмаяпти.
“Уфа” Ўруновни харид қилиш мажбуриятини олиши учун ҳамюртимиз миллий чемпионатнинг 60 фоиз ўйинларида майдонга тушиши керак эди. Ўрунов турли жароҳатлар туфайли атиги еттита баҳсда кўриниш берди. Ўзи ўйнаган ўйинларда самарали ҳаракатларни амалга ошира олмади. Рус матбуоти “Уфа” мутасаддилари Ўруновни трансфер қилиш ҳуқуқидан фойдаланмасликка қарор қилганини ёзмоқда.
Демак, ёзда Остон на “Спартак”, на “Уфа”га керак бўлади.
Москваликлар уни тўлиқ сотиб юбориш ёки яна ижарага бериш учун янги иш жойи топиб бериши керак. Сўнгги вариант сифатида Ўрунов қуйи лига – Миллий футбол лигасида иштирок этаётган “Спартак-2” жамоасига ўтказилиши мумкин.
Яқинда Шамиль Газизов “Спартак” уни алдаганини, клуб уни бош директорлик лавозимига тиклаб, катта миқдорда компенсация тўлаши кераклигини иддао қилиб чиққан эди. Қолаверса, уфалик мутахассис “Спартак” унга Остон Ўрунов ва Александр Кокорин трансфери учун бир чақа ҳам тўламаганини таъкидлаган.
Буларга жавобан “Спартак” хўжайини Леонид Федуннинг рафиқаси Зарема Салихова навбатдаги информацион ҳужумни амалга оширди.
- Аввалбошида Ўрунов трансфер ҳуқуқининг 25 фоизи унинг ўзига тегишлиги айтилганди. Бизда аниқ рақамлар йўқ эди ва бундан бехабар эдик. Кейинчалик Газизов клуб бош директори сифатида келишувни ўзгартириб, трансфер ҳуқуқининг 50 фоизини ўзига тўғрилаб олди.
Декабрь ойига келиб, бу ҳуқуқнинг 75 фоизи Газизовга тегишлиги экани фош бўлди. Бу яққол молиявий фирибгардир, - деди клуб ишларига аралашишни хуш кўрадиган Зарема Салихова.
Шамиль Газизов ва “Спартак” хўжайини Леонид Федун ўртасидаги келишмовчиликлар яқин орада ҳал бўладиганга ўхшамаяпти. Томонлар судлашиб юрибди.
Яқинда Газизов “Спартак” клуби бош директор шартномасини ноқонуний бекор қилганлиги, ўзини клуб бош директорлигига тиклаш ва 100 миллион рублга яқин бадал ундириш мақсадида судга ариза киритди. Бу масала бўйича суд мажлиси 28 январдан 4 мартга кўчирилди.
Россия футболида юз бераётган бу можара Остон Ўруновнинг фаолиятига салбий таъсир қилаётгани ачинарли. Уч мавсум давомида Россия премьер-лигасида айтиши 35 та ўйин ўтказган ҳамюртимиз мавсум охирига қадар ҳали иқтидорини йўқотмаганини исботлашига тўғри келади.
Агар ёзда “Уфа” унинг трансфер ҳуқуқини сотиб олмаса ёки клуб премьер-лигадаги жойини бой берса, Остон яна ўзига янги жамоа топишга мажбур бўлади.
Фикрлар