Ўзбекистон терма жамоасининг легионерлари "ЖЧ-2026" доирасидаги Гонгконгга қарши учрашувларга қай ҳолатда етиб келмоқда?

Ўзбекистон терма жамоаси навбатдаги ўйинларини "ЖЧ-2026" саралаши доирасида Гонгконгга қарши ўтказади. Дастлаб, 21 март куни сафарда, 26 мартда эса ўз уйимизда ўйнаймиз. Осиё кубогидан кейин термамиз аъзоларининг ўз клубидаги фаолияти ҳақида маълумот берамиз.

Элдор Шомуродов

Терма жамоамиз сардори Элдор Шомуродов 15 декабрда Италия А Серияси 16-туридан ўрин олган "Наполи"га қарши ўйин олдидан машғулотларда оёқ бармоқларидан бирини синдириб олганди. Шу сабаб у Осиё кубогини бутунлай ўтказиб юборди. 28 ёшли ҳужумчи қишки трансферлар ойнасида Италиянинг "Салернитана" клубига ўтиб кетишига оз қолди. Бироқ сўнгги сонияларда сардинияликлар Элдорни жамоада олиб қолишга қарор қилди.

Февраль ойидан бошлаб якка тартибда машғулотларга киришган ҳужумчи 3 март куни бўлиб ўтган "Эмполи"га қарши ўйининг 87-дақиқасида захирадан майдонга тушди ва узоқ муддатдан сўнг майдонда ҳаракат қилди.
"Салернитана"га қарши иккинчи таймда тушган Шомуродов ўйин тақдирини ҳал қилди. У баҳснинг 51 ва 76-дақиқаларда гол киритди. Элдорнинг голлар билан қайтиши Гонгконгга қарши учрашувларда қўл келиши аниқ.

Жалолиддин Машарипов

"Навбаҳор"га ўтиши кутилган Жалолиддин Машарипов Осиё кубогидан кейин Эрон чемпионатига кўчиб ўтди. Вакилимиз Эрон Про лигасида ҳаракат қилувчи "Истиқлол" клуби билан бир ярим йиллик шартнома имзолаганини эълон қилди.
Чемпионат 17-туридан ўрин олган "Малаван"га қарши дебют қилган Машарипов гол уриб, теҳронликларни мағлубиятдан қутқариб қолган эди. 30 ёшли футболчи ҳозирча Эронда 4 та ўйинда қатнашди, яъни мунтазам ўйин амалиётига эга бўлмоқда:

Эрон чемпионатида - 239 дақиқа;
Кубокда - 45 дақиқа.

Отабек Шукуров

Терма жамоамиз етакчиларидан бири Отабек Шукуров Осиё кубоги олдидан жамоасиз қолди. "Фотиҳ Карагюмрюк" легионеримиз Отабек Шукуров билан келишувни бекор қилди.

Турнир якунлангач, Шукуров Туркиянинг бошқа клуби - "Кайсериспор"га кўчиб ўтди. 27 ёшли ярим ҳимоячи "Галатасарой"га қарши дебют ўйинида асосий таркибда майдонга тушиб, 63 дақиқа ҳаракат қилган бўлса, "Башакшеҳир"га қарши 17, "Анкарагюджю" билан учрашувда яна 3 дақиқа ўйнади. Cуперлиганинг сўнгги турида бўлиб ўтган "Хатайспор" билан учрашувда эса 76-дақиқада захирадан ўйинга қўшилди. Термамиз сафида кичик жароҳат олган Шукуров ҳали саломатлигини тўлиқ тиклай олганича йўқ.

Рустам Ашурматов

Қозоннинг "Рубин" жамоаси 15 январдан Туркияда йиғин бошлади. Осиё кубогида қатнашаётгани сабаб Рустам Ашурматов бу йиғинга 13 февралда бориб қўшилди.

Назорат ўйинларида ўзини яхши кўрсатган ҳимоячимиз РПЛ иккинчи даврасидаги "Краснодар"га қарши учрашувни асосий таркибда бошлади ва жамоасини мағлубиятдан қутқариб қолди. 27 ёшли ҳимоячи ўйин тугашига саноқлик дақиқалар қолганда боши билан гол урди ва жамоасининг дурангини таъминлади.
Ашурматов чемпионатнинг 20-туридаги ўйинда ҳам тўлиқ ҳаракат қилиб, учрашувдаги энг яхши футболчилардан бири бўлди.

"Ҳимоячининг асосий иши ҳимояда", - дейишингиз мумкин, аммо ҳимоячи орқа чизиқда ҳам ишончли ҳаракат қилмоқда. Энг асосийси, етарлича ўйин амалиётига эга бўлмоқда.

Аббосбек Файзуллаев

Осиё кубогини ёндирган Аббосбек Файзуллаевнинг мусобақадан кейинги ишлари беш эмас. Балки ҳар турда мухлисларни гол ёки ассистлари билан ўргатиб қўйгани учун шунақа туюлаётгандир. Туркияда йиғин ўтказган "армиячилар" бир нечта назорат ўйинлари ўтказди. Ушбу баҳсларда Аббосда чарчоқ аломатлари кузатилди. "Оренбург"га қарши беллашувни асосий таркибда бошлаган ва 73-дақиқада захирага олинган бўлса, "Крилья Советов"га қарши ўйинда эса 77-дақиқада захирадан тушди.

Гонгконг билан иккита ўйин ўта муҳимлигини ҳисобга олсак, ҳозирги термамизнинг асосий "фигуралар"идан бири бўлган Файзуллаевни формада бўлиши жуда муҳим.

Ҳусниддин Алиқулов

Ўзбекистон терма жамоасининг Фаластинга қарши ўртоқлик ўйинида жароҳат олган Ҳусниддин Алиқулов якуний қайдномага киритилмади, аниқроғи, Осиё кубогида қатнашмади. 

14 февралда машғулотларга қайтган Алиқулов "Фенербахче" билан учрашувда захирада қолди. "Самсунспор" билан 9 дақиқа ўйнаган бўлса, кейинги икки баҳсда ("Кайсериспор", "Галатасарой") асосий таркибда тушиб, тўлиқ 90 дақиқа ўтказди, жами эса 189 дақиқа. Терма жамоамизнинг асосий ўн битталигига кирувчи ҳимоячининг формада бўлиши жуда муҳим.

Азизбек Турғунбоев

Азизбек Турғунбоевнинг Осиё кубогидаги ажойиб ўйини уни легионерга айланишига катта йўл очди. "Пахтакор" футболчиси турнирдан сўнг Туркиянинг "Сивасспор" клубига кўчиб ўтди. "Ризеспор"га қарши дебют қилган "Роналду" мунтазам равишда майдонга тушиб келмоқда ("Хатайспор" - 84, "Пендикспор" - 90, "Касимпаша" - 90, "Аланьяспор" - 65) - жами 329 дақиқа майдонда ҳаракат қилган ва асосан асосий таркибда тушмоқда.

Абдуқодир Ҳусанов

Франциянинг "Ланс" клуби шарафини ҳимоя қилувчи Ҳусанов Осиё кубогида Алиқуловнинг ўрнини эгаллади ва деярли унинг йўқлигини сездирмади.

Қатардан қайтгач, Ҳусановнинг ишлари қандай?

Европа лигасининг плей-офф босқичида "Ланс" "Фрайбург" билан ўйнади ва имкониятни бой бериб қўйди, ушбу ўйинда эса вакилимиз тўлиқ 120 дақиқа ҳаракат қилди. 

Чемпионат ўйинларида 20 ёшли ҳимоячи "Страсбург" билан баҳсда захирада қолдирилди. "Реймс" билан учрашувда тўлиқ ҳаракат қилган бўлса, "Монако"га қарши захирада қолдирилди. Бундан ташқари, "Лион"га қарши 3 дақиқа ўтказган бўлса, чемпионат етакчиларидан бири "Брест"га қарши тўлиқ 90 дақиқа ўтказди. Ушбу сўнгги ўйинда Ҳусанов чап қанот ҳимоясида ҳаракат қилди. Тўлиқ ўйнаган фулбекнинг паслари аниқлиги 89 фоизга тенг бўлди. 3 та подкат ва 2 марта рақибини тўхтата олган Абдуқодирнинг ҳаракатлари 7,4 баллга лойиқ кўрилди. Шу билан бирга, футболчи ўз ҳисобига битта сариқ карточка ҳам ёздириб қўйди. Ўзбекистон терма жамоасининг умидли ҳимоячиси муҳим ўйинлар олдидан камроқ амалиётган эга бўлмоқда.

Остон Ўрунов

Туркия чемпионатига кўчиб ўтиши айтилган ва Қатарда кўп нарса кутилган Остон Ўрунов тўсатдан Эронга кўчиб ўтди. Ўтган мавсумни "Навбаҳор" сафида ўтказган футболчи "Персополис" билан 2025 йилнинг ёзига қадар мўлжалланган шартнома имзолади.

Остон чемпионат доирасидаги "Трактор"га қарши майдонга тушиши мумкин эди, бироқ FIFA Теҳрон клубига янги футболчиларни рўйхатдан ўтказишга тақиқ қўйгани сабаб дебют чемпионат 18-туридан ўрин олган "Зобаҳан"га қарши ўйинда бўлди. Ўрунов 67-дақиқада захирадан майдонга тушиб, гол уришга ҳам яқин келди.
"Фулад"га қарши учрашувни асосий таркибда бошлаган легионеримиз Эрон чемпионатидаги дебют голини ҳам киритди ва 90+1-дақиқада захирага олинди. Бундан ташқари, Ўрунов Эрон кубоги 1/16 финал босқичидан ўрин олган "Нафт Гачсаран"га қарши тўлиқ 90 дақиқа ўтказди - умумий 204 дақиқа.

Абдулла Абдуллаев

Абдулла Абдуллаев 2023 йилнинг сентябрь ойида БААнинг "Хорфаккан" клубига кўчиб ўтган эди. Абдуллаев ҳозирда жамоасининг асосий ҳимоячиларидан бири ва деярли ҳар бир ўйинда асосий таркибдан жой олмоқда.

26 ёшли ҳимоячи Қатарда бўлиб ўтган Осиё кубогидан сўнг клуби сафида кетма-кет 8 учрашувда тўлиқ 90 дақиқа ўйнаган бўлса, яна бир учрашувда бир бўлим ҳаракат қилди. Абдуллаев мунтазам ўйин амалиётига эга бўлаётган легионерларимиздан бўлиб турибди.

Ҳожимат Эркинов

Ўтган мавсумни "Пахтакор"да ўтказган вингер Ҳожимат Эркинов Қатардаёқ БААнинг "Ал-Ваҳда" клубига кўчиб ўтишга қарор қилди. Эркиновнинг дебютида гарчи жамоаси ютқазган бўлса ҳам футболчи фаол ҳаракатлари билан ажралиб турди. 22 ёшли футболчи чемпионат доирасида "Шаржа"га қарши ўйинда шеригининг голига пас бериб, янги жамоасидаги илк фойдали ҳаракатини амалга оширди. Ҳожимат Осиё кубогидан сўнг чемпионатда бир гол, бир ассист - 263 дақиқа, кубокда икки ўйин - 122 дақиқа, президент кубогида эса бир ўйин - 90 дақиқа ўтказиб, жами 475 дақиқа майдонда майдонда бўлди. Ўзбекистон терма жамоасининг тезкор вингери айни пайтда ўйин амалиёти жиҳатдан ҳам, форма тарафлама ҳам яхши ҳолатда.

Шаҳбоз Умаров

Ўтган мавсум "Ордабаси" билан Қозоғистон чемпионига айланган Шаҳбоз Умаров бу мавсум ҳам Шимкент клубида қоладиган бўлди. Жуда кучли зарбага эга бўлган Шаҳбоз Осиё кубогида фақат Қатарга қарши ўйинда иштирок этди.

25 февралда "Тобол" билан кечган Суперкубок баҳсида Умаров асосий таркибда майдонга тушиб, 68-дақиқада захирага олинди. Ўзбекистонда бўлгани каби Қозоғистонда ҳам чемпионат март ойидан старт олди. Биринчи турда "Шахтёр" билан ўйинда Умаров битта гол урди ва бундан ташқари, Яхшибоевнинг голига ассистентлик қилди. "Атирау"га қарши ўйинни илк дақиқалардан бошлаган легионеримиз 14-дақиқада жароҳат олиб, майдонни тарк этди.

Азиз Амонов

9 февралда БААнинг "Хорфаккан" жамоаси Азизбек Амонов трансферини эълон қилди. "Иттиход Калба"га қарши ўйинда дебют қилган футболчи, "Хатта"га қарши баҳсда дебют голини урди. Азиз Ғаниев ҳаракат қилаётган "Шабаб Ал Аҳли"га қарши учрашувда 67-дақиқада захирадан майдонга тушди.

Эслатиб ўтамиз, Қатардаги мусобақада Азизбек Амоновга майдонга тушиш учун имконият берилмади. Аммо унга имкон берилса, вазиятни гол билан якунлашини ОЧЛдаги ўйинлари орқали жуда яхши биламиз.

Умарбек Эшмуродов

Кўп йиллар Қаршининг "Насаф" жамоасида ўйнаб келган Умарбек Эшмуродов Малайзиянинг "Селангор" клуби аъзосига айланди. Эшмуродов келаси йили Осиё Чемпионлар лигасида иштирок этадиган ушбу жамоа билан уч йиллик шартнома тузди. Малайзия Суперлигаси май ойида старт олади. "Қизил девлар" лақаби билан номланувчи клуб чемпионат олдидан Таиланд клублари билан ўртоқлик ўйинлари ўтказишни режалаштирган. Терма жамоамизнинг алмаштириб бўлмас футболчиларидан бири бўлган Эшмуродовнинг тажрибаси саралаш баҳсларида бизга жуда муҳим.

Азиз Ғаниев

Қатарга бориши кутилган, аммо Сречко Катанец чақирмаган "Шабаб Ал-Аҳли" плеймейкери Азиз Ғаниев мусобақа давомида энг кўп эсланганлардан бири бўлди. Мухлис ва таҳлилчилар: "Нима учун ўз позициясида энг зўри бўлиб турган Ғаниев бормади, нега чақирилмади?" деган саволни етарлича "чайнашди".
Ғаниев ақллилиги ва майдонни кўра билиш қобиляти бўйича Ўзбекистондаги кам сонли футболчилар сирасига киради.

Қани, у клуби сафида қандай ҳаракат қилмоқда?

Айни дамда 3.5 миллион еврога баҳоланаётган футболчи ўтган мавсум "Шабаб Ал-Аҳли" билан БАА Премьер-лигаси чемпионига айланди. Бу мавсумда барча турнирлардаги ўйинларини ҳисоблаганда 19 ўйинда қатнашиб, 3 та гол урди ва 4 та голли узатма амалга оширди. У жами 1511 дақиқа майдонда ҳаракат қилди.

Осиё кубогида Австралияга қарши ўйинда тиззасидан жароҳат олган Игорь Сергеев турнирдаги иштирокини якунлаган эди. Шифокорлар хулоасига кўра, унинг майдонга қайтишига тахминан 8 ой кетади. Сергеев яқин 7 ойни ўтказиб юборади.

Қатарда Қатарга ютқазган Ўзбекистон терма жамоаси 21 мартда Гонгконгдаги "Монг Кок" стадионида ўйнаса, 26 мартда "Бунёдкор" стадионида яна бир бор шу терма билан куч синашади 

                                                                                                                              Ойбек Юлдошев