Премьер-лига: Легионерларимиз нархлари эълон қилинди!
Трансферларга ихтисослашган transfermarkt.world портали Россия Премьер-лигасидаги футболчилар рейтингини янгилади.
Ҳозирги пайтда Россия футболи катта муаммоларга дуч келган. Сиёсий вазият туфайли бу мамлакат терма жамоалари, клублари ФИФА ва УЕФА таснифидаги мусобақалардан четлатилган. Кучли легионерлар Россияни тарк этди, бошқалари бу ерга келишни истамаяпти.
Бу жараён рус футболига салбий таъсир қилмоқда. Россия терма жамоалари ва клублар халқаро ҳамжамиятдан узилиб қолди. Расман фақат ички мусобақалар ўтказиляпти. Терма жамоалар фақат айрим мамлакатлар вакиллари билан ўртоқлик учрашувларида қатнашяпти холос.
Жорий мавсумда Россия Премьер-лигасидаги 16 жамоа таркибида жами 415 нафар футболчи рўйхатдан ўтказилган. Шулардан 32 фоизи, яъни 133 нафари хориж мамлакатларидан келган легионер футболчилар.
Легионерлар жами 45 та мамлакатдан келган. Энг қизиғи, Россия жамоаларида Ғарбий Европа мамлакатларидан ўйинчи жуда кам.
Премьер-лигага энг кўп футболчи жўнатган мамлакат Бразилия ҳисобланади. Якунланган мавсумда 19 нафар бразилиялик футболчи тўп тепди. Бу кўрсаткич бўйича иккинчи ўриндаги Сербиядан 13 та вакил бор. Қолган давлатлардан келган чарм тўп усталарининг сони ўнтага етмайди.
Россия юқори дивизионида Ўзбекистондан икки вакил – Ибоҳимхалил Йўлдошев ва Ҳожимат Эркинов ўйнади.
Трансфермаркт портали экспертлари ҳисоб-китобига кўра, якунланган мавсумда нархи энг кўп кўтарилган футболчи Виллиан Роша бўлди. ЦСКАнинг бразилиялик марказий ҳимоячиси трансфери 3,5 миллион еврога ошди ва умумий ҳисобда етти миллион еврони ташкил қилмоқда.
Шунингдек, “Зенит”даги яна бир бразилиялик – Малкомнинг нархи ҳам уч миллион еврога кўтарилиб, жами 30 миллион еврога етди. 26 ёшли ҳужумкор ўйинчи Россия Премьер-лигасининг энг қимматбаҳо иштирокчисига айланди.
Премьер-лигада нархи энг кўп кўтарилган футболчилар рейтинги қуйидагича кўриниш олди.
Энди Ўзбекистон легионерлари ҳақида. Иброҳимхалил Йўлдошев “Нижний Новгород” жамоасининг юқори дивизиондаги ўрнини сақлаб қолишга ёрдам берди. 22 ёшли футболчимиз Премьер-лигада 28 та ўйинда қатнашиб, ҳимоядаги вазифаларини бажаришдан ташқари, рақиблар дарвозасига бир жуфт тўп ҳам киритди.
Йўлдошевнинг трансфер нархи 900 минг еврони ташкил қилмоқда. Трансфермаркт мутахассислари унга бу нархни бир йил муқаддам берганди. Янгиланган рейтингда Йўлдошев яна ўз даражасини сақлаб қолди.
Ҳожимат Эркинов Премьер-лигада илк мавсумини ўтказди. “Торпедо” жамоаси юқори дивизиондаги дебют мавсумида ишончли ўйнай олмади ва яна биринчи лигада тўп тепадиган бўлди.
Эркинов йигирмата учрашувда қатнашиб, битта голли пас узатди. Ҳожиматнинг трансфер суммаси бир йил муқаддам “Пахтакор” сафида ўйнаб юрганида 500 минг еврога кўтарилган эди. Биринчи маротаба легионер мақомида тўп тепган 22 ёшли истеъдодли ҳужумкор футболчимиз Россия футболида ҳам йўқолиб қолгани йўқ ва трансфермаркт мутахассислар бир йил муқаддам белгилаган трансфер суммасини сақлаб қолди.
Энди келаси мавсум Россия Премьер-лигасидаги вакилларимиз сони янада ошади. Биринчи лигада “Рубин” жамоаси шарафини ҳимоя қилган Рустам Ашурматов ва Умарали Раҳмоналиев юқори дивизионга кўтарилди. Қозонликлар мавсумни биринчи ўринда якунлаб, келаси мавсум Премьер-лигада қатнашиш ҳуқуқини қўлга киритган.
Comments