“Реал” Ҳусановнинг дўстини олиб кетадиган бўляпти
Испаниянинг амалдаги чемпиони “Реал” таркиби ҳарчанд кучли бўлмасин, бу мавсум “Барселона” билан етарли даражада рақобатлаша олмаяпти. Халқаро майдонда ҳам “Арсенал”га қарши кечган ўйин мадридликларнинг қудратини катта шубҳага қўйди.
“Қироллик клуби” таркибида айрим ўзгаришлар қилиши кутилмоқда. Клуб хўжайинлари Саудия Арабистони клубилари жиддий қизиқиш билдираётган Винисиус Жуниорни қўйиб юбориши мумкин.
Журналист Флориан Плеттенбергнинг маълум қилишича, ишга Саудия Арабистонининг юқори даражадаги раҳбарлари аралашган ва айни пайтда Винисиус Жуниор вакиллари билан музокаралар қизғин паллага кирди.
“Реал” бразилиялик футболчи атрофидаги вазиятдан яхши хабардор ва зудлик билан унинг ўрнига бошқа тўпурар топиб қўйди. Маълумотларга қараганда, мадридликлар “Манчестер Сити” марказий ҳужумчиси Эрлинг Холандни ўз сафига қўшиб олмоқчи. Агар бу трансфер амалга ошса, ҳужум маркази норвегиялик тўпурарга топширилади. Бу позицияда мажбуран ўйнаётган Килиан Мбаппе ўзи ёқтирган жой – Винисиусдан бўшайдиган чап қанотга кўчиб ўтади.
“Сити”да Холанд ўрнини Умар Мармуш билинтирмайди. Хосеп Гвардиола қишки трансферлар вақтида олинган тўрт футболчи орасида мисрлик ҳужумчининг ҳаракатларидан кўпроқ мамнун бўлмоқда. Абдуқодир Ҳусанов эса, кейинги пайтда захирага ўтириб қолди.
Таъкидлаш лозимки, Эрлинг Холанд Абдуқодир Ҳусановни жуда илиқ қабул қилган ўйинчилардан ҳисобланади. Легионеримиз Франциянинг “Ланс” жамоасидан “Манчестер Сити”га кўчиб ўтганидан бери уни қўллаб-қувватлаб келмоқда.
“Манчестер Сити”га нишондаги футболчи нархини айтишди
“Манчестер Сити” ёзги трансферлар даврида фаоллик кўрсатишни режалаштирмоқда. “Шаҳарликлар” нишонига тушган футболчиларан бири Тижани Рейндерс ҳисобланади.
Журналист Саша Тавольерининг маълум қилишича, манчестерликлар нидерландиялик футболчи яқин келажакда ёши ўтиб қолган Илкай Гюндоғаннинг ўрнини босиши керак. Германиялик ярим ҳимоячи клуб билан келишувини яна бир йилга узайтирди, бироқ келаси йил ёзда жамоани тарк этади.
“Милан” ўз етакчиларидан бирини қўйиб юборишга тайёр. Бунинг учун улар бонуслар қўшилмаганда 65 миллион евродан бошланган таклифларни кўриб чиқади.
Манбага кўра, бу сумма “шаҳарликлар”ни ҳам қониқтиради. Қолаверса, Тижани Рейндерснинг ўзи ҳам “Манчестер Сити”га ўтиш имкониятини олдинга ташланган қадам сифатида қабул қилмоқда.
Собиқ сардор “Сити”га қайтмайди
Қишки трансферлар вақтида “Манчестер Сити”нинг ўша пайтдаги сардори Кайл Уокер мунтазам ўйин амалиётига эга бўлиш учун ижара асосида “Милан”га кўчиб ўтган эди.
Италиядаги фаолияти давомида тажрибали ҳимоячи келажагига ойдинлик киритиб олди. Манбаларнинг таъкидлашича, 34 ёшли футболчи Манчестерга қайтмоқчи эмас.
Кайл Уокернинг ижара шартномасида “Милан” тажрибали ҳимоячини сотиб олишига имкон берадиган банд киритилган. Миланликлар бу масалани клубга янги спорт директори тайинланганидан кейин ҳал қилмоқчи.
Ўз навбатида, таниқли инсайдер Фабрицио Романо “шаҳарликлар” ҳам Кайл Уокерни ортга қайтармаслигини ва унинг ўрнига бошқа футболчи қидираётганини тасдиқлади.
“Манчестер Сити”га 2017 йили олиб келинган ва жамоа муваффақиятларида катта роль ўйнаган Кайл Уокернинг манчестерликлар билан амалдаги шартномаси 30 июнь куни тугайди ҳамда у эркин агент мақомини олади.
Фикрлар