“Рома” ҳужумчисининг нархини айтди. Римни ким тарк этади?
“Рома” раҳбарияти истеъдодли футболчиси Николо Дзаньолони сотиб юборишга қарор қилди.
22 ёшли футболчи 2018 йилдан бери “бўрилар” сафида тўп тепиб келмоқда. У ўнг қанот, ҳужум ва плеймейкер ҳудудида бирдек самарали ўйнай олиши билан кўп клубларнинг эътиборини қозонган.
“Рома” мутасаддилари 2024 йилнинг 30 июнигача амал қиладиган шартнома эгаси бўлган Дзаньолога харидорлар кўпайиб бораётганини инобатга олиб, ҳужумкор футболчининг трансфери учун 70 миллион евро талаб қилмоқда.
Transfermarkt порталида Дзаньолонинг нархи 33 миллион евро экани кўрсатилган. Лекин футболчини ўз сафига қўшиб олишни истаётган клублар ўйинчининг нархи бу суммадан анча ўтиб кетганини инобатга олиши керак.
Мутахассисларнинг таъкидлашича, Николо трансферидан келадиган маблағнинг 15 фоизини “Интер” олиши керак. Чунки клублар 2018 йилда ўйинчи алмашган бўлиб, Николо Римга келган бўлса, Ража Ража Наингголан Миланга йўл олган. Ўшанда клублар Дзаньолонинг кейинги трансферидан “Интер”га улуш берилишини келишиб олган эди.
Дзаньолонинг харидорлари кўпайиб кетди
“Рома” ёзги трансферлар вақтида ўз тарбияланувчиси Николо Дзаньолони ушлаб қолиши анча қийин бўлади.
Айни пайтда пойтахт клуби мутасаддилари ҳужумкор футболчини янги шартномага кўндиришга ҳаракат қиляпти. Дзаньолонинг амалдаги келишуви яна икки мавсум давом этади. Бироқ, янги битимн имзоламаса, харидорлар 33 миллион евро эвазига уни трансфер қилиш имкониятини сақлаб қолади. Шу боис, Николо “Рома” таклифини қабул қилишга шошилмаяпти.
Il Messaggero нашрининг хабар беришича, томонлар ўртасидаги музокаралар тўхтаб қолган.
Вазиятни кузатиб турган клублар ёзда Дзаньолони ўз сафига қўшиб олишга ҳаракат қилади. Маълумотларга қараганда, ҳозирнинг ўзида ҳужумкор футболчига “Ювентус”, “Манчестерд Юнайтед”, “Тоттенхэм” ва ПСЖдан манфаатли таклифлар бор.
Николонинг агенти нима дейди?
Николо Дзаньолонинг агенти Клаудио Вигорелли мижози атрофидаги хабарларга ўз муносабатини билдирди.
- Шошиб қаёққа борардик, ўйлаб иш қилиш учун вақтимиз етарли. Ҳозир бор эътиборимизни “Рома” билан мавсумни муваффақиятли якунлашга қаратганмиз. Трансферга оид хабарлар йил бўйи чиқади.Дзаньоло даражасидаги ўйинчиларни катта клублар билан кўп боғлашади. Лекин Николо айни пайтда “Рома” ўйинчиси, - деди Клаудио Вигорелли.
“Рома” бош мураббийи Жозе Моуриньо Николони асосий таркибнинг муқим ўйинчилари қаторига қўшди. Шу билан бирга португалиялик мутахассис Дзаньоло Англия премьер-лигасига бориши кераклигини, чунки А Серия ҳимоячилари техник жиҳатдан анча кучли бўлган Николога нисбатан қўпол ўйнаётганини таъкидлаган эди.
Табиийки, истеъдодли ўйинчига қизиқаётган клублар орасида Англия премьер-лигаси вакиллари ҳам бор.
“Ювентус” янги вариант таклиф қилади
“Ювентус” жамоани тарк этиши кутилаётган Пауло Дибала ўрнига “Рома” вакили Николо Дзаньолони олишга ҳаракат қилмоқда.
Айни пайтда туринликлар пойтахт клуби мутасаддиларига маъқул келадиган вариант танлаш билан банд. “Ювентус” Дзаньоло учун муайян миқдордаги маблағдан ташқари америкалик ярим ҳимоячи Уэстон Маккенини қўшиб бермоқчи.
23 ёшли Маккени Европага 2016 йилда келган. У Турин клубидан ташқари “Шальке” таркибида Бундеслигада ҳам тўп тепган.
Жорий мавсумда Уэстон барча турнирларда 28 маротаба майдонга тушиб, ўз ҳисобига тўртта гол ёздириб қўйди.
Фикрлар