“Рома” Шомуродов вазиятига ойдинлик киритди!

Ўзбекистон миллий терма жамоаси сардори Элдор Шомуродовнинг Италиядаги фаолияти қандай давом этиши ўзбекистонлик футбол мухлисларининг барчасини қизиқтириб турган масала ҳисобланади.

“Рома” бош мураббийи Жозе Моуриньо Япониядаги йиғиндан кейин бир марказий ҳужумчи билан ўйналадиган тактик схемага қайтишини маълум қилди. Айнан мана шу схема ёрдамида римликлар “Йокогама Фаринос”га қарши ўртоқлик учрашувида икки тўп фарқини йўққа чиқариб, мағлубиятдан қутилиб қолди.

Дарҳақиқат, “Рома”га 3:3 ҳисобида дуранг келтирган баҳсдаги охирги тўпни ягона марказий ҳужумчи сифатида ўйнаган Элдор Шомуродов киритди.

Табиийки, ўртоқлик учрашувидаги биргина гол легионеримизнинг жамоадаги мавқеини оширмайди. Жозе Моуриньо жамоасида бу марказий ҳужумда Тэмми Абрахам ва Андреа Белоттининг жойи кафолатланган. Норвегиялик ҳужумчи Ола Срльбаккеннинг “Рома”га ўтганини инобатга олсак, Шомуродовнинг майдонга тушиш навбати янада ортга сурилади.

Шу боис, ўзбек ҳужумчисининг январда жамоадан кетиши ҳақидаги хабарлар тобора кўпайиб бормоқда. Италия матбуоти “Монца”, “Торино”, “Сампдория” ва “Кремонезе” Шомуродовни қишки трансферлар учун биринчи нишон сифатида белгилаганини ёзмоқда. Бу клубларнинг бари “Рома”га ўзбек ҳужумчисининг трансфер маълумотларини сўраб мурожаат қилгани ҳақида маълумотлар бор.

Шуни инобатга олиб, “Рома” раҳбарияти Элдор Шомуродов вазиятига ойдинлик киритди. Бир неча манбалар, хусусан, Tuttomercatoweb.com сайтининг хабар беришича, Рим клуби ҳужумчини январь ойида қўйиб юборишга тайёр.

Бу биринчи навбатда, харидорлар қанча сумма таклиф этишига боғлиқ бўлиши таъкидланмоқда. “Рома” идеал вариант сифатида ҳужумчини бирданига тўлиқ трансфер қиладиган жамоа билан савдолашмоқчи. Агар бунинг имкони бўлмаса, Элдорни мавсум охиригача ижарада ўйнатмоқчи бўлаётган клублар ёзда форварднинг трансферини тўлиқ харид қилиш мажбуриятини ўз зиммасига олиши ва бунинг учун тўланадиган сумма ҳозирдан белгилаб қўйилишини маълум қилди.

Қайси клуб шу шартнома бажарса, ўз ҳужум чизиғини Элдор Шомуродов билан кучайтириш имконига эга бўлади.

Трансферларга ихтисослашган https://www.transfermarkt.world сайтида ҳамюртимизнинг нархи 7 миллион еврогача тушгани кўрсатилган.  

Маълумот ўрнида айтиш лозимки, “Рома” мутасаддилари ёзда Элдор Шомуродовни 10 миллион евро таклиф қилган “Болонья”га бермади. Демак, бу гал ҳам пойтахтликлар шу суммадан баланд таклиф кутади.

Шомуродовнинг “Рома” билан амалдаги шартномаси 2026 йилнинг ярмигача тузилган. “Бўрилар” ўтган йили ёзда ўзбек ҳужумчиси учун “Женоа”га 18 миллион евро тўлаган эди.

Шомуродов учун курашда асосий фаворит номи аниқ бўлди

"Рома"ни қутқарган Шомуродовнинг ўйини қандай баҳоланди?

Вазият Шомуродов истагандек эмас!

Шомуродовнинг голи “Рома”ни мағлубиятдан қутқарди. Энди Моуриньонинг муносабати ўзгарадими?

Ўрунов жамоасиз қолганининг ҳақиқати очилди!

Шомуродов ва Абрахамдан кейин Дибала ҳам “Рома”дан кетадиган бўляпти!