Shomurodov, tanlovda adashma! Eldorning faoliyatida o‘zgarish bo‘ladi!
2025 yil O‘zbekiston milliy terma jamoasi sardori va eng zo‘r to‘purari Eldor Shomurodov uchun alohida ahamiyat kasb etadi.
29 yoshli futbolchimiz milliy terma jamoadagi do‘stlari bilan yangi yilda O‘zbekistonni o‘z tarixida ilk bor jahon chempionatiga olib chiqishi kerak. 2026 yili AQSh, Kanada va Meksika mezbonlik qiladigan mundialning Osiyo mintaqasi saralash turnirida futbolchilarimiz hal qiluvchi bosqichda muvaffaqiyatli ishtirok etmoqda.
O‘zbekiston terma jamoasi A saralash guruhida oltinchi turdan keyin 13 ochko bilan ikkinchi o‘rinni egallab turibdi. Jami uchta guruhdan dastlabki ikki o‘rinni egallagan jamoalar jahon chempionatiga yo‘llanma qo‘lga kiritadi.
2025 yili futbolchilarimiz Qirg‘iziston, Eron, Birlashgan Arab Amirliklari va Qatar bilan jami to‘rtta uchrashuvda maydonga tushadi. Asosiy raqobatchilar – Eron va BAA bilan o‘yin safarda bo‘lib o‘tadi.
Xullas, bu uchrashuvlarda Eldor Shomurodov mas’uliyatni o‘z bo‘yniga olishi va sardor sifatida jamoani o‘z o‘rtidan ergashtirishi kerak. Tajribali to‘purarimiz har qanday holatda ham terma jamoa uchun zo‘r o‘ynab berishini yaxshi bilsak-da, yangi yilda Eldorning klublar miqyosida ham muntazam o‘yin amaliyotiga ega bo‘lishidan hammamiz manfaatdormiz.
Shu bois, Shomurodov qishki transferlar vaqtida jamoa tanlashda to‘g‘ri qarorga kelishi muhim. “Roma” legionerimiz o‘rniga boshqa markaziy hujumchi qidirishni boshlab yuborgan. Eldor “bo‘rilar” safida qanday o‘yin namoyish qilsa ham, hatto gol urgan va assist qayd etgan bellashuvlardan keyin ham baribir unga muntazam o‘yin amaliyoti berilmayapti.
Eldordek tajribali hujumchi jamoasiz qolib ketmasligi aniq. “Kalyari” va “Empoli” yanvar oyida Shomurodov uchun kurashishini ma’lum qildi. Bu jamoalar bosh murabbiylari va sport direktorlari o‘zbek legionerining imkoniyatlarini yaxshi biladi va unga jamoadan joy berishga, ligada qolish uchun kurashda uning tajribasidan foydalanishga tayyor.
Italiya matbuotining yozishicha, “Roma” hujumchisiga uchinchi da’vogar ham qo‘shildi.
- Eldor Shomurodov muntazam o‘yin amaliyotiga ega bo‘lish uchun yanvar oyida Klaudio Raneri boshqarayotgan “Roma”ni tark etishi kerak. Hozirning o‘zida o‘zbek futbolchisiga A Seriyaning uch jamoasi da’vogarlik qilmoqda. “Kalyari” va “Empoli” qatoriga “Venetsiya” ham qo‘shildi, - deb yozmoqda Il Messaggero nashri.
Bu ma’lumotni bir nechta boshqa manbalar ham tasdiqladi.
A Seriyada qolish uchun kurashayotgan “Venetsiya” ham malakali forvard xizmatiga ehtiyoj sezmoqda. Musobaqa jadvalida 19-pog‘onani egallab turgan venetsiyaliklar oldingi chig‘izida muammolar ko‘zga tashlanmoqda.
Aslida jamoada sof hujumchilar kam. Hujumchi sifatida qaydnomadan joy olgan to‘rt nafar futbolchidan faqat finlyandiyalik Yoel Poxyanpalo 16 ta uchrashuvda beshta gol urdi xolos. Qolgan uch o‘yinchi – daniyalik Kristian Gyuntkyaer italiyalik Antonio Raymondo va marokashlik Saad Al-Haddad hali raqiblar darvozasiga yo‘l topa olgani yo‘q.
Gollarning kamligi “Venetsiya”ning natijalariga ham salbiy ta’sir qilmoqda. Jamoa 18 ta uchrashuvdan atigi uchtasida zafar quchgan va to‘rt bor durang o‘ynagan.
Evropada qishki transfer bozori endi boshlandi va bir oy davom etadi. Odatda, transferlar yanvarning oxirgi kunlari rasmiylashtiriladi. Shuni inobatga olgan holda, Shomurodov uchun yangidan yangi da’vogarlar paydo bo‘lishi ehtimoli katta. Demak, kuzatishda davom etamiz...
Husanov hammani hayratga soldi!
Bunaqasi bo‘lmagan: Husanov “uchdi”!
Bizga gol urgan Shomurodovni olamiz! Eldorga kutilmagan yangi xaridor chiqdi
Fikrlar