Шомуродов, танловда адашма! Элдорнинг фаолиятида ўзгариш бўлади!
2025 йил Ўзбекистон миллий терма жамоаси сардори ва энг зўр тўпурари Элдор Шомуродов учун алоҳида аҳамият касб этади.
29 ёшли футболчимиз миллий терма жамоадаги дўстлари билан янги йилда Ўзбекистонни ўз тарихида илк бор жаҳон чемпионатига олиб чиқиши керак. 2026 йили АҚШ, Канада ва Мексика мезбонлик қиладиган мундиалнинг Осиё минтақаси саралаш турнирида футболчиларимиз ҳал қилувчи босқичда муваффақиятли иштирок этмоқда.
Ўзбекистон терма жамоаси А саралаш гуруҳида олтинчи турдан кейин 13 очко билан иккинчи ўринни эгаллаб турибди. Жами учта гуруҳдан дастлабки икки ўринни эгаллаган жамоалар жаҳон чемпионатига йўлланма қўлга киритади.
2025 йили футболчиларимиз Қирғизистон, Эрон, Бирлашган Араб Амирликлари ва Қатар билан жами тўртта учрашувда майдонга тушади. Асосий рақобатчилар – Эрон ва БАА билан ўйин сафарда бўлиб ўтади.
Хуллас, бу учрашувларда Элдор Шомуродов масъулиятни ўз бўйнига олиши ва сардор сифатида жамоани ўз ўртидан эргаштириши керак. Тажрибали тўпураримиз ҳар қандай ҳолатда ҳам терма жамоа учун зўр ўйнаб беришини яхши билсак-да, янги йилда Элдорнинг клублар миқёсида ҳам мунтазам ўйин амалиётига эга бўлишидан ҳаммамиз манфаатдормиз.
Шу боис, Шомуродов қишки трансферлар вақтида жамоа танлашда тўғри қарорга келиши муҳим. “Рома” легионеримиз ўрнига бошқа марказий ҳужумчи қидиришни бошлаб юборган. Элдор “бўрилар” сафида қандай ўйин намойиш қилса ҳам, ҳатто гол урган ва ассист қайд этган беллашувлардан кейин ҳам барибир унга мунтазам ўйин амалиёти берилмаяпти.
Элдордек тажрибали ҳужумчи жамоасиз қолиб кетмаслиги аниқ. “Кальяри” ва “Эмполи” январь ойида Шомуродов учун курашишини маълум қилди. Бу жамоалар бош мураббийлари ва спорт директорлари ўзбек легионерининг имкониятларини яхши билади ва унга жамоадан жой беришга, лигада қолиш учун курашда унинг тажрибасидан фойдаланишга тайёр.
Италия матбуотининг ёзишича, “Рома” ҳужумчисига учинчи даъвогар ҳам қўшилди.
- Элдор Шомуродов мунтазам ўйин амалиётига эга бўлиш учун январь ойида Клаудио Раньери бошқараётган “Рома”ни тарк этиши керак. Ҳозирнинг ўзида ўзбек футболчисига А Сериянинг уч жамоаси даъвогарлик қилмоқда. “Кальяри” ва “Эмполи” қаторига “Венеция” ҳам қўшилди, - деб ёзмоқда Il Messaggero нашри.
Бу маълумотни бир нечта бошқа манбалар ҳам тасдиқлади.
А Серияда қолиш учун курашаётган “Венеция” ҳам малакали форвард хизматига эҳтиёж сезмоқда. Мусобақа жадвалида 19-поғонани эгаллаб турган венецияликлар олдинги чиғизида муаммолар кўзга ташланмоқда.
Аслида жамоада соф ҳужумчилар кам. Ҳужумчи сифатида қайдномадан жой олган тўрт нафар футболчидан фақат финляндиялик Йоэль Похьянпало 16 та учрашувда бешта гол урди холос. Қолган уч ўйинчи – даниялик Кристиан Гюнткьяер италиялик Антонио Раймондо ва марокашлик Саад Ал-Ҳаддад ҳали рақиблар дарвозасига йўл топа олгани йўқ.
Голларнинг камлиги “Венеция”нинг натижаларига ҳам салбий таъсир қилмоқда. Жамоа 18 та учрашувдан атиги учтасида зафар қучган ва тўрт бор дуранг ўйнаган.
Европада қишки трансфер бозори энди бошланди ва бир ой давом этади. Одатда, трансферлар январнинг охирги кунлари расмийлаштирилади. Шуни инобатга олган ҳолда, Шомуродов учун янгидан янги даъвогарлар пайдо бўлиши эҳтимоли катта. Демак, кузатишда давом этамиз...
Ҳусанов ҳаммани ҳайратга солди!
Бунақаси бўлмаган: Ҳусанов “учди”!
Бизга гол урган Шомуродовни оламиз! Элдорга кутилмаган янги харидор чиқди
Фикрлар