Шомуродов билан “Реал”га ўтган юлдузнинг ижара нархи бир хил чиқди

17 август, 2023, 08:08
3
Футбол

Ўзбекистон миллий терма жамоаси сардори Элдор Шомуродов ёзги трансферлар даврида А Серия дебютанти “Кальяри” сафига кўчиб ўтган эди.

Аслида легионеримизга Грециянинг ПАОК, Туркиянинг “Галатасарой”, Россиянинг “Спартак”, Испаниянинг “Жирона” ва Италиянинг “Лечче” каби клубларидан жиддий таклифлар бор эди. Шомуродов моҳир мураббий Клаудио Раньери бошчилигида тўп тепиш ва фаолиятини жонлаштириш мақсадида Сардиния клубини танлади.

gettyimages-1578055584-612x612

“Кальяри” раҳбарияти ўзбек ҳужумчисининг бир йиллик ижараси учун бир миллион евро тўлайдиган бўлди. “Рома” бош мураббий Жозе Моуриньога керак бўлмай қолган ҳужумчининг вақтинчалик хизматини шунчага баҳолади.

Сардинияликлар римликларни келаси ёзда Шомуродовни 9 миллион евро эвазига тўлиқ қўйиб юборишга ҳам кўндирди.

Энди қизиқ ҳолат. “Реал” яқинда асосий посбони Тибо Куртуани узоқ муддатга йўқотганди. Тиззасидан оғир жароҳат олган бельгиялик дарвозабон бу мавсум мадридликларга ёрдам бера олмайди.

“Қироллик клуби” шошилинч равишда бир неча маҳоратли дарвозабонлар рўйхатини тузди. Ишсиз юрган Давид де Хеа номзодини “Реал” бош мураббийи Карло Анчелотти ёқламаган бўлса, “Севилья” Яссин Бунуни, “Валенсия” эса Георгий Мамардашвилини Мадридга жўнатишга кўнмади.

“Реал” муаммо ечимини Англия Премьер-лигасидан топди. “Челси” раҳбарияти испаниялик дарвозабон Кепа Аррисабалагани ўз юртига қўйиб юборишга кўнди.

Relevo нашри журналисти Мануэль Аморнинг ёзишича, “аристократлар” дарвозабоннинг ижара муддатидаги хизматини 1 миллион еврога баҳолаган.

“Реал” бу суммага кўнди. Кепа билан 2024 йилнинг 30 июнгача битим тузди. Дарвозабон 46-рақам остида ўйнайдиган бўлди. Шомуродовнинг ижарасидан ягона фарқли жиҳати “Челси” мадридликларга ўз ўйинчисини мавсум охирида сотиб олиш ҳуқуқини бермади.

Аррисбалага профессионал фаолиятини Бильбаонинг “Атлетик” жамоасида бошлаган. Орада Испаниянинг “Понферрадина” ҳамда “Реал Вальядолид” клубларида ижара асосида ўйнашга ҳам улгурган.

2018 йили “Челси” раҳбарияти Кепа Аррисабалагани “Атлетик”дан 80 миллион еврога трансфер қилган. Бу дарвозабон учун сарфланган футбол тарихидаги энг катта харажат сифатида қайд этилган.

Кепа ишончли дарвозабон мақомини узоқ ушлаб тура олмади. Ўйинларда йўл қўйган кўплаб қўпол хатолари туфайли кейинчалик “Челси” асосий таркибидаги жойини рақобатчиларига бой берди.

Бугунги кунда 28 ёшли дарвозабоннинг трансфер нархи 16 миллион еврога тушиб қолган.

golkiper-chelsi-kepa-arrisabalaga-blizok-k-arende-v-madridskij-real_1691833520799278428