Совриндорлар кушандалари ТОП-5

28 ноябрь, 2016, 22:22
0
Футбол

Олий лига-2016 якунларига оид қизиқарли маълумотларни эътиборингизга ҳавола этишда давом этамиз. Бу сафар Совриндор жамоалардан энг кўп очко олган 5 жамоа ҳақида маълумот бериб ўтамиз.

5. "Бухоро". 1 ғалаба, 1 дуранг, 4 мағлубият. Тўплар нисбати 3:12
Турнир жадвалида 4-ўринни эгаллаган "Бухоро" совриндор бўлган 3 жамоадан атиги 4 очко олди. Бухороликлар "Локомотив"ни ўз майдонида ютган бўлишса, "Бунёдкор" билан дуранг ўйнади. "Бухоро" "аждарлар" ва "қалдирғочлар" дарвозаларига гол ҳам ура олмаган.

4. "Машъал". 1 ғалаба, 2 дуранг, 3 мағлубият. Тўплар нисбати 3:10
Муборакликлар "Бунёдкор" билан кечган ҳар икки ўйинда ҳам муроса кўчасини танлашган бўлса, "Насаф"ни ўз майдонида 1:0 ҳисобида таслим этди. Клуб "темирйўлчилар" билан ўйинларда очкосиз қолиб кетган.

3. "Нефтчи". 1 ғалаба, 2 дуранг, 3 мағлубият. Тўплар нисбати 6:13
Совриндор бўлган жамоалар Фарғонада ғалаба қозона олишмаган. "Насаф" ва "Локомотив" бир очко билан ортга қайтишган бўлишса, "Бунёдкор" меҳмондан қуруқ қайтган.

2. "Металлург". 1 ғалаба, 2 дуранг, 3 мағлубият. Тўплар нисбати 6:12
"Металлург" бир неча йиллардан буён гранд жамоалар учун ҳақиқий бош оғриғи бўлиб келмоқда. Медалларга эга чиққан клублар Бекободда ҳам ғалаба қозона олишмаган. "Локомотив" 3:3, "Бунёдкор" 1:1 ҳисобида дуранг ўйнади. "Насаф" эса "Металлург" билан сафардаги баҳсда 0:1 ҳисобида имкониятни бой берди.

1. "Пахтакор". 2 ғалаба, 1 дуранг, 3 мағлубият. Тўплар нисбати 6:9
Ўтган йилги чемпиони "Пахтакор" ушбу мавсумда 5-ўрин билан чекланди. "Шерлар" ушбу мавсумда ўз майдонларида "Локомотив" ва "Бунёдкор"дан устун келиб, "Насаф" билан дуранг ойънашди. Бироқ "Пахтакор" меҳмондаги ўйинларда совриндор жамоалардан очко ола билмади.

Фурқат Юсупов тайёрлади