А Серия клуби: Шомуродов зўр ўйинчи, лекин бизга ўз ихтиёри билан ўтиши муҳим!

А Серия жамоалари таркибини кучайтириш мақсадида ўзларига мос ўйинчиларни қидирмоқда. Мавсум бошланганидан бери А Серияда бирорта ғалабага эриша олмаган “Кремонезе” вазиятни ўнглаш учун январдан бошлаб, янги футболчиларни олишни режалаштирмоқда.

Олий дивизиондаги жойини сақлаб қолишга интилаётган жамоанинг спорт директори  Симон Жиаччетта журналистлар билан учрашувда клуб режаларининг трансфер бозоридаги режалари билан ўртоқлашди.

Суҳбат чоғида гап “Рома” ҳужумчиси Элдор Шомуродовга бориб тақалди.

- Биз ҳужум, майдон маркази ва ҳимоя чизиғимизни машғулотлар ва аниқ мақсадга йўналтирилган ҳаракатларимиз эвазига ривожлантиришни истаймиз. Биз асосий таркибни мустаҳкамлашимиз лозим.

Биринчи ғоя – мақсадимизни қандай амалга оширишни аниқлаб олишдан иборат. Италиялик ва хорижлик футболчилар билан қай тарзда иш олиб боришни билиб олишимиз талаб этилади.

Нишонимизда Жанлука Гаэтано бор. Лекин “Наполи” учун у жуда қадрли футболчи. Имкон топилса, биз уни мамнуният билан кутиб олардик. Лекин “Наполи”дан бу борада бирорта хабар келгани йўқ.

“Рома” ҳужумчиси Элдор Шомуродов ўзига хос ва жуда яхши сифатларга эга. Лекин у келадиган бўлса, ўз ихтиёри билан жамоамизни танлаши керак бўлади. Йўлимиз жуда машаққатли ва бу жараён кучли иштиёқни талаб этади. 

Биз 4 январда чемпионат доирасида “Ювентус”га қарши учрашувгача янги футболчиларни олишга ҳаракат қиламиз. Энг асосийси эса, бутун жамоа мавсумни давом эттиришга тайёр бўлиши керак, - деди Симон Жиаччетта.

Элдор Шомуродов “Рома”да етарли даражада ўйин амалиётига эга бўлмаяпти. Жозе Моуриньо август ойидан бери уни атиги саккиз марта майдонга туширди. Элдор шундан фақат битта учрашувни бошланғич таркибда бошлади.

Ҳозирча ҳамюртимиз ҳисобида саккизта ўйинда киритилган битта тўп бор холос. Қишки трансферлар вақтида Шомуродов бошқа жамоага ижарага ўтиши кутилмоқда. Италиянинг бир неча клублари унга иш таклиф қилишга тайёр.

Италия матбуотининг ёзишича, “Кремонезе”дан ташқари, “Монца”, “Сампдория”, “Торино”, “Болонья” қишки трансферлар вақтида “Рома” билан Шомуродов ижараси бўйича музокарага киришишга тайёр.

Демак, қишки трансферлар мавсумини диққат билан кузатамиз. Шомуродовнинг фаолиятида янги саҳифа очилиш эҳтимоли катта.

Муҳими, легионеримиз кетган тақдирда ҳам, Римни қуруқ тарк этмайди. У ўтган мавсум илк бор ўтказилган Конференциялар лигасида ғолиб чиққан ва Европадаги фаолияти давомида биринчи марта соврин эгасига айланган эди.   

Шомуродовга харидор жамоалар рўйхати эълон қилинди. Яхши клублар бор!

Футболчимиз керак бўлса, Шомуродовга алмашамиз!

Шомуродов Японияга келди!

Россия футболчилари Ўзбекистоннинг кучига қандай баҳо берди?

Шомуродов ва Абрахамдан кейин Дибала ҳам “Рома”дан кетадиган бўляпти!

Шомуродов устозини Италияга чақиряпти!