Аббосбек Файзуллаев оғир юкни елкасига оляпти!

15 декабрь, 2023, 17:35
2
Футбол

Сўнгги бир неча ой ичида Аббосбек Файзуллаевнинг фаолиятида кескин ўзгаришлар рўй бермоқда. Август ойида “Пахтакор”ни тарк этиб, Москванинг ЦСКА жамоасига ўтишдек масъулиятни қарорни қабул қилган ёш футболчимиз Россия Премьер-лигасининг ҳақиқий кашфиётига айланди.

2023_10_29_057

Россия Премьер-лигасида қишки танаффус эълон қилинди. Мутахассислар айни пайтда чемпионатнинг биринчи қисмини таҳлил қилиш билан банд.

Уларнинг аксарияти мусобақанинг энг яхши ўйинчиси, энг ёрқин кашфиёти каби меъёрлар бўйича ўйинчи танлашда Файзуллаевнинг номзодига тўхталмоқда.

Sports.uz портали ўзбекистонлик футбол ишқибозлари эътиборига россиялик экспертларнинг легионеримиз ҳақидаги фикр-мулоҳазаларини ҳавола этади.

Иван Таранов, ЦСКАнинг собиқ футболчиси:

Аббосбек Файзуллаев ўзини кўрсатяпти ва кўнчилик айнан у ҳақида гапиряпти. Аббосга офарин, деймиз. Чунки у ЦСКАнинг аксарият ўйинларида оғирликни ўз елкасига олмоқда.

Яқинда уни дунёнинг энг яхши ёш футболчиси номинациясига киритишди. Бу унинг биринчи зўр мавсуми. Дастлабки муваффақиятли мавсумида бундай йирик совринга даъвогарлар қаторига киритилиши бироз тушунарсиз.

Лекин мен унинг халқаро турнирларни қандай ўтказганини билмайман, буни кузатмаганман.

Халқаро футбол тарихи ва статистикаси федерациясида футболни яхши тушунадиган ва биладиган мутахассислар ишлайди. Улар ҳеч кимни бежизга даъвогарлар рўйхатига қўшмайди. Шундай экан, Файзуллаевнинг номи киритилдими, демак у бу совринга муносиб.

Максим Деменко, “Краснодар”, “Зенит” ва “Спартак”нинг собиқ футболчиси:

Шахсан мен Россия Премьер-лигасининг асосий кашфиёти сифатида ЦСКА футболчиси Аббосбк Файзуллаевни тан оламан. Бу йигитча, ҳоўирги ёшида ўзида жамлаган сифатлари, кўрсатаётган ўйини билан мени ҳайратга солди.

У Россия чемпионатига яхши киришиб кетди. Аббос тезкор, енгил ва ҳаракатчан. 20 ёш бўлишига қарамай, етук футболчилар учун зарур бўлган етакчилик қобилияти шундоқ кўриниб турибди.

Бу легионер жамоага яқинда келган бўлса-да, ЦСКА ўйинига жуда катта таъсир ўтказмоқда. Биз унинг ўйинларини бир неча ойдан бери кузатяпмиз ва Файзуллаевни ҳеч қайси футболчига қиёслаш ниятим йўқ.

Аббосбек жуда ақлли футболчи ва “армиячилар”нинг аксарият ҳужумчилари айнан унинг ёрдамида ташкил этилаётгани ҳам шундан.

volga (2)_1

Таъкидлаш жоизки, Аббосбек Файзуллаев 2023 йил давомида 20 ёшгача бўлган футболчилардан таркиб топган Ўзбекистон ёшлар терма жамоаси сафида Осиё чемпионати ғолиби ва мусобақанинг энг яхши футболчиси номига сазовор бўлди. Бундан ташқари, мазкур терма жамоа Аргентинада ўтказилган жаҳон чемпионатида юқори савияда ўйин кўрсатди.

Халқаро футбол тарихи ва статистикаси федерацияси Аббосбек Файзуллаевни 2023 йилнинг энг яхши ёш футболчиси номинацияси бўйича 20 ёшгача бўлган 26 футболчи номи киритилган рўйхатда қайд этди.