Файзуллаевнинг кучига Европага ўтганида баҳо берамиз!
Россия чемпионатида тўп тепган ўзбек футболи тарбияланувчилари кўп бўлган. Улар орасида Валерий Кечинов, Андрей Пятницкий, Миржалол Қосимов, Андрей Фёдоров каби ўзи ўйнаган жамоаларнинг етакчисига айланганлари ҳам бор. Бу рўйхатга қайсидир маънода Элдор Шомуродовни ҳам қўшиш мумкин.
Бироқ, Россия ном қозонган ўйинчиларимизнинг аксарияти анча тажриба тўплаб, “пишиб етилгани”дан кейин легионер мақомини олган.
Бу борада Аббосбек Файзуллаевнинг омади чопди. Ёш футболчимиз ЦСКага ўтиши билан ўзини Премьер-лигада анчадан бери ўйнаб юргандек тутяпти.
20 яшар легионеримизнинг кетма-кет иккинчи ой ЦСКАнинг энг яхши ўйинчиси бўлгани, тур рамзий терма жамоаларидан мунтазам ўрин олаётгани, учрашувларнинг энг яхши футболчисига аталган совринларни қўлга киритаётгани шундай далолат беради.
Мутахассисларнинг таъкидлашича, бугун ЦСКА ҳужум чизиғини Аббосбек Файзуллаевсиз тасаввур қилиб бўлмайди. Жамоанинг деярли барча ҳужумларини айнан ўзбек футболчиси бошлаб бермоқда. Кўп ҳолларда Аббоснинг ўйини жамоасини мураккаб вазиятлардан олиб чиқаётгани ҳам бор ҳақиқат.
Табиийки, Файзуллаев футбол жамоатчилиги томонидан кўп муҳокама қилиняпти.
Sports.uz портали Россия футболининг таниқли вакиллари легионеримиз ҳақида билдирган фикр-мулоҳазаларини ўзбекистонлик футбол ишқибозлари эътиборига ҳавола қилишда давом этади.
Александ Гришин, ЦСКА собиқ футболчиси:
Файзуллаев қишда Европага кетиб қолиши мумкинми? Буни фақат Аббоснинг агентлари ва клуб раҳбарлари билади.
Лекин бу жуда сифатли футболчи экани ва “армиячилар”нинг ўйини сезиларли даражада кучайтира олганини ҳамма тан оляпти.
Бу фойда келтираётган жуда яхши трансфер.
Вақти келиб, Худо йўлини очиб, Файзуллаев хорижнинг кучли клубига ўтиб кетса, ана ўшанда у Европада ўйнашини томоша қиламиз ва нималарга қодирлигини баҳолаймиз. Мана Головин “Монако”да яхши ўйнаяпти, ҳаммамиз уни энг кучли легионеримиз, деб мақтаяпмиз.
Файзуллаев ЦСКАнинг энг яхши трансферими? Жамоага қўшаётган ҳиссаси шундай эканини кўрсатмоқда. Бу ўйинчи мунтазам бошланғич таркибда ўйнаяпти, ўзи гол урди ва жамоадошларига голли паслар узатишда давом этяпти.
Роман Бабаев, ЦСКА бош директори:
Клубимизнинг скаутларимиз Аббосбек Файзуллаевни узоқ вақт давомида кузатди ва унинг майдонда ноодатий қарорлар қабул қилиши, ёш бўлишига қарамай, анча етук ўйин намойиш қилаётгани ва етакчилик қобилияти юқори эканини тасдиқлашди.
Ана шундай ўйинчини трансфер қилиш имконияти пайдо бўлганида, вазиятдан қўлдан бой бермай, бундан фойдаланиб қолдик.
Евгений Бушманов, Росия ёшлар терма жамоаси собиқ бош мураббийи:
Ўтган тур қаҳрамонини аниқлаш сўралганда, Аббос Файзуллаевни танладим. “Нижний Новгород”га қарши жуда фаол ўйнади ва иккита голда бевосита иштирок этди. Менга бу ярим ҳимоячи роса ёқади.
Айниқса, интеллекти ва техникаси маъқул келяпти. Эндигина 20 ёшга тўлганига қарамай, майдонда жуда ақлли қарорлар қабул қиляпти. Кутилмаган ҳаракатлар билан вазиятдан чиқиб кетади. Қўшимчасига, жуда меҳнаткаш. Россия Премьер-лигасида бунақа футболчилар бармоқ билан санарли даражада кам.
Фикрлар