Ҳимоячи легионеримиз пешқадамга гол уришни кўрсатиб қўйди!

Россия Премьер-лигаси жамоаларининг бир неча ой давом этган қишки танаффусдан кейин 2024 йилдаги илк учрашувлари чемпионатнинг 19-турига тўғри келди.

Энг қизиқарли ўйинлардан бири мусобақа пешқадами “Краснодар” ва ўтган мавсум якунларига кўра, Премьер лигага йўлланма олган “Рубин” жамоалари ўртасида кечди.

Учрашувга мезбонлик қилган "Краснодар" биринчи бўлимда нигериялик легионер Олакунле Олусегуннинг аниқ зарбаси эвазига ҳисобни очди. Бироқ бу жамоага ўйинни ғалаба тугатиш насиб қилмади. 90-дақиқада “Рубин”нинг ўзбекистонлик легионери Рустамжон Ашурматов боши билан дарвоза тўрини ишғол қилиб, жамоасини мағлубиятдан қутқариб қолди – 1:1.

Ушбу баҳсдан кейин ўйин қаҳрамони Рустам Ашурматов интервью берди.

- Гол урилган комбинация олдиндан тайёрланганмиди? Уни машқ қилганмисизлар?

- Ҳар бир учрашувдан олдин стандарт вазиятлар бўйича ишлаймиз, шунинг учун бу вазиятга тайёр эдим. Тўғриси, биз гол уришга яқинлашиб қолгандик. Агар мен тўп киритмаганимда буни бошқа ўйинчи амалга оширарди.

- Кадрлар йўқотилишини инобатга олганда, бу очко қанчалик муҳим?

- Жуда қадрли. “Краснодар” чемпионат пешқадами, шунинг учун ҳам очко олиш муҳим эди.

- Режалаштирилганларнинг ҳаммаси амалга ошдими?

- Умуман олганда, ҳа. Бош мураббий сўраганларини ҳаммасини бажаришга ҳаракат қилдик. Бироқ, бош мураббий бизга яна нималар бажарилди, қайсилари қолиб кетганини яна таҳлил қилиб беради.

- Жамоада кайфият қандай? Худди ғалаба қозонгандекми?

- Ҳа. Албатта, бу учрашувда ғолиб чиқишимиз ҳам мумкин эди, бироқ дуранг ҳам адолатли натижа. Кайфият яхши.

- Мавсумнинг қолган қисмида жамоа олдида қандай вазифа бор?

- Биринчи даврада биз чемпионатни яхши даражада бошлай олмадик, кейин кўтарила бошлади. Шундай экан, энг асосийси – шу даражамизни ушлаб қолиш ва янада юқорироққа кўтарилишга ҳаракат қиламиз.

- “Рубин” бу таркиб билан курашишга қодирми?

- Албатта. Янги футбочилар келди, шундан келиб чиқиб, ҳамма нарсага кучимиз етади.

Таъкидлаш жоизки, бунгача Ўзбекистон ва Жанубий Корея чемпионатларида катта тажриба тўплаган марказий ҳимоячи “Рубин” сафига ўтган йилнинг январь ойида кўчиб ўтган. Ўшанда қозонликлар биринчи лигада ўйнарди ва мавсум якунида Премьер-лигага чиқди.

Рустам Ашурматов биринчи лигада бешта учрашувда қатнашиб, битта тўп киритган эди. “Краснодар” дарвозасига урилган гол легионеримиз учун Премьер-лигадаги дебют гол бўлди. Бунинг учун Рустамга тўққизта ўйин кифоя қилди.

Файзуллаевга эркинлик беринг!

Файзуллаевни 60 миллион евролик юлдузга тенглаштиришди

Легионеримиз Европа Чемпионлар лигасида порлашни кўзлаяпти

Ўзбек футболчилари легионерга айланишга тайёр