Ҳусанов жамоасига яхши хабарлар кела бошлади!

Ўзбекистон миллий терма жамоаси марказий ҳимоячиси Абдуқодир Ҳусанов Англия Премьер-лигаси иштирокчиси “Манчестер Сити” футболчиси эканини инобатга олиб, sports.uz портали ушбу клуб лагерига тегишли янгиликларни ўзбекистонлик футбол ишқибозлари эътиборига ҳақола қилишда давом этади.

“Манчестер Сити”ни Чемпионлар лигаси кутмоқда

УЕФА таснифидаги халқаро турнирлардан бири – Европа лигаси финалчилари аниқланиши билан қитъанинг энг нуфузли мусобақаси – Чемпионлар лигасида Англия Премьер-лигасидан олтита жамоа иштирок этиши тасдиқланди.

Биринчидан, Европа кубокларининг жорий мавсум учун умумий рейтингида Англия энди иккинчи ўриндан пастга тушмайди ва бу келаси мавсумда Премьер-лигадан тўртта эмас, бешта жамоа Чемпионлар лигасида қатнашишини таъминлайди.

Англия чемпионатида бешинчи ўринни эгаллаган жамоа келаси мавсум Чемпионлар лигасининг саралаш босқичида иштирок этади.

Иккинчидан, Европа лигасининг финалига Англиянинг икки клуби – “Манчестер Юнайтед” ва “Тоттенхэм” чиқди. Бу жамоалардан қай бири халқаро кубокни қўлга киритса, янги мавсумда Чемпионлар лигасининг умумий гуруҳ босқичида қатнашади. Бу жамоалар учун Премьер-лига ўйинлари анча оғир кечмоқда ва улар чемпионат орқали “кўхна қитъа”нинг энг катта турнирига чиқиш имкониятидан мосуво бўлиб улгурган. Ягона йўл – Европа лигасида ғолиб чиқиш қолди.

Таъкидлаш лозимки, Абдуқодир Ҳусанов ўйнаётган “Манчестер Сити” жорий мавсум учун асосий мақсади Европа Чемпионлар лигасига йўлланма олишдан иборат.  Ҳозирча, Гардиола шогирдлари учинчи поғонада бормоқда.

Англия Чемпионлар лигасига жами олтита йўлланмани нақд қилгани "шаҳарликлар"нинг мусобақада иштирок этиш имкониятини сезиларли даражада оширади. 

 Холанд жамоага ёрдам беришга тайёр

“Манчестер Сити”нинг кейинги йиллардаги энг зўр тўпурари Эрлинг Холанд март ойининг охирида жароҳат олиб, бир ой давомида даволанишига тўғри келган эди.

Норвегиялик ҳужумчи энди учрашувларда жамоасига ёрдам беришга тайёр эканини таъкидлади.

- Жароҳат олиш – даҳшатнинг ўзгинаси, лекин нима ҳам қила олардик! Тезроқ оёққа туриб, спорт формасини тиклаб олишга ҳаракат қилиш лозим.

Ҳозир кучга тўлганман. Ўзимни жуда яхши ҳис қиляпман ва ҳаракатларимда ҳеч қандай қийинчилик қолгани йўқ, - деди Эрлинг Холанд.

24 ёшли форвард жорий мавсум давомида барча турнирларда қирқта ўйин ўтказиб, рақиблар дарвозасини ўттиз маротаба ишғол қилган ва жамоадошларига тўртта голли пас узатган.

Кевин де Брюйне “Сити”га содиқ қолади

“Манчестер Сити”га бош мураббий Хосеп Гвардиоладан бир йил олдин келган Кевин де Брюйне жорий мавсум якунланиши билан клубни тарк этиши расман эълон қилинган.

“Шаҳарликлар” сафида ўн йилдан бери ўйнаб келаётган плеймейкерга Европа, Саудия Арабистони ва АҚШдан жиддий чорловлар бўляпти. Шу билан бирга Англия Премьер-лигасининг бир неча клублари келаси ой 34 ёшга тўладиган ўйинчини ҳамкорликка чақиряпти.

Transfer News Live манбасининг маълум қилишича, Кевин де Брюйне Англия клубларига ўтиш вариантини кўриб чиқмайдиган бўлди.

Айни пайтда бу ўйинчи Италия А Сериясининг энг қудратли клубларидан ҳисобланган “Наполи”га кўчиб ўтиш вариантини ўрганиб чиқяпти. Неаполликлар ҳам машҳур футболчи билан алоқа ўрнатилганини тасдиқлади.

Шомуродов мухлисларига янги хушхабар!

“Рома” Шомуродов бўйича муҳим қарорга келди!

Ҳусанов жамоаси қарорини ўзгартириши кутиляпти

Бу ишни ўзбек футболчилари зўр эплайди

Шомуродов “Рома”нинг “топ-5”даги тарихий рекордини таъминлаб берди!