Тезкор: ФИФА Элдор Шомуродов учун “Рома”дан пул ундирди
Россия Премьер-лигаси вакили “Ростов” жамоани 2020 йили тарк этган Элдор Шомуродов учун “Рома”дан пул оладиган бўлди.
Ростовликлар шу йилнинг сентябрь ойида ФИФА трибуналига мурожаат қилиб, Италиянинг “Рома” клуби Элдор Шомуродов трансфери учун белгиланган маблағни бермаётгани учун шикоят аризаси киритган эди.
Гап шундаки, “Ростов” ўзбек ҳужумчисини “Женоа”га трансфер қилганида келишув шартномасига кейинги трансферлан 15 фоиз улуш олиши тўғрисида банд киритган. “Женоа”дан Шомуродовни трансфер қилган “Рома” ана шу маблағни тўламай келаётган эди.
Масалани пухта ўрганиб чиққан ФИФА мутасаддилари “Ростов” клубининг даъвосини қаноатлантириб, Рим жамоасига тўловни амалга ошириш мағбуриятини қўйди.
“Ростов” клуби ўз расмий сайтида клубнинг даъво аризаси ФИФА томонидан кўриб чиқилгани ва тўлиқ қаноатлантирганини расман эълон қилди.
Ўзбекистонда “Машъал” ва “Бунёдкор” жамоалари шарафини ҳимоя қилган Элдор Шомуродов Россия Премьер-лигасига 2017 йили йўл олган.
Ҳужумчимиз “Ростов” жамоаси сафига қўшилиб, бу жамоа сафида уч йил тўп тепди. Бу муддат ичида Элдор жами 91 та ўйинда қатнашиб, рақиблар дарвозасини 18 маротаба ишғол қилди ва жамоадошларига 12 та голли пас узатди.
2020 йилнинг 1 октябрида Италиянинг энг қадимги жамоаси – “Женоаси” ўзбек форвардини трансфер қилди. Италияликлар трансфер учун 7,5 миллион евро ва турли бонуслар тўлади. Ушбу жамоа сафидаги дебют мавсумида ўз ҳисобига саккизта гол ёздириб қўйган Элдор 2021 йилнинг ёзида “Рома” футболчисига айланди.
Рим клуби бош мураббий Жозе Моуриньо талаби билан Шомуродовни 17,5 миллион еврога трансфер қилди. Бу ўзбек футболчилари учун рекорд кўрсаткич ҳисобланади. Ҳали Ўзбекистон футболи тарихида ҳеч қайси ўйинчимиз бу қадар қиммат нархга трансфер қилинмаган.
Мутахассисларнинг таъкидлашича, “Ростов” Шомуродовнинг “Женоа”дан “Рома”га трансферидан умумий ҳисобда 1,5 миллион евро улуш олиши керак эди.
Энди пойтахт клуби “Ростов” ғазнасига белгиланган тартибда пул тушириб беради.
“Ростов”га ҳамон фойда келтираётган Элдор Шомуродовнинг ўзи ижара асосида “Кальяри”да тўп тепмоқда. Сардинияликлар легионеримизни бир миллион евро эвазига бир мавсум учун ижарага олган.
Агар ўзбекистонлик ўйинчининг ҳаракатлари “Кальяри” мутасаддиларига маъқул келса, уларда Шомуродовни яна 9 миллион евро тўлаб, тўлиқ трансфер қилиш ҳуқуқи бор.
Ҳозирча, 28 ёшли Элдор Шомуродов “Кальяри” сафида А Серияда 13 маротаба майдонга тушиб, жамоадошларига бир жуфт голли пас оширди.
Фикрлар