Улар ҳали Шомуродовни унутгани йўқ!
Италия А Сериясида 27-тур учрашувлари давом этмоқда. Жозе Моуриньо бошқарувидаги “Рома” футболчилари бугун Тошкент вақти билан 22:00 да “Специя” меҳмони бўлади. Ҳозирча, “бўрилар” 26 та баҳсда 41 очко тўплаб, мусобақа жадвалининг саккизинчи поғонасида бормоқда.
“Специя”нинг ишлари ва натижалари ҳавас қилгулик эмас. Бу жамоа вакиллари 26 та ўйинда 26 очко жамғарган холос. Шу боис, мухлису мутахассисларнинг аксарияти бугунги баҳсда римликларнинг қўли баланд келишига ишонч билдирган.
Sports.uz портали ушбу учрашувга доир фактларни эътиборингизга ҳавола қилади.
Чемпионатда “Рома” бу рақибга ютқазмаган
“Рома” футболчилари А Серияда “Специя” билан уч маротаба тўқнаш келган. Бу кўпроқ специяликлар аввал асосан қуйи лигаларда фаолият юритгани билан боғлиқ. “Специя” ўтган мавсумда ўз майдонида 2:2 ҳисобида дуранг қайд этган эди. Римликлар “Олимпико”даги ўйинларда 4:3, ва 2:0 ҳисобида устун келган.
Бурчак зарбасидан 10 та гол
“Рома” бурчак зарбаларидан гол уриш бўйича лига етакчиси ҳисобланади. Моуриньо шогирдлари тўп бурчакдан ўйинга киритилганидан кейин рақиблар дарвозасини ўн маротаба ишғол қилгани статистикаларда ўз аксини топган.
Римликларнинг мағлубиятсиз серияси
“Рома” беш турдан бери мағлуб бўлмаяпти. Шулардан иккитасида “Кальяри” ва “Эмполи”ни енгган бўлса, “Женоа”, “Сассуоло” ва “Верона” билан очко бўлишди.
Истеъдодли ёшлар
Ҳар икки жамоа таркибида янги асрда туғилган ва ўз номига гол ёздириб қўйган ўйинчилар бор. “Специя” сафида бу словакиялик Давид Стрелец бўлса, “Рома”да Кристиан Вольпато, Феликс Афена-Гьян ва Эдуардо Бове ўз ҳисобига гол ёздирган.
Ўзаро учрашувлардаги тўпурар жамоадан кетган
“Рома” таркибида “Специя”га қарши энг кўп гол урган футболчи Борха Майораль ҳисобланади. Ўтган мавсумда испаниялик ҳужумчи дубль қайд этиб, жамоасининг 4:3 ҳисобидаги ғалабасини таъминлаган эди. Айни пайтда, Майораль Испания чемпионати вакили “Хетафе” жамоасига жўнатилган.
Мхитарян гол урган майдон
“Рома” плеймейкери Генрих Мхитарян сафар учрашувларидаги охирги голи ўтган чемпионатда айнан “Специя” дарвозасига киритган эди. Шундан кейин арманистонлик ярим ҳимоячи ўз ҳисобига учта аниқ зарба расмийлаштирди. Бироқ, бу голларнинг бари “Олимпико”да киритилди.
Мхитарян энг сермаҳсул
Генрих Мхитарян гол+пас тизими бўйича барқарор кўрсаткичга эга. Жорий мавсумда учта гол ва бешта ассистни амалга оширган ўйинчи яна иккита самарали ҳаракатни амалга оширса, кетма-кет учинчи мавсум ҳам камида 10 балл тўплаган бўлади.
Моуриньо буни биттадан уддалаган
Жозе Моуриньо “Специя”га қарши биринчи учрашувдаёқ ғалаба қозонган мураббий ҳисобланади. Жорий чемпионатнинг биринчи даврасида римликлар “Специя”ни 2:0 ҳисобида таслим қилган эди.
Устоз ва шогирд тўқнашуви
“Специя” бош мураббийи Тьягу Мотта футболчилик даврида “Интер”да Жозе Моуриньо қўл остида тўп сурган. Биринчи даврада у устози қарши бош мураббий сифатида майдонга ўз жамоасини бошлаб тушди. Ўзаро рақобатда устоз кучлилик қилди.
Икки футболчи юзлик довонга яқин
“Рома”нинг икки футболчиси тез орада юзлик довонни забт этади. Ҳозирча, Николо Дзаньоло ҳисобида 97 та ўйин бор. Рик Карсдорп эса “бўрилар” сафида 92 маротаба майдонга тушган.
Шомуродов бу жамоага гол урган
Элдор Шомуродов А Сериядаги биринчи мавсумида “Женоа” сафида “Специя” дарвозасини ишғол қилган. Ўша учрашувда генуяликлар ҳамюртимиз ёрдамида 2:0 ҳисобида зафар қучган эди. Шомуродов коронавирусдан даволаниб, яна машғулотларга қайтгани ҳақида хабарлар тарқатилди. Бўлажак баҳсда ҳамюртимиз захирадан майдонга тушиши кутилмоқда.
Комментарии