Husanovdan oʻtolmagan yulduz “Chelsi”ni tashlab, “Barsa”ga ketadigan boʻldi
Футбол жамоатчилиги Англия кубоги финалида “Манчестер Сити” марказий ҳимоячиси Абдуқодир Ҳусанов ва “Челси” ҳужумчиси Жоао Педро ўртасидаги рақобатнинг гувоҳи бўлди.
Ўзаро баҳсда устунлик қилган ўзбек ҳимоячиси бразилиялик юлдузга гол уриш имконини бермади. Сўнгги маълумотларга қараганда, Жоао Педро келаси мавсум олдидан Лондонни тарк этишга қарор қилган.
Mundo Deportivo нашрининг хабар беришича, “Челси”дан кетишга тайёргарлик кўраётган Жоао Педро ёзда “Барселона”га ўтиш имкониятидан мамнуният билан фойдаланишга тайёр.
“Барселона” мавсум якунланганидан кейин клуб билан хайрлашадиган Роберт Левандовскининг ўрнини босадиган футболчи қидираётгани сабабли Жоао Педрони трансфер қилишга қизиқиш билдирган.
Жоао Педро жорий мавсумда “Челси”нинг энг яхши ўйинчиларидан бири бўлди ва ҳатто Лиам Розеньор бош мураббий бўлган қийин даврда ҳам юқори савияда ўйнашда давом этди.
Mundo Deportivo маълумотига кўра, 24 ёшли бразизиялик юлдуз ўзига Каталония суперклуби қизиқаётганидан хабардор ва ёзда “Камп Ноу”га кўчиб ўтишга қарши эмас.
Таъкидланишича, Педро доимо “Барселона”га алоҳида меҳр билан қараган, чунки у болалигида Роналдиньо ва Неймар каби бразилиялик юлдузларнинг Испания гранди сафидаги ўйинларини кузатиб улғайган.
Жоао Педро катта турнирларда соврин ютиш, Европа Чемпионлар лигасида ўйнашни жуда хоҳламоқда, аммо “Челси”да бу мақсадларини амалга ошира олмайди. Хусусан, Англия кубоги финалида лондонликлар “Манчестер Сити”га ютқазганидан кейин Жоао педро ҳам мавсумни ҳеч қандай совринсиз якунлашга мажбур бўлмоқда. Бу ҳолат ҳам ҳужумчининг бошқа кучлироқ клубга ўтишига туртки бўляпти.
Бироқ Mundo Deportivo маълумотига кўра, “Челси” ўз ўйинчисини “Барселона”га осонликча бериб қўймайди, “аристократлар” бу савдодан камида 100 миллион евро ишлаб олишни мўлжаллаяпти.
Маълум қилинишича, “Барселона” ўтган ой Жоао Педро билан дастлабки алоқаларни ўрнатган, аммо ўша вақтда футболчи мавсумни муваффақиятли якунлаш ва Бразилия терма жамоасининг жаҳон чемпионати таркибидан жой олишга эътибор қаратиб, музокараларни ривожлантирмаган эди.
Аввалроқ, “Ливерпуль” афсонаси Жейми Каррагер Жоао Педро ҳақида фикр билдириб, унинг даражасидаги ҳужумчи муаммоалар гирдобидан чиқа олмаётган “Челси”да узоқ қолмаслигини таъкидлаган эди.
Fikrlar