Shomurodov va Fayzullaevdan keyin o‘zbek futbolchilariga e’tibor qaratishni tavsiya qilishdi
O‘zbekistonlik futbol ishqibozlari yaxshi tanish bo‘lgan Shamil Gazizov Rossiya Premer-ligasida porlayotgan Abbosbek Fayzullaev haqida fikr bildirdi.
Bu mutaxassis yana bir iste’dod egasi – Oston O‘runovning “Ufa” va keyinchalik “Spartak” klublariga transferini tashkil qilgan edi. Uning rejasiga ko‘ra, O‘runov ham xuddi Fayzullaev singari Rossiya maydonlarida porlashi, keyin esa, Evropaning kuchli ligalariga o‘tishi kerak edi. Biroq amalda unday bo‘lib chiqmadi. Turli sabablarga ko‘ra, O‘runov Rossiyani tark etib, ortga qaytishga majbur bo‘ldi.
Shamil Gazizov ayni paytda Mahachqal’aning “Dinamo” klubi bosh direktori vazifasida faoliyat ko‘rsatmoqda. Bu mutaxassis O‘zbekiston futboliga e’tibor qaratish lozim, degan fikrni ilgari suryapti.
Sports.uz portali Shamil Gazizovning intervyusini o‘zbekistonlik futbol muxlislari e’tiboriga havola etadi.
— Fayzullaevning Rossiya Premer-ligasidagi debyuti muvaffaqiyatli chiqqanidan hayratlandingizmi?
— Yo‘q. Chunki bu futbolchida avvaldan qobiliyat bor edi.
— Bu gapingiz bilan TsSKA yashirinib yotgan olmosni topdi, degan gaplarga qo‘shilmaysizmi?
— Futbolda olmoslar ko‘p. Eng yaxshisi ularni topib, yaxshilab ishlov berilsa, ular brilliantga aylanadi. TsSKA murabbiylar shtabi bu ishni uddaladi. Ofarin.
Lekin Abbosbek Fayzullaevning iqtidorli futbolchi ekani hech kimga sir emasdi.
— Keyingi yillarda O‘zbekistondan kelgan futbolchilarning aksariyati Rossiya Premer-liasida o‘zini ko‘rsatmoqda. Ilgari Eldor Shomurodov bor edi. Hozir Abbosbek Fayzullaev porlayapti. O‘zbekiston Rossiya Premer-ligasi uchun istiqbolli bozormi?
— Ha, men ham shu fikrlaman. O‘zbekistonda futbol juda yaxshi rivojlanyapti.
Agar turli yoshdagi terma jamoalarning natijalariga e’tibor qaratsak, hammasi oydinlashadi. Hozir o‘zbeklarning futboli tez ko‘tarilyapti.
Abbosbek Fayzullaev avgust oyida “Paxtakor”dan Moskvaning TsSKA klubiga ko‘chib o‘tgan edi. 20 yoshli hujumkor futbolchimiz Rossiya Premer-ligasi va mamlakat kubogi doirasida jami 18 ta uchrashuvda qatnashib, ikkita gol va to‘qqizta assist qayd etdi.
Mutaxassislar tomonidan mavsumning asosiy kashfiyoti sifatida e’tirof etilgan legionerimiz TsSKAning sentyabr, oktyabr, noyabr va dekabr oylaridagi eng yaxshi futbolchisi, deb topildi.
Fayzullaevning muvaffaqiyatli o‘yinlari tufayli transfer summasi bir necha baravar oshgani qayd etildi. Transfermarkt portalida ayni paytda Abbosbekning transfer narxi 4 milion evro ekani ko‘rsatilgan.
Fikrlar