"Milan derbisi"dagi eng yaxshi 5 to‘purar

20 noyabr, 2016, 20:53
0
Futbol

21 noyabr kuni Italiya chempionatining 13-turining markaziy o‘yinida "Milan" va "Inter" jamoalari to‘qnash kelishadi. Shu bois, biz sizning hukmingizga mazkur jamoalar o‘rtasidagi o‘yinlarda eng ko‘p gol urgan 5 futbolchi haqida ma’lumot berib o‘tishni joiz deb topdik.

5. Enriko Kandiani - 10 gol
Kandiani 1937-1946 yillarda "Inter" tarkibida 71 ta gol urgan bo‘lsa, 1949-1950 yillarda "Milan" uchun 8 ta golga mualliflik qilgan. U "Milan derbisi"da har ikki jamoa libosida umumiy hisobda 10 ta golga mualliflik qilgan.

4. Ishtvan Niers - 11 gol
Niers "Inter" jamoasi uchun 1948-1954 yillar mobaynida A ceriyada 133 ta gol urgan. Ishtvan ana shu gollarning 11 tasini "neradzurri"larning ashaddiy raqibi hisoblanadigan "Milan" darvozasiga kiritgan.

3. Gunnar Nordal - 11 gol
Nordal 1949-1956 yillar davomida "Milan" jamoasi uchun 210 ta gol kiritgan. Shvetsiyalik hujumchi ana shu gollarning 11 tasini Milan derbisida nishonlagan. Gunnar besh bora A ceriya to‘purari uchun atalgan sovrinni qo‘lga kiritganini alohida ta’kidlab o‘tmoq joiz.

2. Juzeppe Meatstsa - 12 gol
Meatstsa har ikki jamoa tarkibida ham harakat qilgan. U 1927-1940 va 1946-1947 yillari "Inter" jamoasi uchun 284 gol urgan bo‘lsa, 1940-1942 yillari esa "Milan" klubi uchun 11 ta to‘p kiritgan. Juzeppe derbilarda o‘z nomini 12 marta tabloga yozdirib qo‘yishga muvaffaq bo‘lgan.

1. Andrey Shevchenko - 14 gol
Milan derbilarida eng ko‘p gol urgan futbolchi Shevchenkodir. Ukrainalik hujumchi 1999-2006 yillarda "rossoneri"lar raqiblari posbonlarini 175 marta ranjitgan. Sheva chempionatda 8, kubok va evrokuboklarda 3 martadan "Inter" darvozasini aniq nishonga olgan.

Furqat Yusupov tayyorladi