Чемпионлар лигаси ғолиби Файзуллаевга эътибор қаратди

Аббосбек Файзуллаев ўзбек футболининг энг ёрқин тарбияланувчиларидан ҳисобланарди. Бир йил муқаддам уни юртимизда ҳам кўпчилик яхши танимас эди. Катта футболга қадам қўйиши билан ўз салоҳиятини намойиш эта олган Файзуллаев ўзбек футболида ўз ўрнини топиб бормоқда.

Файзуллаев август ойида “Пахтакор”дан Москванинг ЦСКА клубига кўчиб ўтганидан кейин Россиядаги футбол жамоатчилиги эътиборини ўзига қарата олди. 20 ёшли легионеримиз жуда қисқа фурсат – икки-уч ойда мураккаб лиганинг энг зўр ўйинчилари қаторига қўшилди.

Айни пайтда Аббосбек Файзуллаев Россия футболида энг кўп муҳокама қилинаётган ўйинчилардан бири ҳисобланади.

Sports.uz  портали ўзбекистонлик мухлислар эътиборига россиялик футбол экспертларининг Аббосбек Файзуллаев ҳақидаги фикр-мулоҳазаларини ҳавола қилишда давом этади.

Дмитрий Аленичев, “Локомотив”, “Спартак”, “Порту” собиқ футболчиси, Европа Лигаси ва Чемпионлар лигаси ғолиби:

Чемпионатдаги плюслар ҳақида гапирсам, менга Файзуллаев жуда ёқди. Бу ЦСКА учун жуда зўр трансфер.  Пиняев барқарор бўлмаса ҳам иқтидорли ўйинчи. Тюкавин ва Сперцянни ҳам мавсум кашфиётлари дейиш мумкин. Бу ўйинчилар ўз иқтидорини намойиш қилишда давом этса, Евопанинг кучли лигаларига ўтиш имконияти бор.

Константин Алексеев, журналист:

Аббос Файзуллаев – тезкор оёқ ҳаракатлари ва мунтазам ўткир ҳужумлар, дегани. Бошида мослашиш учун жуда кам вақт сарфлади ва йил охирига бориб, 20 ёшли ўзбек ҳаммасини жойига солди. Охирги саккизта учрашувда 1+8 балл. Аббос кутилмаганда ЦСКАнинг ҳақиқий етакчисига айланди.

Денис Попов, ЦСКАнинг собиқ футболчиси

Аббосбек Файзуллаев – ёш ва истиқболи порлоқ йигит. Ҳеч ким уни танимас эди, лекин Премьер-лигага келиб, зўр футболчи эканини кўрсата олди.

Савияси юқори жамоалар ва футболчиларни ўртамиёналардан қайси жиҳатлар ажратиб туришини биласизми? Уларнинг қай даражада узоқ муддат юқори савияда ўйнай олиш қобилияти ажратиб туради.

Бошида рақиблар уларга жиддий эътибор қаратмаслиги мумкин, лекин кейинчалик вазият тубдан ўзгаради.

Келаси йилдан майдонда Файзуллаевга умуман бошқача муносабат бўлади. Унинг ўйинига рақиб томондан индивидуал ёндашув бўлади.  Бундан буёғига Аббос фаолиятида тубдан бурилиш ясайдиган ва кўп нарсага ойдинлик киритиладиган давр бошланади.

Агар Файзуллаев ана шу синовларда матонат билан енгиб ўтса, унда буюк футболчи бўлиш имконияти юзага келади.

Валерий Масалитин, ЦСКА собиқ футболчиси:

Бугунги кунда Файзуллаев ЦСКАнинг энг зўр ўйинчиси. У “армиячилар” ҳужум чизиғида энг фойдали футболчи. Аббосбекнинг келажаги қандай бўлиши номаълум. Агар у ҳақиқатан ақлли футболчи бўлса, ривожланишда, ўсишда давом этади.

Аббосбек Файзуллаев ЦСКА сафида барча турнирларда 18 та учрашув ўтказиб, иккита гол ва тўққизта ассист муаллифи бўлди. Бугунги кунда истеъдодли футболчимизнинг трансфер суммаси 4 миллион еврони ташкил қиляпти.

Файзуллаевга Европадан эътибор бўлди

Одил Аҳмедов: Это′О эски келишмовчилик туфайли Роберто Карлосни жамоадан олиб ташлаган эди...

Ўзбекистонда Европада ўйнай оладиган футболчилар бор...