Файзуллаевдан янгилик кутяпмиз...
Аббосбек Файзуллаев қисқа фурсат ичида Россия Премьер-лигасидаги энг машҳур ўзбек футболчисига айланди.
Россия футболидаги аксарият ҳолларда Аббос ҳақида фикр билдиришига тўғри келяпти. Айни пайтда Файзуллаев машҳурлик борасида уч йил муқаддам “Ростов”дан Италиянинг энг қадимий клуби “Женоа”га кўчиб ўтгани анча шов-шув бўлган Элдор Шомуродовдан қолишаётгани йўқ.
Россия Премьер-лигасининг биринчи давраси якунланди. Бу гал чемпионлик ва совринли ўринлар учун кураш ҳар қачонгидан қизғин кечадиган кўринади. Мутахассислар биринчи давра бўйича ўз фикрлари билан ўртоқлашмоқда.
Sports.uz портали россиялик футбол мутахассисларининг Аббосбек Файзуллае в ҳақидаги мулоҳазалари мухлислар эътиборига ҳавола этади.
Вячеслав Колосков, Россия футбол иттифоқи фахрий президенти:
Бу мавсум ҳали ҳеч қайси жамоа мени ҳайратга солгани йўқ. Чемпионат бошланишидан олдинги тахминлар амалга ошмоқда. Аввалдан биринчи ўрин учун “Зенит”, “Краснодар”, ЦСКА ва “Динамо” жамоалари курашиши кутилганди. Краснодарликлар ва питерликларнинг таркиби жуда яхши шаклланган. Уларнинг етакчи қилаётгани шунга боғлиқ.
Аббосбек Файзуллаев ЦСКАга қўшилиб кетди. Лекин уни ҳозир “Зенит”даги бразилияликлардан зўр, деб бўлмайди. Файзуллаев “армиячилар” ҳужумига шиддат қўйди, бу футболчи ЦСКА учун ҳақиқий топилма. Биз бразилияликлар нимага қодирлигини биламиз, бироқ Аббосдан янгилик кутамиз.
Юрий Сёмин, Россия терма жамоаси ва “Локомотив” собиқ бош мураббийи:
Жорий мавсумнинг биринчи даврасида энг асосий кашфиёт ким бўлди? Шахсан менга Аббосбек Файзуллаев чемпионатнинг биринчи қисмида қандай ўйнагани жуда ёқди.
Бу футболчининг келажаги порлоқ. Файзуллаев жуда ақлли ўйинчи.
Владимир Гранат, Россия терма жамоаси собиқ футболчиси:
Тюкавин жорий мавсумни тўлиқ бир маромда ўтказаётгани йўқ. У биринчи давра бошида ва охирида яхши ўйнади.
Аббосбек Файзуллаевнинг чемпионат биринчи ярми охирига бориб ўйини очилиб кетди. Шунингдек, “Краснодар” қанот ҳимоячиси Волковни ҳам яхши ўйнаганини таъкидлаш лозим. Бу футболчи мавсум бошидан бери ёрқин ва барқарор зйин кўрсатяпти.
Эслатиб ўтамиз, 20 ёшли Аббосбек Файзуллаев “Пахтакор” сафидан ЦСКАга август ойида кўчиб ўтган эди. Легионеримиз қисқа фурсат ичида “армиячилар”нинг асосий ўйинчиларидан бирига айланди.
Файзуллаев сентябрь ва октябрь ойларида ЦСКВАнинг энг яхши ўйинчиси сифатида эътироф этилди. Шунингдек, “Крилья Советов”, “Спартак” ва “Рубин”га қарши ўтказилган учрашувларнинг энг яхши футболчиси бўлди.
Фикрлар