Ҳусанов қачон майдонга қайтишининг аниқ санаси эълон қилинди!

“Манчестер Сити” Премьер-лиганинг бешинчи турида “Арсенал” билан кечган марказий учрашувда ғалабани қўлдан чиқариш билан бир қаторда Абдуқодир Ҳусанов ва Эрлинг Холанднинг жароҳати олиши қўшилиб кетди.

Шу тариқа, Хосеп Гвардиола бу мавсум бошида ҳам жароҳатлар билан боғлиқ муаммоларга дуч келди ва таркиб танлашда яна таваккал қилишига тўғри келмоқда.

Sports.uz портали “Манчестер Сити” фаолиятини ёритиб келаётган нуфузли манбаларда бири – mancitynews.com сайти эксперти Дэвид Талли аниқлаган жамоа ўйинчиларининг қачон сафга қайтиши ҳақидаги маълумотларни ўқувчилар эътиборига ҳавола этади.

Эрлинг Холанд

“Манчестер Сити” бош мураббийи Хосеп Гвардиола Эрлинг Холанд “Арсенал”га қарши баҳсда белидан жароҳат олганини тасдиқлади. Ҳужумчи иккинчи бўлимда ўрнини Нико Гонсалесга бўшатиб беришига тўғри келган эди.

Бош мураббий  норвегиялик тўпурар тикланиб олганига қарамай, охирги машғулотларда иштирок этмаганини маълум қилди. Бироқ Холанд  “Бёрнли” билан бўладиган навбатдаги тур учрашувида сафда бўлади.

Холанднинг майдонга қайтиш санаси – 27 сентябрь, “Бёрнли”га қарши уй учрашуви.

Абдуқодир Ҳусанов

Яқинда жароҳатидан қутилган ўзбек футболчиси “Арсенал” билан бўлган учрашувнинг танаффусида мажбуран захирага олинган эди. Гвардиола Абдуқодир навбатдаги учта учрашувни ўтказиб юборишига тўғри келишини таъкидлади.

“Эмирейтс”даги баҳсда рақиб футболчиси Ҳусановнинг оёғини босиб олди. Жароҳатланган ҳимоячи октябрь ойининг бошигача даволанишига тўғри келади.

Ҳусановнинг майдонга қайтиш санаси – 5 октябрь, “Брентфорд”га қарши сафар учрашуви.

Умар Мармуш

Моҳир ҳужумчи сентябь ойидаги халқаро танаффус вақтида Миср терма жамоаси сафида Буркина-Фасога қарши ўтказилган ўйиннинг бошида тиззасидан жароҳат олган эди.

Бир неча ҳафтадан бери даволанаётган форвард октябрь ойининг бошида саломатлигини тўлиқ тиклаб олиши кутиляпти.

Умар Мармушнинг майдонга қайтиш санаси – 5 октябрь, “Брентфорд”га қарши сафар учрашуви.

Райан Айт-Нури

Ёзда трансфер қилинган чап қанот ҳимоячиси “Брайтон”га қарши ўтказилган учрашувда жароҳат олганидан бери ўйинларда иштирок эта олмаяпти. Аслида Райаннинг жароҳати иккинчи турдан ўрин олган “Тоттенхэм” билан баҳсда безовта қилган эди. Бироқ  мураббийлар уни майдонга туширишга қарор қилгани хато бўлиб чиқди.

Айт-Нурининг даволаниш муддати бироз чўзилади ва кейинги халқаро танаффусгача унинг хизматидан фойдаланишнинг имкони бўлмайди.

Райан Айт-Нурининг майдонга қайтиш санаси – 18 октябрь, “Эвертон”га қарши уй учрашуви.

Райан Шерки

Ёзда харид қилинган яна бир истеъдод соҳиби август ойининг охирида сонини шикастлаб олган эди. Ҳужумкор футболчининг тикланиш муддати икки ой давом этиши айтилган.

Бу Шерки октябрь ойининг охири ёки ноябрнинг бошигача жамоага ёрдам бера олмаслигини англатади.

Райан Шеркининг майдонга қайтиш санаси – 2 ноябрь, “Борнмут”га қарши уй учрашуви.

Матео Ковачич

Хорватиялик футболчи июнь ойининг бошида жароҳатини операция қилдирган эди. Ўшанда тажрибали ярим ҳимоячи сентябрь ойи охири ёки октябрь бошида сафга қайтиши таъкидланган эди.

Хосеп Гвардиола яқинда Ковачич тез орада майдонга тушишга тайёр бўлишини айтди. Матео машғулотларни бошлаб юборган.

Матео Ковачичнинг қачон майдонга қайтиши ҳозирча ноаниқ бўлиб турибди.

Кэлвин Филлипс

Асосий таркибга кириш учун курашаётган тажрибали ярим ҳимоячи иккинчи фарзанди дунёга келиши муносабати билан охирги машғулотларни ўтказиб юборди. Аммо Пеп Гвардиола Кэлвин тез орада умумий гуруҳ машғулотларига қўшилишга тайёрлигини маълум қилди.

- Нима бўлишини кўрамиз. Кэлвин жароҳатини операция қилдириб, саломатлигини тиклаб олди. Бироқ у бир нечта машғулотда қатнашиб, спорт формасини кўтариши керак, - деди Хосеп Гвардиола.

Кэлвин Филлипснинг қачон майдонга қайтиши ҳозирча ноаниқ бўлиб турибди.

 

Фанатлар Ҳусановдан мўъжиза кутяпти!

“Сити” Ҳусановсиз ўйнашни ўрганиши керак

Энди Ҳусанов ҳам, Холанд ҳам ўйнамайди!

Ҳусанов – энг катта йўқотиш!

Бизга Ҳусанов етишмади! “Сити” фанатлари Ҳусанов ҳақида яна нималар деяпти?

Туркияни “ёндираётган” Шомуродовни Италияда қўмсаб қолишди!

Ҳусанов ва Холанднинг йўли айрилиши мумкин...