“Navbahor”ga kelishi aytilgan O‘runov qaysi jamoada o‘ynaydi?
Mamlakatimizning eng iste’dodli futbolchilaridan bo‘lgan Oston O‘runov faoliyatidagi mavhumlik hali to‘la barham topgani yo‘q. Transfer huquqi “Spartak” klubiga tegishli bo‘lgan va moskvaliklar bilan shartnomasi 2025 yilning yarmigacha davom etadigan hamyurtimiz ayni paytda mavsumning ikkinchi yarmiga “Ufa” tarkibida tayyorlanmoqda.
Boshqirdiston jamoasi qishki o‘quv-mashg‘ulot yig‘inini Turkiyada o‘tayotganidan ko‘pchilikning xabari bor.
Sports.uz nashri o‘z manbalariga tayanib, Oston O‘runov faoliyatini “Navbahor”da davom ettirishi mumkinligi haqida xabar bergan edi.
Rossiyaning eng nufuzli agentligi – RATA TASS o‘zbekistonlik legioner Oston O‘runovning faoliyati borasidagi masalaga oydinlik kiritish uchun “Ufa” bosh direktori Shamil Gazizovga murojaat qiladi.
Ma’lumki, huquqiy jihatdan “Spartak”ga tegishli bo‘lgan o‘zbek legioneri uchinchi marotaba “Ufa”ga olib kelindi. Dastlab 2020 yilning boshida “Lokomotiv”dan ufaliklar tarkibiga qo‘shilgan iqtidorli yarim himoyachi o‘sha yilning yozida “Spartak”ga transfer qilingandi.
Keyinchalik “Spartak” boshqaruvidagi o‘zgarishlar oqibatida, ya’ni uni poytaxt klubiga transfer qilishda bosh rolni o‘ynagan Shamil Gazizov “ Spartak” bosh direktorligidan bo‘shatilganidan keyin O‘runov yarim mavsumga “Ufa”ga ijaraga berildi.
Nihoyat, Oston uchinchi bor joriy mavsum avvalida ufaliklar tomonidan chempionat oxirigacha ijaraga olindi. Bu gal Boshqirdiston klubida o‘zbek futbolchisini transfer qilish huquqi va ma’lum miqdorda o‘yin o‘tkazgan taqdirni uni xarid qilish majburiyati ham bor. Har ikki holatda ham “Ufa” moskvaliklarga 1 million evro to‘lashiga to‘g‘ri keladi.
“Ufa” bosh direktori O‘amil Gazizov nufuzli axborot agentligi so‘roviga javob berar ekan, klub hali Oston O‘runovdan voz kechmaganini ma’lum qildi. Avvalroq, “Ufa” o‘zbek legionerining transferini sotib olish huquqidan foydalanmasligi haqida ham xabarlar tarqatilgan edi.
- O‘runov masalasi bo‘yicha qarorni mavsum oxirida qabul qiladigan bo‘ldik. Uning mavsumning birinchi yarmidagi o‘yinlariga izoh bermayman. Chempionatni yakunlab olsak, keyin uyog‘i yanada oydinlashadi, - dedi Shamil Gazizov.
“Ufa” bosh direktorining gaplaridan Oston O‘runov mavsumning ikkinchi yarmini hozirgi jamoasida boshlashini anglash mumkin. Rossiyada transfer oynasi hali davom etishini inobatga olib, keyinchalik biror o‘zgarish bo‘lib qolish ehtimoli ham yo‘q emas.
Oston O‘runov joriy mavsumda Rossiya premer-ligasida etti marta maydonga tushib, biror samarali harakatni amalga oshirgani yo‘q. Aksincha, ikki marta sariq kartochka bilan jazolandi. “Ufa” hamyurtimizni transfer qilish imkonini saqlab qolishi uchun birinchi navbatda premer-ligadan tushib ketmasligi shart. Hozir bu klub musobaqa jadvalida 18-turdan so‘ng 16 ochko bilan 15-o‘rinda qayd etilgan.
“Ufa” qishki tanaffusdan so‘ng birinchi uchrashuvini 27 fevral kuni “Axmat” jamoasi maydonida o‘tkazadi.
Eslatib o‘tamiz, “Paxtakor” tarbiyalanuvchisi bo‘lgan Oston O‘runov professional futbolchi sifatida “Navbahor”da shakllangan. Iste’dodli yarim himoyachi 2017-2019 yillar davomida namanganliklar safida jami 51 ta uchrashuvda qatnashib, o‘z hisobiga uchta to‘p yozdirib qo‘ygan.
O‘runov keyinchalik Toshkentning “Lokomotiv” jamoasiga ko‘chib o‘tgan edi.
Fikrlar