Ўрунов майдонга қайтмоқда. У тиббий кўрикдан муваффақиятли ўтди!
“Спартак”даги легионеримиз Остон Ўрунов мавсумни премьер-лигада ўтказадиган бўлди. Бунгача 20 ёшли ярим ҳимоячининг фаолиятида мавҳумлик бор эди.
“Спартак”ни қабул қилиб олган янги бош мураббийи Руй Витория ҳам ўзбекистонлик футболчига ишонч билдирмаслигини маълум қилиб, уни мавсумолди йиғинларига чақирмади. Москваликлар футболчимизни премьер-лига қайдномасига киритмади.
“Спартак” клуби раҳбарияти агар ўзбекистонлик футболчига харидор чиқмаса, уни Миллий футбол лигасида ўйнаётган иккинчи жамоага юборишга қарор қилганди.
Остон Ўруновга пойтахт жамоасида ишлари юришмай турган пайтда ҳам харидор чиққан. “Спартак” қишда уни олмоқчи бўлган “Рубин”дан олти миллион евро, ёзда трансферни расмийлаштиришга ҳаракат қилган “Уфа”дан уч миллион евро талаб қилди ва харидорлар бу суммани тўлашга рози бўлмади.
Шунингдек, ёзда Венгрия грандларидан “Ференцварош” истеъдодли ярим ҳимоячини ўз сафига чорлагани, бироқ Остон Ўрунов ва унинг манфаатини ҳимоя қилаётган мутахассислар венгриялик билан маош борасида келиша олмагани ҳақида хабарлар тарқатилди.
Ниҳоят, Россияда чемпионат ўйинлари бошланиб кетган бир паллада Остон Ўрунов фаолиятини премьер-лигада давом эттириши ҳал бўлди. Бу гал ҳам ҳамюртимизни “Уфа” ўз сафига қўшиб олади.
Россия оммавий ахборот воситалари Остон Ўрунов “Уфа” таркибига қўшилишдан олдин анъанавий тиббий кўрикдан муваффақиятли ўтган. Тез орада легионеримиз уфаликлар билан шартнома имзолаши кутилмоқда. Маълумотларга қараганда, “Уфа” Ўруновни яна ижарага оладиган бўлди. Ҳозирча келишувнинг молиявий томонлари ошкор қилинмаяпти.
Бу Остон Ўруновнинг “Уфа”га учинчи марта келиши бўлади. Дастлаб, “Уфа” ҳамюртимизни 2020 йилнинг февралида Тошкентнинг “Локомотив” жамоасидан трансфер қилган эди. Премьер-лигадаги дастлабки ўнта учрашувини юқори савияда ўтказган футболчимизга Россиянинг етакчи клублари оғиз солди.
Ўрунов ўзини Россия футболига олиб кирган Шамиль Газизов маслаҳатига кўра, “Спартак” таклифини қабул қилиб, беш йиллик шартномага имзо чекди. Премьер-лига ва мамлакат кубогида “Спартак” учун 9 та ўйин ўтказиб, битта гол урган Остонга етарлича имкон берилмади.
Ўруновнинг қишки трансферлар вақтида “Уфа” ижарага олди. Бироқ, “Спартак”га ўтганидан бери кетма-кет жароҳатга йўлиқаётган футболчимиз “Уфа”даги иккинчи уринишида ҳам ўзидан кутилган ўйинни намойиш қила олмади.
Мана энди Остон учинчи бор “Уфа”да ўз омадини синаб кўради. Бу галги уриниш Ўрунов учун муваффақиятли бўлишига умид қиламиз. У ўз фаолиятини қутқариш учун аввалгидек ўзига ишонган ҳолда, сермазмун ва фойдали ўйин кўрсатиши лозим.
Tрасферларга ихтисослашган transfermarkt портали Остон Ўруновни 1,2 миллион еврога баҳоламоқда.
“Уфа” премьер-лиганинг тўртинчи туридан сўнг, биттадан ғалаба ва дуранг эвазига тўрт очко жамғариб, мусобақа жадвалининг 11-поғонасида бормоқда.
Фикрлар
Futbolga qiziqvotganla xammasi biladi nimala bo'votganini kegan joyidan dovomqilila iltimos