Шомуродов, Холанд, Обамеянг ҳаммаси бирга. Уларга ё Салоҳ ёки Мане қўшилади!
2022 йилнинг кузида Қатарда тўрт йилликнинг энг нуфузли футбол турнири – жаҳон чемпионати ўтказилади. Мусобақада қатнашадиган 32 та терма жамоанинг учдан икки қисми мундиал йўлланмасини ҳал қилиб бўлди.
Барча қитъаларда қолган ўринлар учун кураш давом этмоқда.
Хориж матбуоти жаҳон чемпионатида қатнашиш имконини қўлдан бой берган терма жамоаларнинг ёрқин футболчилари номига ойдинлик киритди. Бу ўйинчиларнинг ҳар бири ҳар қандай турнирни безашга лойиқ. Мундиалга бормайдиган юлдузлар орасида Элдор Шомуродовнинг ҳам номини кўришимиз мумкин.
Ҳаммаси ҳақида батафсил:
Эрлинг Холанд ва Мартин Эдегор
Замонамизнинг энг моҳир тўпурарларидан ҳисобланган Эрлинг Холанд Норвегия терма жамоасига ёрдам бера олмади. Моҳир ҳужумчи саралаш ўйинларининг учдан иккисини жароҳат туфайли ўтказиб юборди.
Норвегияликларнинг яна бир юлдузи Мартин Эдегор ўнта ўйинда бирорта самарали кўрсаткич қайд этгани йўқ. Натижада Норвегия терма жамоаси Нидерландия ва Туркияни кейинги босқичга ўтказиб юборди.
Ян Облак
Энг зўр дарвозабонлардан Ян Облак ҳеч қачон катта турнирда ўз юрти терма жамоаси дарвозасини қўриқламаган. 2010 йилги жаҳон чемпионатида биринчи рақам эгаси Самир Ханданович эди. Шундан бери словенияликлар бирор марта мундиалнинг финал босқичига чиқа олмади.
Давид Алаба
Давид Алаба Европа Чемпионатлари ҳавосидан баҳра олган бўлсада, Австрия терма жамоасига жаҳон чемпионатига чиқиш насиб қилмай келмоқда. Бу гал ўтиш учрашувларида Давид Алаба, Марсель Зебитцер ва Марко Арнаутович кабиюлдузларни Гарет Бэйл дубли билан мундиалсиз қолдирди.
Италия терма жамоаси
Европанинг амалдаги чемпиони – Италия терма жамоасининг бутун таркиби юлдузлардан иборат. Уларнинг ҳар бири алоҳида тилга олмасдан, бутун бир жамоани омадсизлар сафига қўшиб қўйиш мумкин.
Айниқса, Доннарумма, Бонуччи, Кьеллини, Жоржиньо, Барелла, Верратти, Кьеза, Иммобиле, Инсинье каби юлдузлардан таркиб топган терма жамоанинг ўтиш плей-оффида ўз уйида Шимолий Македониядан сўнгги дақиқалардан мағлуб бўлгани жуда аламли бўлди.
Патрик Шик
Сўнгги Европа чемпионатининг энг зўр тўпурарини мундиалда кўрмаймиз. Патрик жароҳати туфайли Швецияга қарши ўтказилган ўтиш учрашувида терма жамоасига ёрдам бера олмади. Натижада Златан Иброҳимович издошлари чемпионатга чиқиш учун юришини давом эттиради.
Патрик Шик жуда яхши спорт формасида эди. У бундеслигада 20 та учрашувда 20 та гол урганди. Нима ҳам дердик, насиб қилмаган экан.
Эдин Жеко
“Рома”дан кетганидан кейин “Интер”да ҳам пораётган Эдин Жеко ўзи сардорлик қилаётган Босния ва Герцеговина терма жамоасини мундиалга олиб чиқолмади. Моҳир тўпурар саралаш турнирида фақатгина бир марта рақиб дарвозасига йўл топди холос.
Шунингдек, Миралим Пьяничнинг ўзининг бир жуфт голи билан терма жамоага айтарли фойда келтира олгани йўқ.
Уларнинг ёшини инобатга олсак, кейинги жаҳон чемпионатида ҳам кўрмасак керак.
Генрих Мхитарян
“Рома” плеймейкери ўйнамаган саралаш учрашувидаги дастлабки учта учрашувида Арманистон терма жамоаси кетма-кет ғалаба қозонди. Генрих сафга қўшилганидан кейин арманлар тўртта ўйинда ютқазди ва уч марта дуранг қайд этиб, гуруҳда қолиб кетди.
Мхитаряннинг ўзи Арманистон миллий терма жамоасидаги фаолиятини якунлаганини эълон қилди.
Себастьян Аллер
Бўлажак мундиалда Себастьян Аллер ҳам ўйнамайди. “Аякс”да тинимсиз тўп киритаётган футболчи Кот-Д’Ивуарни мундиалга олиб чиқолмади. Жорий мавсумда амстердамликлар учун учун 33 та гол урган ҳужумчи терма жамоада атиги икки бор ўзини кўрсатди.
Пьер-Эмерик Обамеянг
Айни пайтда “Барселона” тўпурарлик маҳоратини намойиш этаётган Обамеянг ҳам ўз фаолиятидаги сўнгги мундиалга чиқа олмади. “Арсенал”дан кетишига мажбур қилган интизомсизлигини терма жамоада ҳам кўрсатди. Натижада мураббийлар штаби уни Африка Миллатлари кубогига ҳам чақиргани йўқ.
Наби Кейта
“Ливерпуль” ярим ҳимоячиси Наби Кейта ҳам гвинеяликлар билан чемпионатни ўз уйида томоша қиладиган бўлди. Гвинея терма жамоасининг машур ўйинчилари – “Клермон” ҳужумчиси Муҳаммад Байо, “Рома” ярим ҳимоячиси Амаду Диавар, “Локомотив”дан Франсуа Камано ва Поль Погбанинг акаси Флорентен ҳам Қатарга бормайди.
Элдор Шомуродов
Осиёдаги терма жамоалар ўртасида энг катта йўқотиш Ўзбекистон миллий терма жамоаси ҳисобланмоқда. Бу гал футболчиларимиз саралашни анча аввал – иккинчи босқичдаёқ муваффақиятсиз якунлади.
Элдор Шомуродов квалификацияда еттита гол урган бўлса-да, унинг уринишлари терма жамоамизни орзулар сари етаклашга етмади.
Муҳаммад Салоҳ ва Садио Мане
Қўшимчасига “Ливерпуль” юлдузлари Муҳаммад Салоҳ ва Садио Мане саралаш ўйинларида бир-бирига тўқнаш келган. Биринчи учрашувда мисрликлар Сенегални кичик ҳисобда енгди. Жавоб ўйинидан кейин улардан бири бир неча юлдузлар билан бирга ўз уйида қолади.
Фикрлар