Шомуродов голли серияни давом эттириши керак!
А Серияда чемпионлик масаласи муддатидан олдин “Интер” фойдасига ҳал бўлган эса-да, қолган жамоаларнинг ҳар бири ўз мақсадига яраша имкон борича кўпроқ очко ишлаб олишга ҳаракат қилмоқда. Бу чемпионат якунини кескин ва муросасиз ўтишини таъминлаяпти.
Ўзбекистонлик футбол мухлислари эътиборида турган учрашувда “Женоа” ўз майдонида “Сассуоло”ни қабул қилади.
35-тур учрашувида ҳар икки жамоа ҳам фақат ғалаба учун ҳаракат қилиши тайин. Гарчи “Женоа” хавфли зонадан беш очколик фарқ билан узоқроқда жойлашгандек кўринсада, мавсумнинг ҳал қилувчи палласида вазият исталган пайтда ўзгариб кетиши мумкин.
Генуяликлар охирги олтита учрашувдан фақат биттасида очко йўқотмади холос. Шу боис, Давиде Баллардини шогирдлари лигадаги ўрнини кафолатлаш ва хотиржам бўлиш учун қолган тўртта учрашувда ижобий кўрсаткич қайд этиши керак.
“Сассуоло” айни пайтда “Женоа”дан ҳар томонлама кучли. Бу клуб бешта учрашувдан бери енгилмаяпти. Роберто Де Дзерби шогирдлари ана шу баҳсларда “Беневенто”, “Фиорентина”, “Милан”, “Сампидория”ни мағлуб этди, “Аталанта” билан тўқнашувдагина очко бўлишишга рози бўлди. Бу натижалар 53 очко жамғарган “Сассуоло”ни саккизинчи ўринга кўтарди. Роберто Де Дзерби энди шогирдларидан Европа Лигаси йўлланмасини берадиган кучли еттиликка киришни талаб этмоқда.
36 очко билан 13-поғонани эгаллаб турган “Женоа” уй жамоаси ҳисобланади. Генуяликлар ўз майдонидаги кетма-кет 11 та учрашувдан бери мағлубиятга учрамай келмоқда. “Сассуоло” шу пайтгача “Женоа” майдонида еттита ўйин ўтказиб, фақат бир марта ғалаба қозонган.
Умуман олганда эса, “Женоа” ва “Сассуоло” ўзаро 15 маротаба куч синашган. Генуяликлар шу баҳслардан бештасида зафар қучган, уч маротаба дуранг ўйнаб, етти марта имкониятни бой берган. Тўплар нисбати ҳам шунга яраша бу галги меҳмонлар фойдасига – 28:19.
Таъкидлаш жоизки, “Сассуоло”нинг энг кучли томони худди “Женоа” каби ҳужум чизиғи ҳисобланади. 22 та учрашувда 11 та гол урган Франческо Капуто жароҳатидан фориғ бўлиб, сафга қайтди. Доменико Берарди эса, охирги тўртта беллашувда тўртта тўп киритиб, голлари сонини 15 тага етказиб олди. Меҳмонлар таркибида икки ҳимоячи – жароҳатланган Филиппо Романья ва дисквалификацияси бор Марлон жамоадошларига ёрдам бера олмайди.
“Женоа” таркибида жароҳатланганлар кўпроқ. Жамоа сардори ва етакчиси Доменико Кришито, Лука Пеллегрини ва Давиде Бираски жароҳати боис майдонга тушмайди.
Бизни қизиқтираётган масала Элдор Шомуродовнинг майдонга тушиши. Ҳамюртимиз кейинги пайтда анча фаол ўйнаяпти. Ўзбек легионери кетма-кет икки учрашувдан бери майдонни голсиз тарк этмаяпти. У қайд этаётган кўрсаткичларга ишонган ҳолда ҳужумчимиз “Сассуоло”га қарши баҳсда қатнашишидан умидвормиз.
Бундан ташқари, Шомуродов бир маротаба “Сассуоло” дарвозасини ишғол қилишни уддалаган эди. Биринчи давра ўйинида рақиб майдонидаги беллашувда Элдорнинг аниқ зарбаси “Женоа”ни мағлубиятдан қутқара олмаганди.
Умуман олганда эса, Элдор А Серияда бешта гол ва иккита голли пас муаллифи бўлди. Ҳамюртимиз дебют мавсумида “Парма”, “Сассуоло”, “Верона”, “Сеция” ва “Лацио” дарвозаларини ишғол қилди. Шомуродов гол урган ўйинларда генуяликлар тўрт очкони қўлга киритди.
“Женоа” ва “Сассуоло” ўртасидаги баҳс 9 май куни Тошкент вақти билан 15:30 да бошланади.
“Луижи Феррарис” стадиони мезбонлик қиладиган учрашувни Маурицио Мариани бошчилигидаги ҳакамлар бригадаси бошқаради.
Комментарии