Шомуродов нега ҳеч бошланғич таркибга киритилмади? “Интер”га қарши ўйиндачи?

Италия А Сериясининг иккинчи тур учрашувларини Сардиниядаги “Кальяри” ва “Интер” ўртасидаги беллашув якунлаб беради.

Юқори дивизионга қайтган “Кальяри” футболчилари Unipol Domus аренасида чемпионатдаги илк ўйинини ўтказади. 16 мингдан зиёд мухлисни сиғдира оладиган стадионда аншлаг бўлиши маълум қилинди. Барча чипталар сотиб бўлинган.

Рақиб жиддий – ўтган мавсумни учинчи ўринда якунлаган ва ундан аввалги йили скудеттони қўлга киритган “Интер”.

“Кальяри” бош мураббийи Клаудио Раньери кучли рақибга қарши қандай таркибни майдонга тушириш ҳақида бош қотирмоқда.

- Ҳар бир мураббий рақибни синчковлик билан ўрганади. Ўз ўйинчиларини жамоа мослашган усулда тўп тепишга ҳамда бу орқали рақибнинг имкониятларини чеклашга йўналтиришга ҳаракат қилади. Бизни нима куттб турганини яхши биламиз. “Интер” сўнгги ўн тўртта ўйинидан фақат иккитасида мағлуб бўлган холос, - деди Клаудио Раньери.

“Кальяри” фаолиятини ёритиб келаётган L'Unione Sarda газетаси журналистлари Клаудио Раньерининг бўлажак ўйинга тузган режасининг бир қисмини ошкор қилди. Унга кўра, тажрибали мутахассис бошланғич таркибда янги ўйинчилар – Якуб Янкто ва Элдор Шомуродовни ўйнатмоқчи эмас. Мураббийлар штаби бу икки ўйинчининг жисмоний ҳолатини хавф остига қўйишни истамаётгани таъкидланди.

Чехиялик ярим ҳимоячи мушагини шикастлаб олган ва оғриқлардан азият чекаётган эди. Ҳозирча унинг ҳолати тўлиқ тиклангани йўқ.

Элдор Шомуродов жамоага қўшилишдан олдин жисмоний тайёргарликни ўтамаган. У узоқ муддатли таътилдан тўғри Сардинияга келган. Буни легионернинг ўзи ҳам тан олган.

Ўзбек ҳужумчиси ҳали спорт формасини тўлиқ тиклаб олишга улгурмагани ҳақида бир неча марта ёзилди. Шу боис, Клаудио Раньери Шомуродовни кубок ўйинида ҳам, А Сериянинг илк турида ҳам бир неча дақиқага майдонга туширди холос.

Яна бир нуфузли манба – https://www.cagliarinews24.com сайтининг ёзишича, Клаудио Раньери катта мақсадлар билан олиб келинган Якуб Янкто ва Элдор Шомуродов хизматидан иккинчи бўлим давомида зарурат туғилган ҳолатда фойдаланишни режалаштирмоқда.

Шунга қарамай, Клаудио Раньери жамоа таркибидан кўнгли тўлганини ва ўз шогирдларига ишончи юқори эканини очиқ айтди.

- Мен жамоам жуда яхши, деб ҳисоблайман. Трансфер бозорида осон бўлмади, лекин биз ўзимиз истаган ўйинчиларни қўлга кирита олдик. Клубга олиб келинганларнинг ҳаммаси менинг тасдиғимдан ўтган, - деди Клаудио Раньери.

“Кальяри” жамоаси “Интер” билан турли мусобақалар доирасида жами 96 маротаба тўқнаш келган. Табиийки, устунлик миланликлар томонида. “Интер” ўзаро учрашувларда 49 марта ғалаба қозонган. Сардинияликлар 16 та баҳсни ўз фойдасига ҳал қилган. Яна 31 та ўйинда кучлар тенг келиб, ғолиб аниқланмаган. Тўплар нисбати 176:99 кўринишида “Интер” фойдасига.

“Кальяри” ва “Интер” ўртасидаги иккинчи тур ўйини 28 август куни Тошкент вақти билан 23:45 да Unipol Domus аренасида бошланади.

Легионерларимиз олдига бошқа клубга ўтиб, даромад келтириш вазифаси қўйилди

Файзуллаев ЦСКА уни қандай топганини айтиб берди

Машҳур футболчи: Ўғлим Шомуродовга мухлислик қиляпти!

Россия учун Ўзбекистон терма жамоаси билан ўйнаш қизиқ!

Тўрт футболчимиз дунёнинг энг қиммат лигаларида тўп тепмоқда!