TsSKA kutilmaganda Fayzullaevga xushxabar aytdi!
Abbosbek Fayzullaevga Evropaning kuchli ligalaridan jiddiy qiziqish bo‘layotgani TsSKA rahbariyatini xavotirga solib qo‘ydi.
Xususan, 21 yoshli hujumkor futbolchimizga o‘zi qiziqadigan Ispaniya chempionatidan “Real Sosedad” e’tibor qaratgan bo‘lsa, jahon futboliga Kilian Mbappedek yulduzni tarbiyalab bergan “Monako” legionerimiz uchun yanvarda 15 million evro tikishga tayyorligini bildirgani xabar qilindi.
Rossiya futboli ekspertlari bu qiziqish fonida Abbosbek Fayzullaevga Evropaga ketishni tavsiya qilmoqda. Ular o‘zbekistonlik iste’dod egasi kuchli ligalarda o‘ynab keta olishini ta’kidlayapti.
- “Monako”ning Fayzullaevga qiziqish bildirayotganining o‘zi yaxshi natija. Bu masalani faqat TsSKA rahbariyati va Abbosning o‘zi hal qilishi mumkin.
Fayzullaev TsSKA hujum chizig‘i etakchisi, shuning uchun ham “Monako”ga o‘tishga loyiq. Abbos 2024 yildagi Osiyoning eng yaxshi yosh futbolchisi sovrinini bejizga qo‘lga kiritgani yo‘q, - dedi TsSKAning sobiq futbolchisi Aleksandr Grishin.
Fayzullaev “armiyachilar” uchun muhim futbolchi. TsSKA rahbariyati uni Evropaga qo‘yib yuborishga shoshilmayapti. Jamoa o‘yinini ushlab turgan Abbosni ushlab qolish uchun unga yangi shartnoma beriladigan bo‘ldi.
Aslida Moskva klubi 2023 yilning avgustida Abbosbek Fayzullaevni transfer qilganida “Paxtakor” hisobiga 500 ming evro tushum bo‘lgan. Hozirgi kunda transfermarkt.world portalida Abbosning transfer narxi 6 million evroga etgani qayd etilgan. Biroq amalda bu Fayzullaevni oladigan klub ko‘proq pul to‘lashiga to‘g‘ri keladi.
Transfer amalga oshgan paytda Fayzullaevning klub bilan imzolagan shaxsiy shartnomasi moliyaviy nuqtai nazardan ancha “engil” tuzilgan. Rossiyaning Sashsport sayti yaqindagina futbolchimiz bitimga ko‘ra, yiliga 110 ming evro maosh olayotganini ma’lum qildi. Bu summa ko‘pchilikni hayron qoldirdi. Odatda, Rossiya futbolida oyiga 10 ming evroga etmagan maosh asosiy tarkib etakchilari uchun arzimagan moyana hisoblanadi.
Endi TsSKA o‘yinchini qadrlay boshladi. Moskvaliklar 2026 yilning yozigacha imzolangan amaldagi shartnomani yangilashga urinyapti. Bir jihatdan Abbosning TsSKAda uzoq muddatga qolishi ta’minlansa, ikkinchi tomondan, hamyurtimizning maoshi sezilarli darajada ko‘tariladi. Chunki maosh o‘yinga yarasha bo‘lishi kerak.
Eslatib o‘tamiz, Abbosbek Fayzullaev TsSKAga ko‘chib o‘tganidan beri barcha turnirlarda 54 ta uchrashuvda maydonga tushib, sakkizta gol va 20 ta assist muallifi bo‘ldi.
Shuningdek, Abbosbek Fayzullaev O‘zbekiston milliy terma jamoasida ham etakchi o‘yinchilar qatoriga qo‘shilib oldi. Iste’dodli futbolchimiz bosh jamoamiz tarkibida xalqaro miqyosda 23 ta uchrashuvda ishtirok etib, raqiblar darvozasini etti marotaba ishg‘ol qilgan.
Husanovning transferiga qarshi chiqishmoqda!
Ana xolos: Kutilmaganda Shomurodovning yo‘li ochildi!
Fayzullaevga “Monako” qiziqayotganiga munosabat bildirildi!
Fikrlar