ЦСКА кутилмаганда Файзуллаевга хушхабар айтди!
Аббосбек Файзуллаевга Европанинг кучли лигаларидан жиддий қизиқиш бўлаётгани ЦСКА раҳбариятини хавотирга солиб қўйди.
Хусусан, 21 ёшли ҳужумкор футболчимизга ўзи қизиқадиган Испания чемпионатидан “Реал Сосьедад” эътибор қаратган бўлса, жаҳон футболига Килиан Мбаппедек юлдузни тарбиялаб берган “Монако” легионеримиз учун январда 15 миллион евро тикишга тайёрлигини билдиргани хабар қилинди.
Россия футболи экспертлари бу қизиқиш фонида Аббосбек Файзуллаевга Европага кетишни тавсия қилмоқда. Улар ўзбекистонлик истеъдод эгаси кучли лигаларда ўйнаб кета олишини таъкидлаяпти.
- “Монако”нинг Файзуллаевга қизиқиш билдираётганининг ўзи яхши натижа. Бу масалани фақат ЦСКА раҳбарияти ва Аббоснинг ўзи ҳал қилиши мумкин.
Файзуллаев ЦСКА ҳужум чизиғи етакчиси, шунинг учун ҳам “Монако”га ўтишга лойиқ. Аббос 2024 йилдаги Осиёнинг энг яхши ёш футболчиси совринини бежизга қўлга киритгани йўқ, - деди ЦСКАнинг собиқ футболчиси Александр Гришин.
Файзуллаев “армиячилар” учун муҳим футболчи. ЦСКА раҳбарияти уни Европага қўйиб юборишга шошилмаяпти. Жамоа ўйинини ушлаб турган Аббосни ушлаб қолиш учун унга янги шартнома бериладиган бўлди.
Аслида Москва клуби 2023 йилнинг августида Аббосбек Файзуллаевни трансфер қилганида “Пахтакор” ҳисобига 500 минг евро тушум бўлган. Ҳозирги кунда transfermarkt.world порталида Аббоснинг трансфер нархи 6 миллион еврога етгани қайд этилган. Бироқ амалда бу Файзуллаевни оладиган клуб кўпроқ пул тўлашига тўғри келади.
Трансфер амалга ошган пайтда Файзуллаевнинг клуб билан имзолаган шахсий шартномаси молиявий нуқтаи назардан анча “енгил” тузилган. Россиянинг Сashsport сайти яқиндагина футболчимиз битимга кўра, йилига 110 минг евро маош олаётганини маълум қилди. Бу сумма кўпчиликни ҳайрон қолдирди. Одатда, Россия футболида ойига 10 минг еврога етмаган маош асосий таркиб етакчилари учун арзимаган мояна ҳисобланади.
Энди ЦСКА ўйинчини қадрлай бошлади. Москваликлар 2026 йилнинг ёзигача имзоланган амалдаги шартномани янгилашга уриняпти. Бир жиҳатдан Аббоснинг ЦСКАда узоқ муддатга қолиши таъминланса, иккинчи томондан, ҳамюртимизнинг маоши сезиларли даражада кўтарилади. Чунки маош ўйинга яраша бўлиши керак.
Эслатиб ўтамиз, Аббосбек Файзуллаев ЦСКАга кўчиб ўтганидан бери барча турнирларда 54 та учрашувда майдонга тушиб, саккизта гол ва 20 та ассист муаллифи бўлди.
Шунингдек, Аббосбек Файзуллаев Ўзбекистон миллий терма жамоасида ҳам етакчи ўйинчилар қаторига қўшилиб олди. Истеъдодли футболчимиз бош жамоамиз таркибида халқаро миқёсда 23 та учрашувда иштирок этиб, рақиблар дарвозасини етти маротаба ишғол қилган.
Ҳусановнинг трансферига қарши чиқишмоқда!
Ана холос: Кутилмаганда Шомуродовнинг йўли очилди!
Файзуллаевга “Монако” қизиқаётганига муносабат билдирилди!
Фикрлар