Умаровнинг қадрига етмаган БАТЭ кетма-кет қоқилмоқда!

Бугунги кунда БАТЭ Беларусь чемпионатининг энг қудратли жамоаси сифатида мамлакат чемпионлигига асосий даъвогар саналади.

Ўзбекистонлик футбол ишқибозлари ўтган йилдан бери бу жамоага мухлислик қилиб келаётган эди. Чунки борисовликлар катта умидлар билан ўз таркибига ҳамюртимиз Шаҳбоз Умаровни қўшиб олганди.

Легионер сифатида дастлабки мавсумини “Энергетик-БГУ”да ўтказган ва жами 30 та учрашувда иштирок этиб, учта гол ва тўртта ассист муаллифи бўлган Шаҳбоз Умаров БАТЭга ўтганидан кейин ҳам йўқолиб қолгани йўқ.

Бир неча позицияда ўйнай оладиган, кучли зарбага эга, жарима зарбалари устаси, курашувчан ҳужумкор футболчимиз қисқа фурсатда жамоанинг ҳақиқий етакчисига айлана олди. БАТЭ аксарият ғалабали ўйинларини айнан ўзбек легионери ташкил қилганини мутахассислар бир неча бор эътироф этган.

2022 йилги янги мавсумда Беларусь футболига, хусусан, БАТЭ ўйин услубига тўлиқ мослашиб олган Умаров жамоа катта марралар сари етаклаши кутилганди. БАТЭ раҳбарияти жамоанинг асосий активи ҳисобланган ҳамюртимизни кучлироқ лигаларга трансфер қилиш орқали клуб бюджетини тўлдириб олишни кўзлагани бор гап.

Лекин мавсумолди йиғинидаги биргина назорат учрашуви ҳаммасини барбод қилди. Аниқроғи, илгари профессионал футболчилар билан ишламаган ва асосан ёшлар таркибини тайёрлаган Александр Михайловнинг БАТЭга бош мураббий қилиб тайинланиши ва унинг машҳур ўйинчилар билан мулоқот ўрната олмаслиги панд берди дейиш мумкин.

Ўша назорат ўйинида Александр Михайлов чиройли ўйнашга ҳаракат қилган Шаҳбозга икки бор қаттиқ танбеҳ берди. Танбеҳ бериш жараёнида ўйинчига нисбатан ҳақоратли сўзлар ишлатди. Ўзини ҳурмат қилган Умаров майдонни сўроқсиз тарк этди.

Кейинчалик Михайлов Умаровни умуман қайдномага ҳам киритмади. Охир оқибат Шаҳбоз жамоадан кетди. Яқинда Қозоғистон премьер-лигаси вакили “Ордабаси” футболчимизни мавсум охиригача ижарага олди.

Аввалига БАТЭ ўтган мавсумдани инерция ҳисобига кетма-кет ғалабаларга эришди. Мавсумнинг муҳим палласига келганда эса Александр Михайловнинг шогирдлари панд бера бошлади. БАТЭ 15-турда ўз майдонида чемпионат аутсайдери “Арсенал-Дзержинск” футболчиларига 1:2 ҳисобида ютқазди. Бунгача Михайлов жамоаси асосий рақобатчилари  “Энергетик-БГУ” ва “Минск” билан ўйинда ҳам очко йўқотганди.

Беларуслик мутахассислар БАТЭга жамоани ортидан эргаштирадиган етакчи етишмаётганини таъкидламоқда. Бу вазифани айнан Шаҳбоз Умаров бажариши керак эди. Демак, легионеримиздан воз кечган мураббийлар штаби ярим йилда ҳам унинг ўрнини боса оладиган ўйинчи топа олмаган.

Чемпионат ярмига келиб, икки жамоа – “Энергетик-БГУ” ва “Динамо-Минск”да қолдирилган ўйинларни ютиш орқали БАТЭдан ўзиб кетиш имкони бор. Ҳозир ўзбекистонлик футбол ишқибозлари "Энергетик-БГУ”га мухлислик қиляпти.

Чунки бу жамоа сафида Бобур Абдухолиқов, Шоҳруҳбек Абдураҳмонов, Абдулқодир Ҳусанов ва Аббосбек Жумақулов сингари ўзбек футболи тарбияланувчилари тўп тепмоқда. “Энергетик-БГУ” раҳбарияти ва мураббийлар штаби БАТЭдан фарқли равишда узоқ ўлкадан келган истеъдодли ўйинчиларни қадрлаяпти ва уларнинг жамоа муваффақиятларига қўшаётган ҳиссаларини эътироф этиб келмоқда.

Шаҳбоз Умаров эса ҳар қандай яхши ўйинчи каби ишсиз қолмайди. 23 ёшли футболчимиз бундан буён Қозоғистон премьер-лигасида йил охиригача ўйнайди. Декабрда эркин агентга айланадиган футболчимиз кейинчалик фаолиятини қаерда давом эттириш масаласини қайта кўриб чиқиш имконига эга.

Тўпурар легионеримизда яхши янгилик бўлади!