Davila: Fayzullaev bu ketishda Aleksis Sanchesdan o‘tadi!
TsSKA yozda o‘z tarkibiga qo‘shib olgan yangi futbolchilar – Abbosbek Fayzullaev hamda chililik Viktor Davila jamoaga ko‘p foyda keltiryapti.
Moskva klubi har ikki futbolchini avgust oyida qo‘lga kiritgan edi. Hozir ular TsSKAning asosiy tarkib o‘yinchilariga aylanib ulgurgan.
Premer-liganing 14-turidan keyin poytaxtlik “armiyachilar” musobaqa jadvalida uchinchi o‘ringa ko‘tarilib oldi. Shuningdek, Vladimir Fyodotov shogirdlari mamlakat kubogi guruh bahslarini birinchi o‘rinda yakunlab, bosh sovrin uchun kurashni davom ettirmoqda.
“Paxtakor” klubining eng iqtidorli tarbiyalanuvchilaridan hisoblangan Abbosbek Fayzullaev TsSKAga kelganidan beri Premer-liga va mamlakat kubogi bahslarida 13 ta o‘yinda qatnashib, bitta gol va oltita assist muallifi bo‘ldi.
Ilgari Chili va Meksika chempionatlarining bir necha klublarida to‘p tepgan 26 yoshli Davila esa, Evropadagi faoliyatini ham muvaffaqiyatli boshladi. U TsSKA safida ikki musobaqada o‘nta uchrashuvda maydonga tushib, ikkitadan gol va assist muallifi bo‘ldi.
Viktor Davila Moskvada Abbosbek Fayzullaev bilan do‘stlashib qoldi. Abbos chililik futbolchi bilan ko‘proq muloqot qilayotganini, ular ingliz va rus tilida gaplashish bo‘yicha mahoratlarini oshirayotganini aytgandi.
Davila “RB Sport” nashriga bergan intervyusida Abbosbek Fayzullaevni Chili futbolining eng yorqin yulduzi Aleksis Sanchesga qiyosladi.
- Abbosni yangi Aleksis Sanches, desak bo‘ladimi? Hozir ularni taqqoslash qiyin. Abbos – ajoyib futbolchi, u ayni paytda buyuk futbolchilik faoliyatinng boshida. Fayzullaev o‘sishda davom etishiga umid qilaman.
Sanches faoliyatini qurib bo‘lgani uchun ham boshqa darajadagi o‘yinchi hisoblanadi.
Abbos ham Aleksis singari faoliyatini muvaffaqiyatli qura oladi, hatto Sanchesdan o‘tib ketishi ham mumkin, - dedi Viktor Davila.
Aleksis Sanches professional faoliyati davomida Chilining “Kobreloa”, “Kolo-Kolo”, Argentinaning “River Pleyt”, Italiyaning “Udineze”, “Inter”, Ispaniyaning “Barselona”, Angliyaning “Arsenal”, “Manchester Yunayted”, Frantsiyaning “Marsel” jamoalarida o‘ynagan.
Tajribali hujumchi klublar miqyosida 18 ta sovrin, xususan, Chili, Argentina, Ispaniya, Italiya chempionatlari g‘olibligiga sazovor bo‘lgan. Aleksis Sanches etakchiligida Chili terma jamoasi ikki marta Amerika kubogini qo‘lga kiritgan.
Fayzullaev ham legioner sifatida bir necha individual sovrinlarni qo‘lga kiritdi. Abbos TsSKAning sentyabr va oktyabr oylaridagi eng yaxshi o‘yinchisi, “Krilya Sovetov”, “Spartak” va “Rubin” jamoalariga qarshi o‘tkazilgan uchrashuvlarning eng yaxshi futbolchisi sovriniga loyiq topildi.
Fikrlar