Legionerimiz – eng zo‘r gol muallifi!
Belarus tarixida eng ko‘p – 15 marotaba chempion bo‘lgan BATE klubi muxlislari jamoaning yangi mavsumda mart oyida o‘tkazilgan uchrashuvlarida kiritilgan eng chiroyli golni aniqladi.
Muxlislar “Viber” tarmog‘i orqali o‘tkazilgan so‘rovnomada borisovlik futbolchilar tomonidan kiritilgan beshta golga ovoz berdi. Unga ko‘ra, so‘rovda ishtirok etgan ishqibozlarning deyarli barchasi jamoaning o‘zbekistonlik legioneri Shahboz Umarovning golini eng zo‘r, deb topdi.
Ma’lumki, Shahboz birinchi turda “Slutsk” darvozasini beshinchi daqiqadayoq ishg‘ol qilib, jamoasining mavsumdagi ilk golini kiritgandi. Bu gol nafaqat yakuniy zarbada, balki hujum kombinatsiya bo‘yicha ham juda mahorat bilan ijro etilgan.
Ta’kidlash joizki, Shahboz Umarovning goli Belarus futbol federatsiyasi tomonidan ijtimoiy tarmoqlarda o‘tkazilgan so‘rovnomada ham birinchi turning eng chiroyli goli, deb tan olingandi.
O‘tgan yili Belarus chempionatida “Energetik-BGU” tarkibida 30 ta uchrashuvda qatnashib, to‘rtta gol va uchta golli pas muallifi bo‘lgan Shahboz Umarov yangi mavsumni BATE safida boshladi.
Fikrlar