Австралия билан ўйин олдидан Ўзбекистон етакчиси ўзгарди!

Қатар мезбонлик қилаётган Осиё кубогининг гуруҳ босқичлари секин-аста якунланиб бормоқда. “В” гуруҳи вакиллари бу босқични 23 январь куни якунлайди.

Бу квартетда Австралия терма жамоаси кетма-кет иккита ғалабадан кейин плей-офф масаласини муддатидан олдин ҳал қилиб бўлган. Австралияликлар гуруҳдаги сўнгги учрашувни тўрт очко билан иккинчи ўринда бораётган Ўзбекистон терма жамоасига қарши ўтказади.

Бу учрашув гуруҳ пешқадами ким эканига ойдинлик киритиб бериши лозим. Дуранг ҳар икки жамоага ўз ўринларини сақлаб қолиш имконини беради. Ўзбекистон плей-оффга биринчи ўриндан чиқиш учун ғалаба қозониши шарт.

Демак, барчамизни кескин ва муросасиз тўқнашув кутмоқда. Гарчи футболчиларимиз австралияликлар билан бўлган аввалги тўртта расмий учрашувдан учтасида мағлуб бўлган ва ҳали рақиб дарвозасига бирорта тўп кирита олмаган бўлса-да, бу гал мухлисларнинг ижобий натижадан умиди катта. Чунки мутахассислар ҳозирги терма жамоа аввалгисидан фарқ қилишини таъкидламоқда.

Sports.uz портали футбол ишқибозлари эътиборига Австралия ва Ўзбекистон учрашувига доир айрим қизиқарли фактлар ва маълумотларни тақдим этади.

Австралия ва Ўзбекистон Осиё кубоги доирасида икки марта ўзаро тўқнашган ва уларда кейинги босқичга рақиб жамоа ўтган.

Бу жамоаларнинг навбатдаги баҳси Осиё кубогининг гуруҳ босқичи доирасидаги илк тўқнашуви бўлади.

Австралияликлар қитъа чемпионатларида ҳали ҳеч қачон учала ўйиннинг барчасида ғалаба қозона олмаган.

Ўзбекистон бу галги Осиё кубогининг икки учрашувида рақиб дарвозасига 32 марта зарба берди. Австралияликларда бу кўрсаткич 38 тани ташқил қилмоқда.

Ўзбекистон миллий терма жамоасининг қитъа чемпионатидаги илк голини Аббосбек Файзуллаев киритди. Аввалига ўзбекистонликларнинг етакчи ўйинчиси сифатида Элдор Шомуродов тилга олиниб келинган эди. “Кальяри” футболчиси Осиё кубоги арафасида оғир жароҳат олиб, Қатарга келолмади.

Экспертлар терма жамоага етакчилик қилиш Греция чемпионатида тўп тепаётган Жалолиддин Машариповга юклатилишини таъкидлади. Бироқ, гуруҳ босқичининг дастлабки икки ўйини Ўзбекистон миллий терма жамоасига етакчилик қилишга бошқа даъвогар борлигини кўрсатди.

Сурия футболчиларига қарши ўтказилган биринчи тур баҳсида захирадан майдонга чиқиб, Ўзбекистон терма жамоаси ўйинига сезиларли даражада таъсир ўтказган ўйинчи Аббосбек Файзуллаев бўлди.

Бунгача асосан захирадан майдонга туширилаётган ҳужумкор футболчи бош мураббий Сречко Катанецга бошланғич таркибда ўйнашга лойиқлигини кўрсатди. 20 ёшли футболчи буни  Ҳиндистонга қарши иккинчи тур ўйинида яна бир карра исботлади. Ушбу учрашувда  ўзбекистонликлар урган учта голдан дастлабки иккитаси айнан Файзуллаевнинг саъй-ҳаракатлари эвазига киритилди.

Хусусан, Осиё кубоги ўйинларини таҳлил қилиб бораётган  khelnow.com сайти Австралия ва Ўзбекистон ўйинида ҳар икки терма жамоанинг етакчи ўйинчилари сифатида Аббосбек Файзуллаев ва Ҳарри Суттарни кўрсатган.

- Ҳарри Суттар Ўзбекистоннинг тезкор ва кўп қиррали ҳужумларига қарши туришда асосий рольи ўйнаши талаб этилади. Ҳозирча бу ҳимоячи терма жамоа сафида жуда ишончли ўйнаяпти. Аввалги икки беллашувда рақибларга дарвозани ишғол қилиш имконини бермади.

25 ёшли футболчи пастдан ва юқоридан келаётган тўплар учун курашда жуда яхши ҳаракат қилади. Энди у Ўзбекистоннинг тезкор ҳужумчиларини тўхтатиб қолиш йўлини топиши керак.

Аббосбек Файзуллаев эса, Ўзбекистоннинг ҳиндистонликлар устидан қозонган ғалабасида муҳим роль ўйнади. Тўртинчи дақиқаёқ ҳисобни очиб, ўзбекларнинг Осиё кубогидаги биринчи голини урди.

Миллий терма жамоадаги фаолиятини қарийб етти ой муқаддам бошлаган 20 ёшли футболчи 11 та учрашувда учта гол уришга улгурди. Аббосбек майдонни кўра олиш қобилияти, тезкорлиги, юқори темпда ўйнай олиши билан ажралиб туради. Файзуллаев Ўзбекистон миллий терма жамоасининг асосий фигураларидан ва жамоанинг турнир давомидаги кейинги учрашувларида ҳам катта роль ўйнайди, - деб ёзмоқда khelnow.com сайти сайти.

Дарҳақиқат, Австралия терма жамоасига қарши бўладиган баҳс Ўзбекистон терма жамоасининг ўсиш даражасини ҳам кўрсатиб бериши кутилмоқда. Тўрт йил олдинги учрашувда ҳамюртларимиз кучли рақиб билан тенгма-тенг ўйнаб, фақатгина пенальтилар сериясида омадсизликка учраган эди.

Бўлажак учрашувда эса, Ўзбекистон миллий терма жамоаси Австралия футболчилари дарвозасига илк голини уриши ва биринчи ғалабасини нишонлашини кутиб қоламиз.

Мухлислар кутаётган ўйин 23 январь куни Тошкент вақти билан 16:30 да бошланади.

Роналдуни Абдуқодир Ҳусанов ўйнаётган мусобақага чақиришди

Ғалаба қозонмасак бўлмайди! Австралияликлар ҳам, ўзбеклар ҳам сенсацияни кўзлаяпти

Ҳиндлар Ўзбекистонга қарши ўйин осон кечишига ишонганди. Рақибнинг 3 та хатоси!

Файзуллаев, Ҳусанов ва ўзбек футболчиларига дунёда қандай баҳо беришяпти?

Ўзбекистоннинг ғалабасига Ҳиндистондан қандай муносабат бўлди?

Ҳиндлар қайси футболчиларимиздан чўчияпти?

Шомуродовнинг сенсацион трансферига нима халақит қиляпти?

Германиялик экспертлар Ҳиндистон билан ўйин олдидан Ўзбекистон терма жамоасига қандай баҳо берди?