Bu O‘zbekiston jahon chempionatiga chiqishiga ishonaman!

O‘zbekiston milliy terma jamoasi a’zosi Shahboz Umarov yangi mavsumni ham Qozog‘iston Premer-ligasida o‘tkazadi.  “Ordabasi” safida chempion bo‘lgan Shahboz Umarov yaqinda Qatarja bo‘lgan Osiyo kubogida ishtirok etdi.

Shahboz Umarov  sportplustv.kz  saytiga intervyu berib, O‘zbekiston milliy terma jamoasining Qatar mezbonlik qilgan Osiyo kubogidagi ishtiroki haqida gapirdi.

Sports.uz  sayti ushbu intervyuning qiziqarli qismlarini o‘zbekistonlik futbol ishqibozlari e’tiboriga havola etadi.

- Osiyo kubogi yakunlandi. Siz o‘ynagan O‘zbekiston milliy terma jamoasi chorak finalga chiqdi. O‘sha musobaqa ishtirokchisi sifatida muxlislarga Qatardagi muhit haqida gapirib bera olasizmi?

 - Atmosfera ajoyib edi. Buni so‘z bilan ifodalab bera olmayman. Jahon chempionatida o‘ynamagan bo‘lsak-da, mundial o‘yinlari o‘tkazilgan maydonlarda to‘p tepdik. Ham xursand, ham xafa bo‘ldik. Sportda g‘alaba va mag‘lubiyat yonma-yon yuradi. Guruh bosqichidan muammosiz o‘tdik. Keyin 1/8 finalda Tailandni  engdik. Chorak finalda mezbonlar bilan  uchrashishimizni bilishimiz bilanoq, bu oson o‘yin bo‘lmasligini angladik. Birinchi bo‘limda bitta gol o‘tkazib yuborgan bo‘lsak-da, taslim bo‘lmadik. Uchrashuvning ikkinchi bo‘limida hisobni tenglashtirganimizdan so‘ng, bizda g‘alaba qozonish imkoniyati paydo bo‘ldi. Penaltilar seriyasida ham biz oldinda edik.

- Penaltilar seriyasida imkoniyatingizdan foydalandingiz. Biroq sizdan keyin nuqtaga kelgan Zafarmurod Abdurahmatov darvozabonni dog‘da qoldira olmadi. Muxlislarni uning gol ura olmagani emas, to‘pni bir joyda turib, hech qanday harakatsiz tepgani g‘azablantirdi.  Zafarmurodning xatti-harakatiga jamoadagi yigitlar qanday munosabatda bo‘ldi?

- Biz buni juda jiddiy qabul qildik. G‘alaba yaqinlashib qolgandek edi. Afsus aytishdan boshqa iloj yo‘q. Biroq, u yosh futbolchi. Muxlislarning noroziligini tushunaman. Biz unga tasalli berdik. Chunki qo‘shilib so‘ksak, o‘zini eyishi mumkin. Avvalo, bu xato tufayli Zafarmurodning o‘ziga qiyin. Endi u bu muvaffaqiyatsizlik bilan yashashiga to‘g‘ri keladi. Bu oson emas. Ko‘pni ko‘rgan o‘yinchilar bu holatni sabr bilan enga oladi. Yosh o‘yinchilar esa, shunday damlarda psixologik jihatdan o‘zini yo‘qotib qo‘yishi mumkin. Shuning uchun ham biz birinchi bo‘lib, uni qo‘llab-quvvatladik va qo‘llab-quvvatlaymiz.

- Futbolda shunday tushuncha shakllangan: penalti – lotereya. Endi o‘sha lahzani boshdan kechirgan odam, yirik musobaqa ishtirokchisi sifatida ayting-chi, penaltilar seriyasi rostdan ham lotereyami?

- Yo‘q, bu lotereya degan fikrga qo‘shilmayman. Buni birinchi navbatda tajriba, deyman. Buni kundalik hayotda, oddiy mashg‘ulotlarda, chempionatdagi uchrashuvlarda bemalol bajara olgan futbolchi qiyin daqiqalarda ham sovuqqonlik ko‘rsata oladi. Shuning uchun o‘n bir metrlik jarima zarbasini lotereya sifatida qabul qila olmayman. Bu ham musobaqa va biz professional sportchilar har qanday holatda ham bunga tayyor bo‘lishimiz kerak.

- Sizlar faqat penaltilar seriyasida imkoniyatni boy bergan Qatar terma jamoasi finalda Iordaniyani mag‘lub etib, qatorasiga ikkinchi bor Osiyo kubogini qo‘lga kiritdi. Finalni ko‘rdingizmi?

- Finalni tomosha qila olmadim. Chunki o‘sha paytda biz o‘z o‘yinimizni o‘tkazayotgandik. Terma jamoaga kelsak, ular juda kuchli. Musobaqa sohiblari o‘z muxlislari oldida tinim bilmay yuguradilar va hech charchamaydilar. Iordaniya ham himoyasiz jamoa emas. Lekin mezbonlarning g‘alabasidan ajablanmadim. Yashirmayman, finalda ular o‘rniga biz ham o‘ynagan bo‘lardik, degan fikr meni xafa qiladi. Biroq, hamma narsa tugadi va ketdi. Va hayot davom etmoqda.

- O‘zbekistonning o‘yin uslubida ma’lum tizim va kuchli futbolchilar bor. Jamoada etakchi yigitlar etarli. Lekin nega oxirgi lahzada raqib jamoa g‘olib bo‘laveradi? Ba’zida jahon chempionatiga chiqish arafasida turganingizda omad etishmayapti. Bu gal ham yarim finalga yo‘l olish uchun yana nimadir etishmadimi?

- Bilmadim, bilmayman. Biz har doim harakatdamiz, mashq qilamiz va ko‘p mehnat qilamiz. Lekin o‘sha “ozgina etmay qolishi”dan charchay boshladik. Biroq, biz taslim bo‘lmaymiz. Jahon chempionati yaqinlashmoqda. Nasib qilsa, 2026 yilgi jahon chempionatiga yo‘llanma olamiz, deb o‘ylayman. Men bunga ishonaman!

- Qartarda bo‘lib o‘tgan Osiyo kubogida muxlislar qo‘llab-quvvatlashini qay darajada his qildingiz?

- Muxlislar birinchi kundanoq biz bilan bo‘ldi. Bizni qo‘llab-quvvatlagan muxlislar orasida qozoq mamlakati fuqarolari ham ko‘p bo‘lganidan xursandmiz. G‘alaba qozonganimizda ham, mag‘lub bo‘lganimizda ham, yarim finalni o‘tkazib yuborganimizda ham, bizni qo‘llab-quvvatlaganlarga katta rahmat.

Legionerimiz Evropa Chempionlar ligasida porlashni ko‘zlayapti

O‘zbek klubiga yutqazgan futbolchi katta va’da berib qo‘ydi

Chempion jamoaga qo‘shilgan legionerimizni maqtashyapti

Legionerimiz gol urdi

O‘zbek hujumchisini Premer-liga klubi o‘z safiga qo‘shib oldi

O‘zbek futbolchilari legionerga aylanishga tayyor

“Navbahor”da ishlagan murabbiy Fayzullaevni “Bavariya”ga o‘tkazish yo‘lini aytdi

Evropalik agent: “Bavariya”ning Fayzullaevga qiziqishi bejiz emas...

Osiyo kubogi futbolchilarimizga yangi jamoalarga yo‘l ochdi

Fayzullaevdan zo‘r futbolchilarimiz bor!

Fayzullaevning Evropada o‘ynash imkoniyati bormi?