Исакнинг қандай жароҳат олгани тахмин қилинди

АПЛнинг 17-туридан ўрин олган "Тоттенхэм" — "Ливерпуль"(1:2) учрашувида жароҳат олган Александр Исакнинг ҳолати бўйича дастлабки тахминлар пайдо бўлди.

Twitter (X) ижтимоий тармоғида фаолият юритадиган жароҳат таҳлилчиси Физио Скаут футболчи олган жароҳат тури ҳақида фикр билдирди.

"Биринчи қарашда бу олд крестсимон боғлам (тизза боғламининг узилиши) жароҳатига ўхшайди, шунингдек, мениск шикастланиши эҳтимоли ҳам мавжуд. Контакт тўпиқ қисмига тўғри келган, бироқ тизза валгус ҳолатига кириб кетгани боғламлар жароҳатланганидан далолат бериши мумкин.

Исак майдонни ўз оёғи билан тарк этгани оёқ пастки қисмида синиш бўлиши эҳтимолини деярли истисно қилади, аммо у тиззасини ушлаб юрган.

Агар гап ҳақиқатан ҳам крестсимон боғлам жароҳати ҳақида кетаётган бўлса, футболчининг тикланиши камида 9 ой ёки ундан ҳам кўпроқ вақт талаб қилиши мумкин."

Қайд этилишича, мерсисайдликлар тез орада Исакнинг ҳолати бўйича расмий маълумот тақдим этиши кутилмоқда.