Легионеримиз голи мавсумдаги энг зўри бўлди!
Қозоғистон профессионал футбол лигаси 2021 йилги мавсумнинг энг зўр голини аниқлади.
Унга кўра, ўзбекистонлик ҳужумчи Игорь Сергеевнинг “Актобе” жамоаси сафида тўртинчи турда “Ордабаси” дарвозасига киритган тўпи энг кўп овоз билан мавсумнинг энг яхши голи, леб топилди. Ўша учрашувда Игорь майдоннинг иккинчи томонида бўлишига қарамай, узоқ масофадан аниқ зарба йўллаб, тўпни рақиб дарвозабони устидан ошириб, дарвозани ишғол қилганди.
Таъкидлаш жоизки, 2021 йил истеъдодли ҳужумчимиз Игорь Сергеев учун омадли келди. Ўтган йили “Пахтакор” таркибида клуб тарихидаги энг яхши тўпурарга айланган ва чемпион бўлган ҳужумчи жорий йил бошида УЕФА аъзоси ҳисобланган Қозоғистон чемпионатига кўчиб ўтди.
Аввалига Игорь ўз олдига катта мақсадларни қўйган ва чемпионлик учун курашиши кутилган “Актобе”ни танлади. Ушбу жамоанинг асосий юлдузи сифатида энг катта маошни олган ҳужумчимиз шунга яраша кўп гол ура бошлади. Актобеликлар сафида ҳамюртимиз 18 та учрашувда қатнашиб, ўз ҳисобига еттита гол ёздириб қўйди. Шу голлардан бири энг чиройли гол танловида ғолиб бўлди.
Бироқ, “Актобе”да раҳбарият ўзгарди, мавсумга қўйилган режалар, мақсадлар ва ҳатто муносабатлар ҳам бошқача кўриниш олди.
Қозоғистон премьер-лигасининг биринчи даврасидан кейин “Тобол” таркибини кучайтириш мақсадида Игорь Сергеевни ўз сафига қўшиб олди. Кустанайликлар УЕФА Конференциялар лигасида муваффақиятли қатнашиш учун кучли ҳужумчига бўлган эҳтиёжини ўзбекистонлик тўпурар орқали ҳал қилди. Сергеев уларнинг таклифини қабул қилди, Конференциялар лигаси саралашида тўртта ўйинда қатнашиб, Хорватиянинг “Хайдук” жамоаси дарвозасига иккита тўп киритишга эришди. Шу тариқа, УЕФА миқёсидаги мусобақаларда гол уриш бўйича олис Европада юрган Элдор Шомуродов ва Жасур Яхшибоевни ёлғизлатиб қўймади.
Моҳир ҳужумчимиз “Тобол” учун премьер-лигада еттита ўйин ўтказди. Кустанайликлар сафида Игорь тўрт марта тўп киритди. Ҳамюртимиз “Тобол”нинг чемпион бўлишига катта ҳисса қўшди. Жами 11 та гол билан чемпионат тўпурарлари баҳсида учинчи ўринни эгаллади.
Қозоғистоннинг Meta-ratings.kz сайти яқинда “Тобол” раҳбарияти ҳамкорликни узайтириш мақсадида ўзбекистонлик ҳужумчига янги шартнома таклиф қилганини хабар берди. Бу жамоа мамлакат чемпиони сифатида келаси масвум Европа Чемпионлар лигасининг саралаш беллашувларида қатнашиши инобатга олсак, Сергеевда ҳам Яхшибоев сингари футбол оламининг энг нуфузли турнирида тўп тепиш имкони бўлади.
Сўнгги маълумотларга қараганда, Сергеевга Ўзбекистондан “Пахтакор” ва “Навбаҳор” оғиз солмоқда. “Шерлар” Чемпионлар лигасининг янги мавсумида муваффақиятли қатнашиш учун кучли ҳужумчига эҳтиёж сезяпти. Клуб спорт директори Жаъфар Ирисметов бу ролга биринчи номзод Игорь Сергеев эканини айтди.
Бундан ташқари, тажрибали ҳужумчимизга Россиянинг “Химки” клубидан чорлов бўлаётгани ҳақида ҳам хабарлар тарқалди. Харидорлар орасида Польша ва Жанубий Корея клублари борлиги айтилмоқда.
Игорь Сергеев “Пахтакор” тарбияланувчиси ҳисобланади. 2011 йилдан “шерлар”нинг асосий таркибида ўйнаган. Моҳир ҳужумчи фаолияти давомида 2016 йилда бир мавсум Хитой чемпионатида “Бэйцзин Гоань” жамоаси шарафини ҳимоя қилиб 14 та учрашувда битта гол урган. 2017-2018 йилларда Бирлашган Араб Амирликларининг ”Аз-Завра” клубида ўнта беллашувда иштирок этиб, ўз ҳисобига битта гол ёздириб қўйган.
Игорь Сергеев Ўзбекистон ва Қозоғистон чемпиони, миллий чемпионат тўпурари ва мамлакатимиз кубоги соҳиби ҳисобланади.
28 ёшли ҳужумчи 2013 йилдан бери Ўзбекистон миллий терма жамоаси аъзосидир. У шу пайтга қадар бош жамоа сафида 59 та учрашувда майдонга тушиб, рақиблар дарвозасини 17 маротаба ишғол қилган.
Комментарии