Ўзбек жамоалари жаҳон рейтингида нечанчи ўринда?
Халқаро футбол тарихи ва статистикаси федерацияси – IFFHS 2023 йил якуни бўйича жаҳоннинг энг кучли жамоалар рейтингини эълон қилди.
Ушбу рўйхатни тузишда жамоаларнинг 2023 йилнинг 1 январидан 31 декабрига бўлган муддатда қайд этган кўрсаткичлари асос қилиб олинди.
Унга кўра, ўтган йили Англия чемпионлиги, мамлакат кубоги ва Европа Чемпионлар лигасида ғолиб чиқиб, требл қайд этган “Манчестер Сити” дунёнинг энг кучли жамоаси сифатида қайд этилди.
Хосеп Гвардиола шогирдлари аввалги рейтингда ҳам пешқадамлик қилган эди.
Кучли учликдан Мадриднинг “Реал” ва Миланнинг “Интер” жамоалари ҳам жой олди. Қизиғи шундаки, бу икки жамоа ўтган йили чемпионлик унвонларини рақиблари – мос равишда “Барселона” ва “Наполи”га топшириб қўйган эди.
Рейтингнинг тўртинчи поғонасида Африка қитъаси вакили – Мисрнинг “Ал-Аҳли” клуби қайд этилган.
Юқорида келтирилган тўрт жамоадан ташқари Нидерландия гранди “ПСВ Эйндховен” ҳам кучли бешликдаги жойини ўзгаришсиз сақлаб қолди.
Осиё клублари орасида энг юқори кўрсаткич Саудия Арабистонининг “Ал-Ҳилол” жамоасига тегишли ва у умумий рейтингда 31-ўринга чиқиб олган.
Ўзбекистон клублари ўртасида етакчилик “Насаф” клубига насиб қилди. Қарши шаҳри жамоаси янги рейтингда ўн поғона кўтарилиб, умумий рейтингнинг 204-қаторига жойлашиб олди.
Наманганнинг “Навбаҳори” ҳам ўсишга эришди. Бу жамоа рейтингда 228-ўриндан 209-поғонага чиқиб олди.
Ўзбекистоннинг амалдаги чемпиони “Пахтакор” гарчи рейтингга киритилган бўлса-да, “шерлар” бироз пастлаганини кўриш мумкин. Пойтахт жамоаси аввалги рўйхатда 348-ўриндан жой олган эди. Бу гал 29-поғона қуйига шўнғиб, 377-қаторга тушган.
Ўзбекистон футболчилари легионер сифатида ўйнаётган жамоалар орасида IFFHS рейтингида фақатгина Москванинг ЦСКА клубини кўриш мумкин.
Аббосбек Файзуллаев тўп тепаётган жамоа умумий рейтингнинг 383-қаторида бормоқда. Бу Россия клублари ўртасида энг юқори кўрсаткич.
Рўйхатга киритилган Россиянинг қолган жамоаларидан “Краснодар” 455, “Зенит” ва “Локомотив” бир хил – 604-қатордан жой эгаллаган.
Халқаро ташкилотнинг йиллик рейтингига Марказий Осиёнинг қолган мамлакатларидан фақатгина биттадан жамоа киритилган. Хусусан, Қирғизистоннинг “Абдиш ота” жамоаси 383-ўринда, Қозоғистоннинг “Астана” клуби 417-қаторда, Туркманистоннинг “Олтин Аср” жамоаси 617-поғонада кўрсатилган. Тожикистон клубларига эса, бу галги рўйхатдан жой берилмади.
Фикрлар