Shomurodov chempion jamoa taklifini rad etdi!
Eldor Shomurodovning Evropa mamlakatlari boshlanayotgan bir pallada hamon o‘ziga yangi jamoa topgani yo‘q.
O‘zbekistonlik futbolchiga chorlovlar etarlicha bo‘ldi, “Roma” klubiga legionerning transferini so‘rab murojaat qilgan jamoalar ham bor edi. Xususan, “Galatasaroy”, “Bolonya”, “Trabzonspor” aniq takliflar bilan murojaat qildi.
“Montsa”, “Sassuolo”, “Torino” va “Vulverxempton” kurashdan erta chiqishga qaror qildi.
So‘nggi jiddiy taklif Turkiya Superligasi g‘olibi “Trabzonspor”dan bo‘ldi. Chempionlar ligasining saralash turnirida qatnashadigan jamoa Evropaning eng nufuzli turniri o‘yinlari oldidan hujum chizig‘ini aynan Eldor Shomurodov yordamida kuchaytirib olmoqchi edi.
O‘tgan yili Eldor Shomurodov UEFA Konferentsiyalar ligasi saralash musobaqasi doirasida Turkiyada “Trabzonspor” darvozasini ishg‘ol qilganidan keyin bu klub mutasaddilari hamyurtimizni mo‘ljalga olib qo‘ygan ko‘rinadi.
Turkiyaning 61saat sayti tarqatgan xabarga ko‘ra, “Trabzonspor” vakillari Shomurodovning agentlariga murojaat qilgan va shu bilan bir qatorda “Roma”ga o‘z taklifini jo‘natgan. Trabzonliklar o‘zbek hujumchisini bir yillik ijarasi uchun rimliklarga bir million evro va’da qilgan va keyinchalik sotib olish huquqini so‘ragan.
Biroq, Evro-Futbol saytining yozishicha, Eldor Shomurodovga “Trabzonspor” varianti ma’qul kelmagan va hujumchimiz qardoshlarga rad javobini bergan. Manbaning ta’kidlashicha, o‘zbek legioneri Italiyada qolishni istayapti.
Avvalroq, Shomurodov A Seriyada qolish uchun “Vulverxempton” chorloviga ham qiziqmagani aytilgan edi.
Shu o‘rinda, “Roma” mutasaddilari tarkibdagi hujumchilar Eldor Shomurodov, Stefan El-Shaaravi va Feliks Afena-Gyandan qay biriga aniq xaridor chiqsa, tezroq ulardan birini sotiyu yubormoqchi. Chunki Joze Mourino sport direktori Tyagu Pintodan erkin agent maqomida yurgan Andrea Belottini olib kelishni talab qilmoqda.
Italiya terma jamoasi hujumchisi rimliklar bilan shaxsiy shartnoma bo‘yicha kelishuvga erishgan bo‘lsa-da, “Roma”da o‘zi uchun joy ochilishi kutib, yangi mavsumda jamoasiz qolib ketishga yo‘l qo‘ymasa kerak.
Eldor Shomurodov faoliyati davomida O‘zbekiston, Rossiya va Italiya yuqori divizionlarida klublar miqyosida jami 221 ta uchrashuvda maydonga tushib, raqiblar darvozasini 45 marta ishg‘ol qilgan va jamoadoshlariga 23 ta golli pas uzatgan.
Xullas, Eldor Shomurodovning transferi bo‘yicha yangilik va xabarlar hali beri tinmaydigan ko‘rinadi. Kuzatishda davom etamiz.
Fikrlar