Fayzullaev Evropadan yaxshi taklifni rad etmaydi!
Abbosbek Fayzullaev Rossiya Premer-ligasidagi faoliyatini eqinda boshlaganiga qaramay, ketma-ket ikki marta TsSKA futbolchilar o‘rtasida sentyabr va oktyabr oylarining eng yaxshi o‘yinchisi, deb topildi.
Legionerimiz muxlislar o‘rtasida o‘tkazilgan so‘rovnomalarda katta farq bilan g‘alaba qozonganini alohida e’tirof etish kerak.
20 yoshli hujumkor futbolchimiz o‘yinini muxlisu mutaxassislar, futbolchilar, murabbiylar baholab bormoqda.
Sports.uz portali o‘zbekistonlik futbol ishqibozlari e’tiboriga Fayzullaev haqidagi fikr-mulohazalarni havola qilishda davom etadi.
Moyzes, TsSKA himoyachisi:
- Abbosbek – biz uchun muhim o‘yinchi. U juda aqlli, tezkor futbolchi. Fayzullaev gollari va assistlari bilan jamoaga yordam beryapti.
Men Fayzullaevni yorqin kelajak kutayotganiga aminman, - dedi braziliyalik legiorer.
Evgeniy Aldonin, TsSKA sobiq futbolchisi:
- Fayzullaev transferi TsSKA uchun eng yoqimli syurpriz bo‘ldi. Ular bu o‘yinchini kelajakni ko‘zlab olib kelgan. Abbos endi 20 ga to‘ldi. Fayzullaev bo‘y-basti jihatidan jismoniy ko‘rsatkichlari kamtarroq bo‘lishi mumkin, lekin keyingi paytda namoyish qilayotgan o‘yini yuqori darajada.
Abbos “armiyachilar”ning hujum chizig‘ini o‘zgartirib yubordi. U tezkor, mohir, gavdasining kichikligiga qaramasdan, yakkakurashlarda g‘olib chiqyapti, har gal to‘pga birinchi etib kelyapti.
Fayzullaevning to‘p bilan ishlash mahoratini alohida ta’kidlash kerak. U hamma ishni katta tezlikda bajaryapti, o‘yinni keskinlashtirishga usta ekan. Eng muhimi, bu futbolchi qizg‘anchiq emas, o‘zi gol urishi yoki jamoadoshiga to‘p uzatishi mumkin. Bir so‘z bilan aytganda jamoaviy o‘yinchi.
Menimcha, hozir Abbos TsSKAning eng zo‘r futbolchisi. U yanada o‘sishini istayman. Fayzullaevning salohiyati katta ekaniga ishonchim komil. Hozir ajoyib o‘yin namoyish qilyapti, ammo bu bilan to‘xtamasligi kerak.
Fayzullaev qishda Evropaga ketishi mumkinmi? Bu uning qo‘lida qanday takliflar borligiga bog‘liq masala. Agar futbolchining o‘zi va agenti TsSKAni Evropaga ketish uchun tramplin, deb bilsa, hozir hech kim kuchli ligalardan keladigan yaxshi taklifni rad etmaydi. Chunki Abbosbek ham faoliyatini rivojlantirishni istaydi. U TsSKa uchun juda muhim o‘yinchiga aylanib bo‘ldi, - dedi sobiq futbolchi.
Valeriy Gazzaev, taniqli murabbiy:
- Keyingi o‘yinlarda Abbos Fayzullaev yaqqol ajralib turibdi. Bu futbolchi kun sari emas, balki soat sayin o‘syapti. Agar shu taqlid mehnat qilishda davom etsa, kelajagi porloq bo‘ladi.
Fayzullaevning salohiyati qanday? Uni ortiqcha maqtashdan yiroqman. Lekin bor gap shu: Abbosning aqli va oyog‘i tez ishlaydi. U bir zumda qaror qabul qiladi, tez yugurib ham aniq va nozik pas bera oladi. Bu juda qimmatli sifatlar. Fayzullaev o‘ziga nisbatan talabchanlikni yanada oshirishi va funktsional tayyorgarlik ustida ishlashi kerak, - dedi Rossiyaning eng mashhur murabbiylaridan hisoblangan Valeriy Gazzaev.
Fikrlar