Natijadan norozi Nikolich Fayzullaev haqida nimalar dedi?
Rossiya Premer-ligasining to‘qqizinchi turida “o‘zbek derbisi” kuzatildi. Qozon shahri mezbonlik qilgan uchrashuvda “Rubin” himoyasida Rustam Ashurmatov, TsSKA hujumida Abbosbek Fayzullaev etakchilik qildi.
O‘yin keskin va murosasiz bellashuvlarga boy bo‘ldi. Moskvaliklar hujumlarini qaytarishda Rustamjon Ashurmatov alohida jonbozlik ko‘rsatdi. Tajribali legionerimiz bir necha vaziyatda “armiyachilar”ning “Rubin” darvozasiga zarba berishiga yo‘l qo‘ymadi.
“Rubin” bosh murabbiyi Rashid Rahimov 58-daqiqada o‘yinga taktik o‘zgartirishlar kiritish uchun Ashurmatovni zaxiraga olib, o‘rniga Konstantin Nijegorodovni tushirdi. Ta’kidlash joizi, 28 yoshli markaziy himoyachimiz bu mavsumdan muntazam asosiy tarkibda to‘p tepmoqda. Rustam hozirga qadar chempionatda beshta, kubok musobaqasida to‘rtta o‘yinda ishtirok etdi.
Abbosbek Fayzullaev esa, TsSKA hujumlarini tashkil qilishda faollik ko‘rsatdi. Hamyurtimizning tezkor, kutilmagan, qo‘qqisdan qabul qilgan qarorlari raqibni ancha shoshirib qo‘ydi. Moskva klubi hujumchilari bir necha bor legionerimizning qulay paslarini golga aylantira olmadi.
“Armiyachilar” hisobni Abbosbek Fayzullaev harakatlari evaziga ochdi. Legionerimiz ideal darajada aniq va qulay pas oshirdi. Rifat Jemaletdinov o‘zbek futbolchisi yaratib bergan vaziyatdan unumli foydalanib, mavsumdagi birinchi golini urdi.
Biroq TsSKAga g‘alabani ushlab qolish nasib qilmadi. Qozonliklar ikkinchi bo‘limda Egor Teslenkoning goli evaziga hisobni tenglashtirdi – 1:1.
O‘yindan keyin TsSKA bosh murabbiyi Marko Nikolich klub matbuot xizmatiga o‘z fikr-mulohazalarini bildirdi.
- Uch ochko olib keta olmaganimiz alamli bo‘ldi. Maydonda jamoamiz to‘pni nazorat qilish, xavfli vaziyatlar yaratish, darvozaga zarba yo‘llash kabi turli ko‘rsatkichlar bo‘yicha ustunlik qildi. Yoqmagani tomoni – biz ketma-ket uchinchi uchrashuvda o‘yin borasida raqibdan ustun bo‘lib turib, g‘alabaga erisha olmayaptmiz.
Bu bahsda futbolchilarimiz borini berib o‘ynadi. G‘alaba qozona olmaganimizdan afsusdaman, lekin ishlashda va oldinga intilishda davom etamiz.
Jamoamdagi alohida o‘yinchilarni muhokama qilmayman. Lekin shuni aytishim kerakki, oxirgi uch-to‘rtta o‘yinda Abbosbek Fayzullaev va Rifat Jemaletdinov katta o‘sishga erishganini ko‘rib turibmiz.
Abbosbek Olimpiada tufayli uzoq vaqt jamoada bo‘lmadi, Rifat safimizga yozda qo‘shildi. Futbolni tushunadigan har bir odam har qanday o‘yinchiga vaqt kerakligini yaxshi biladi. Fayzullaev va Jemaletdinov yuqori sport formasini tiklab olganini namoyish qilayotgani ko‘rinib turibdi, - dedi serbiyalik mutaxassis Marko Nikolich.
Joriy mavsumda umumiy hisobda o‘ninchi o‘yinini o‘tkazgan Abbosbek Fayzullaev Rossiya Premer-ligasi va mamlakat kubogidagi assistlari sonini beshtaga etkazib oldi.
Husanov aybdor! Abduqodir “qovun tushirdi”...
“Roma” futbolchilari Daniele De Rossi bo‘shatilishidan norozi. Shomurodov kim tomonda?
Fayzullaev charchadi...
Fayzullaev muxlislariga yaxshi xabar!
Mashhur murabbiy Shomurodovga emas, Ronalduga ustozlik qiladigan bo‘ldi!
Fikrlar