Osiyo kubogida O‘zbekistonning besh nafar futbolchisi kuzatuvda bo‘ladi!
2024 yilning dastlabki ikki oyida futbol jamoatchiligining asosiy e’tibori Kot d’Ivuardagi Afrika Millatlar ligasi va Qatardagi Osiyo kubogi musobaqalariga qaratiladi.
Nufuzli manbalar qit’a miqyosidagi musobaqalarga oid tahliliy materiallarni e’lon qilishda davom etyapti. Xususan, www.strategya.com sayti Osiyo kubogida ishtirok etadigan asosan qaysi futbolchilar muxlisu mutaxassislar diqqat markazida bo‘lishini tahlil qilib chiqdi.
Qatar mezbonlik qiladigan Osiyo chempionatida qit’adagi terma jamoalarning yarmi – 24 tasi ishtirok etadi. Olti guruhdan dastlabki ikki o‘rinni egallagan va to‘rtta eng yaxshi natijaga ega uchinchi o‘rin sohiblari pley-offga yo‘llanma oladi.
Qit’a chempionatida bir necha yulduz darajasidagi futbolchilar bor. Eng kuchli terma jamoalardan biri Avstraliya sanaladi. Grem Arnold shogirdlari orasda Metyu Rayan, Aziz Bexich va Jekson Irvayn kabi taniqli o‘yinchilar bor. “Lester” vakili Harri Suttar himoyachi bo‘lishiga qaramay, ko‘p gol uryapti.
Eron terma jamoasining eng mashhur futbolchilari hujum chizig‘idan joy olgan. Mehdi Taremi va Sardor Azmun dueti har qanday raqibga xavf tug‘diradi. Tarkibda Evropaning kuchli chempionatlaridan taklif etilgan Alirizo Jahonbaxsh (“Feyenoord”), Saman G‘addos (“Brentford”) ham o‘ynaydi.
Yaponiya terma jamoasida Angliyadan kelgan o‘yinchilar ko‘p. “Liverpul”dan Vataru Endo, “Arsenal”dan Takexiro Tomiyasu, “Brayton”dan Kaoru Mitoma APL vakillari hisoblanadi. Yana o‘n bir nafar futbolchi kuchli beshlik ligalarida to‘p tepadi.
Janubiy Koreya bosh murabbiylikka mashhur futbolchi Yurgen Klinsmanni taklif qilgan. Germaniyalik mutaxassis tomonidan Osiyo chempionatiga taklif etilgan o‘yinchilar orasida “Bavariya” vakili Kim Min Chje, PSJ yarim himoyachisi Li Kan In, “Vulverxepton”dan Xvan Xi Chxan hamda eng yorqin yulduz Son Xyon Minni ko‘rish mumkin. “Tottenxem” to‘purari o‘yinlarda terma jamoaga sardorlik qiladi.
O‘zbekiston milliy terma jamoasining ham bir necha o‘yinchilari muxlisu mutaxassislar kuzatuvida bo‘ladi. Eldor Shomurodov yo‘qligida asosiy e’tibor legioner maqomida o‘ynash tajribasiga ega bo‘lgan Oston O‘runov, Rustam Ashurmatov, Abbosbek Fayzullaev va Hojimat Erkinovga qaratiladi.
Shuningdek, “Lans” asosiy tarkibida ko‘rinish bera boshlagan 19 yoshli Abduqodir Husanov ham eng salohiyatli o‘yinchilar qatorida mutaxassislar va muxlislar nishonida bo‘lishi tabiiy.
O‘zbeklarga taniqli mutaxassis Srechko Katanets bosh murabbiylik qiladi. Umuman olganda, Osiyo chempionatida taniqli murabbiylarning ishini kuzatish imkoniga ega bo‘lamiz. Suriyaliklarga Ektor Kuper, hindlarga Igor Shtimats, Birlashgan Arab Amirliklariga Paulu Bentu, Vetnamga Filipp Trusse, Saudiya Arabistoniga Roberto Manchini ustozlik qiladi.
Fikrlar