Ўзбекистон қатнашадиган “ЖЧ-2026”да янгича қоида амал қилади
Яқинлашиб келаётган 2026 йилнинг спорт оламидаги энг муҳим ва йирик воқеаси шубҳасиз учта мамлакат биргаликда ўтказадиган футбол бўйича жаҳон чемпионати бўлади.
Бу галги жаҳон чемпионати бир неча жиҳат бўйича тарихий аҳамият касб этади. Биринчидан, энг нуфузли футбол турнирига Шимолий Американинг бирданига уч мамлакати – АҚШ, Канада ва Мексика илк бор биргаликда мезбонлик қилмоқда.
Иккинчидан, ФИФА қарорига кўра, бўлажак жаҳон чемпионатида тарихда биринчи марта иштирокчилар сони 32 тадан 48 тага оширилди.
Ушбу мундиалнинг бош ташкилотчиси ФИФА бўлажак жаҳон чемпионатида яна бир янги қоида жорий қилинганини матбуот хизмати орқали расман эълон қилди.
- 2026 йилги футбол бўйича жаҳон чемпионатида ҳар бир бўлимда футболчиларга гидратация учун уч дақиқалик танаффус берилади.
ФИФА футболчилар саломатлигини турнир давомида асосий устувор вазифа сифатида кўради. Канада, Мексика ва АҚШ мезбонлик қиладиган турнирда бу қоида барча ўйинларда амал қилади.
Танаффуслар соддалаштирилган шаклда бўлади, яъни бу 2025 йили ёзда АҚШ мезбонлик қилган клублар ўртасидаги жаҳон чемпионатида қўлланилган тизимга ўхшайди. Ҳар бир таймнинг 22-дақиқасида ҳакам ўйинни тўхтатиб, футболчиларга сув ичиш ва организмдаги сув миқдорини тиклаш имконини беради.
Ҳар бир бўлимдаги бу танаффуслар ҳаво ҳарорати ёки бошқа шароитлардан қатъи назар барча ўйинларда амал қилади.
Стадионларнинг усти том билан ёпилган бўлса ҳам, ҳаво ҳарорати иссиқ ёки совуқ бўлишига қарамай, ҳар бир учрашувда футболчиларнинг сув ичиш учун уч дақиқалик танаффус берилади. Бу жараённинг бошланиши ва тугаши ҳакам ҳуштаги орқали назорат қилинади, - деди мусобақа бош координатори Маноло Зубирия.
2026 йилги жаҳон чемпионати 11 июнда бошланади ва 19 июлда якунланади. Турнир АҚШ, Канада ва Мексика майдонларида ўтказилади.
Ўзбекистон миллий терма жамоаси тарихда илк бор жаҳон чемпионатига йўлланма олди ва келаси йили мундиалдаги иштироки “К” гуруҳида бошлайди.
Фабио Каннаваро бош мураббийлик қилаётган терма жамоамиз квартетда дастлабки икки учрашувни Колумбия ва Португалия футболчиларига қарши ўтказади. Учинчи рақиб Конго Демократик Республикаси, Ямайка ва Янги Календония терма жамоалар ўртасидаги плей-оффдан кейин аниқ бўлади.
Фикрлар