Шомуродов яна бир машҳур клубга рад жавобини берди!
Элдор Шомуродов “Рома”да қолиб асосий таркибга кириш учун курашадиган бўлди. Ўзбек ҳужумисига ёзги трансферлар ойнаси вақтида бир неча жамоалардан қизиқиш бўлди ва уларнинг аксарияти римликлар билан музокара олиб борди ҳам.
Европа футболини ёритишга ихтисослашган https://www.euro-football.ru сайтининг хабар беришича, Элдор Шомуродовни Туркия Суперлигаси вакили “Фенербаҳче” ўз таркибига чорлаган. Манбанинг таъкидлашича, ўзбек ҳужумчиси бу таклифни қабул қилмаган ва туркларга рад жавобини берган.
.jpg?1662054213010)
Аслини олганда, Элдор Туркиянинг энг машҳур жамоаларидан таклиф олгани аҳамиятли. Мамлакат чемпиони “Трабзонспор”, “Галатасарой” ва “Бешиктош” клублари ҳам форварднинг трансферини сўраб, пойтахтликларга мурожаат қилганди.
Италияда қолишни истаган ҳамюртимиз бу таклифларнинг бирортасини қабул қилмади.
Италия жамоалари орасида Шомуродовни қўлга киритиш учун энг қаттиқ курашган “Болонья” бўлди. Болоньяликлар бош мураббий Синиша Михайловичнинг истагини бажариш учун Шомуродовни ижарага олиб, келаси ёзда уни сотиб олиш мажбуриятини қабул қилишга ҳам кўнди. Бироқ, томонлар тўланиши керак бўлган компенсация миқдори бўйича келиша олмади.
Унга кўра, “Болонья” римликларга 10 миллион евро таклиф қилди. Бир йил муқаддам легионеримизни 18 миллион еврога харид қилган “Рома” мутасаддилари молиявий зиён кўрмаслик учун 15 миллион евро сўради. Кейинчалик, пойтахт клуби Шомуродовнинг нархини аввалига ўн тўрт, орадан бир неча кун ўтиб, 12 миллион еврога туширгани ҳақида хабарлар тарқатилди.
Лекин римликларнинг бу ҳиммати “Болонья” вакилларини трансферга қўл уриши учун етарли бўлмади.
Энди 27 ёшли ҳужумчимиз камида қишки трансферлар ойнаси очилгунига қадар Римда қолиши кутилмоқда. Катта эҳтимол билан Шомуродов захира ўйинчиси сифатида Жозе Моуриньо қачон имкон беришини кутишга мажбур.
“Рома” ҳужумида эса, Англия, Аргентина, Италия терма жамоалари ҳужумчилари – Тэмми Абрахам, Пауло Дибала, Андреа Белотти каби юлдузлар бор ва уларнинг асосий таркибдаги жойи кафолатланган.
Қолавера, Моуриньо захирадаги форвардлар орасида Стефан Эл-Шааравига суянишини кўрсатиб қўйди. Агар Жастин Клювертнинг ҳам “Фулхэм”га трансфери барбод бўлганини инобатга олсак, Шомуродов яна бир рақобатчи билан курашиши ойдинлашади.
Эслатиб ўтамиз, Элдор Шомуродов “Машъал”, “Бунёдкор”, “Ростов”, “Женоа” ва “Рома” жамоалари сафида жами 221 та учрашувда майдонга тушиб, рақиблар дарвозасини 45 маротаба ишғол қилган ва жамоадошларига 23 та голли узатма оширган.
Шунингдек, Ўзбекистон миллий терма жамоаси сафида жами 53 та беллашувда қатнашиб, ўз ҳисобига 30 та гол ёздириб қўйган.
Фикрлар