Гамбург-2017: Боксчиларимизнинг рингга чиқиш вақтлари маълум бўлди

  • 31 август, 2017, 01:30
  • 0
  • Бокс

Хабарингиз бор, бугун Германиянинг Гамбург шаҳри мезбонлик қилаётган бокс бўйича жаҳон чемпионати ярим финал беллашувларига старт берилади. Тўлиқ таркиб билан мундиалга йўл олган терма жамоамиз боксчиларидан 6 нафари финал учун рингга чиқиш имкониятига эга.

49 кг:
21:15
Ҳасанбой Дўсматов (Ўзбекистон) - Юбержен Мартинес (Колумбия)

Вакилларимиз орасида энг енгил вазнда (49 кг) юртимиз шарафини ҳимоя қилаётган Ҳасанбой Дўсматов биринчи бўлиб рингга кўтарилади. Рақиб кўпчиликка таниш бўлган колумбиялик Юбержен Мартинес.

Бу боксчилари бир йил олдин тўрт йилликнинг энг нуфузли мусобақасига мезбонлик қилган Рио Олимпиадаси финалида тўқнаш келишган. Ўшанда Ҳасанбой яққол устунлик билан ғалаба қозонган эди.

Умид қиламизки, бу галги беллашувда ҳам вакилимиз рақибига реванш олиш имкониятини бермайди ва финал йўлланмасини қўлга киритади.

64 кг:
22:00
Иқболжон Холдоров (Ўзбекистон) – Фреюдис Рояс (АҚШ)

64 кг вазн тоифасида рақиблари ишончли тарзда мағлуб этиб келаётган Иқболжон Холдоров финал учун кечадиган жангда америкалик Фреюдис Роясни синовдан ўтказади. Албатта, ярим финалда кучсиз рақиб бўлмайди, аммо боксчимиз ишончли ҳаракат қилиб, олтин медаль учун курашни давом эттиради.

91 кг:
23:00
Санжар Турсунов (Ўзбекистон) – Евгений Тишенко (Россия)

Санжар Турсуновни жаҳон чемпионатининг кашфиётларидан бири дейиш мумкин. Бироқ уни финал остонасида ўта жиддий рақиб кутиб турибди. Рио Олимпиадасида ушбу вазнда ўзининг тенгсизлигини исботлай олган рус боксчиси осонликча таслим бўлмайди. Шундай бўлсада, ўта муросасиз ўтиши кутилаётган қарама-қаршиликда Санжарга омад тилаб қоламиз.

 

Фикрлар

Фикр қолдириш учун авторизациядан ўтинг!