Шомуродов машҳур клубнинг кутилмаган таклифини рад этди!
“Рома” ҳужумчиси Элдор Шомуродов олдида муҳим вазифа турибди. У келаси мавсумни қайси жамоада бошлаш масаласини ҳал қилиши керак.
Айни пайтда легионеримизнинг “Специя” билан ижара шартномаси якунланган ва у расман Рим клуби футболчиси ҳисобланади.
Жозе Моуриньо келаси мавсумда ўзбек ҳужумчисига асосий таркибдан жой бермайди. Уни захира ўйинчиси сифатида баҳоламоқда. Клуб спорт директори Тьягу Пинто эса, янги ижрочиларга жой очиш мақсадида, бир неча футболчилар, хусусан, Элдор Шомуродовни бошқа клубларга трансфер қилиш бўйича иш бошлаган.
Россиялик журналист Анар Ибрагимов тарқатган хабарга қараганда, Россиянинг энг машҳур клуби – “Спартак” мутасаддилари Элдор Шомуродов агентларига ўйинчини сўраб мурожаат қилган. Бироқ, Шомуродов учун айни пайтда Италия чемпионатида қолиш асосий мақсад бўлгани туфайли Россияга қайтиш варианти кўриб чиқилмайди.
Шомуродов А Серияга йўл олишдан аввал уч мавсум давомида Россия Премьер-лигасида “Ростов” жамоаси шарафини ҳимоя қилган. Ростовликлар таркибида Элдор жами 91 та учрашувда 18 та гол ва 12 та ассист муаллифи бўлди.
Москва клуби мутасаддилари Элдор Шомуродовнинг имкониятлари яхши билади. Легионеримиз 2019 йили “Ростов” ва “Спартак” ўртасида бўлган учрашувда москваликлар дарвозасини ишғол қилиб, жамоасига 2:1 ҳисобида ғалаба келтирган эди.
Умуман олганда, “Ростов”даги фаолияти давомида ўзбек ҳужумчисининг янги қирралари очилди ва у ўз ўйинлари орқали Европанинг кучли бешлик чемпионатларига кирувчи А Серия мутахассислари эътиборини ўзига тортди. Бундан ташқари, ўшанда Элдорга Франция, Испания ва Германия клубларидан ҳам қизиқиш бўлган эди.
Шомуродов Италия вариантини танлади ва 2020 йилнинг октябрида “Женоа” жамоасига жами 9 миллион еврога трансфер қилинди. Генуя клубида Элдорнинг ишлари юришиб кетди. Дебют мавсумида саккизта тўп киритган ўйинчини “Ювентус” ва “Рома” сўради.
Шомуродов Жозе Моуриньони шахсан танигани учун танлов “Рома” фойдасига ҳал бўлди. Римликлар ўзбек ҳужумчиси учун 18 миллион евро харажат қилди. Пойтахт жамоасидаги фаолият ҳам анча яхши бошланган эди. Элдор назорат учрашувларида кетма-кет гол урди. Илк расмий баҳсда ҳам “Трабзонспор” дарвозасини ишғол қилди.
Бироқ, кейинчалик “Рома”даги ишлари юришмай қолди. Бу ҳолат ҳозир ҳам давом этмоқда. Жозе Моуриньо бир ярим мавсум давомида Элдорга ўзини кўрсатиши учун етарли даражада имконият бермади. “Специя”даги ярим йиллик мавсум ҳам Шомуродовнинг фойдасига ишлагани йўқ.
Ҳозир, Элдор олдида яна иккита таклиф бор. Грециянинг ПАОК клуби ўзбек футболчисига қизиқиш билдирган. Шунингдек, Туркия чемпиони “Галатасарой” ҳам Рим клубидан Шомуродовни кейинчалик сотиб олиш ҳуқуқи билан ижарага беришни сўраяпти.
Ҳали ёзги трансферлар якунланишига анча вақт бор. Мутахассислар ҳали Элдорга бошқа клублардан ҳам таклиф бўлишини таъкидлаяпти.
Фикрлар