Шомуродов “Рома”га керак эмас. Элдор учун навбатдаги бекат – Германия гранди!
Ёзги трансфарлар мавсумида “Рома” таркибида жиддий ўзгаришлар бўлиши кутилмоқда. Жозе Моуриньо ҳозирги таркибдаги футболчиларнинг аксариятидан воз кечиб, Чемпионлар лигаси учун курашадиган жанговар жамоа шакллантиришни мақсад қилган.
Жозе Моуриньо даврида Рим клубига олиб келинган ўйинчилар орасида фақатгина тажрибали дарвозабон Руй Патрисио ва “Чедси” ҳужумчиси Тэмми Абрахам бош мураббий ишончни оқлади холос.
La Gazetta dello Sport нашрининг ёзишича, португалиялик мураббий келаси мавсум ҳозирги ўйинчилар орасидан фақатгина етти нафари билан ишлашга тайёрлигини билдирган. Афсуски, Жозе Моуриньо ўзи Римга таклиф қилган Элдор Шомуродов тегинилмас футболчилар рўйхатида йўқ.
.jpg?1648787383215)
Манбанинг маълум қилишича, Жозе Моуриньо жорий мавсум якунлангач, дарвозабон Руй Патрисио, ҳимоячилар Леонардо Спинаццола, Крис Смоллинг, ярим ҳимоячилар Генрих Мхитарян, Сержиу Оливейра, Лоренцо Пеллегрини ва ўзининг ишончини қозонган ягона ҳужумчи Тэмми Абрахамдан бошқа ҳар қандай футболчи билан хайрлашишга тайёрлигини маълум қилган.
Элдор Шомуродов анчадан бери асосий таркибга киритилмаётган ва кейинги пайтда хатто захирадан ҳам ўйинга туширилмаётган ҳолатлар кузатилаётгани боис мухлису мутахассисларнинг аксарияти ҳужумчимиз бошқа жамоага ўтса яхши бўларди, деган фикрни илгари сурмоқда.
Элдор Ўзбекистон миллий терма жамоаси сафида “Навруз кубоги-2022” ҳалқаро турнирида иккита учрашувда тўртта тўп киритиб, гол уриш қобилияти жойида эканини исботлаб қўйди. Ушбу баҳслардаги голлар ижроси кўп жиҳатдан ҳужумчимизнинг ижро маҳорати самараси сифатида кўрилмоқда.
Сўнгги маълумотларга қараганда, Элдор Шомуродовга кучли бешлик чемпионатларидан бири – Германия Бундеслигаси вакилларидан жиддий қизиқишлар бўлмоқда. Футболга ихтисослашган forzaroma.info сайти мухбири Роберт Молининг ёзишича, ўзбек футболчиси “Лейпциг” ва “Хоффенхайм” эътиборига тушди.
"Лейпциг" варианти ёқимлироқ кўринмоқда. Кейинги йилларда Бундеслиганинг гранд жамоалари қаторига қўшилиб олган бу клуб истеъдодларни кашф этиш, маҳоратли футболчиларни тайёрлаш бўйича ўз анъаналарини намойиш қилиб келмоқда. Эътибор билан қарасак, кейинги мавсумларда Европанинг бир неча етакчи клублари айнан "Лейпциг" жамоасида ўзини кўрсатаётган ўйинчиларни трансфер қилмоқда.
Таъкидлаш мумкинки, Элдор Шомуродов “Ростов” жамоасида ўйнаб юрган кезлари ҳам, унга Бундеслиганинг “Штутгарт”, “Байер”, “Шальке” каби клубларидан қизиқиш бўлгани ҳақида хабарлар тарқатилган эди.
Хўш, “Рома” Шомуродовни сотишга тайёрми?
Римликлар ўтган йили ёзда 7,5 миллион еврога баҳоланган Шомуродов учун 17,5 миллион евро сарфлаган эди. Албатта, ҳамюртимизнинг нархи кўтарилишига ўтган мавсумда “Женоа”да кўрсатган мазмунли ўйинлари сабаб бўлган. Дебют мавсумида у саккизта тўп киритиб, генуяликларнинг А Серияда қолишига катта ёрдам берганди.
.jpg?1648787409476)
Жозе Моуриньо қўл остида ҳам мавсумолди тайёргарлиги доирасидаги ўртоқлик учрашувлари ва дастлабки расмий баҳсда гол урган футболчимиз “Рома” Тэмми Абрахамни олганидан кейин захирага ўтказилди. Мураббийлар штаби Шомуродовга ҳам етарли ўйин амалиёти бериши керак эди.
Элдорнинг римликлар билан узоқ муддатли шартномаси борлигини инобатга олиб, немис клубларига ўзбек ҳужумчиси трансферини амалга ошириш осон бўлмайди. Аслида Моуриньо ҳам ўз захирасида ҳужум маркази, чап қанотда ўйнай оладиган, ҳимоячиларга кўп ёрдам берадиган, тезлиги, дриблинги жойида бўлган меҳнаткаш футболчи бўлишига қарши эмас.
Манабаларнинг таъкидлашича, Рим клуби раҳбарияти Шомуродовни трансфер қиладиган бўлса ҳам 15 миллион евродан камига қўйиб юбормайди.
Бундан ташқари, таҳлилчилар бугунги кунда Бундеслига тўпурарлар пойгасида иккинчи ўринда бораётган Патрик Шик тажрибасини кўп тилга олмоқда. Бу ҳужумчи худди Шомуродов каби “Рома”да ўзини кўрсата олмаган. Лекин Германия чемпионатига кўчиб ўтиб нималарга қодирлигини кўрсатиб қўйди. Ҳозир Патрик Шик қатор гранд клублар нишонида турибди.
Нима бўлган тақдирда ҳам Шомуродов кўпроқ ўйнаши тарафдоримиз. Ҳужумчимизнинг ўзи ҳам яқинда журналистларга берган интервьюсида шуни таъкидлаган. Демак, ёзда трансферлар бозорини синчковлик билан кузатиб борамиз.
Фикрлар