Fayzullaev raqib ustiga qo‘rqmay bostirib boradigan futbolchi!
Abbosbek Fayzullaev O‘zbekistonda 2023 yilning eng yaxshi futbolchisiga atalgan sovrinni qo‘lga kiritdi.
20 yoshli legionerimizning navbatdagi individual yutug‘i u faoliyat olib borayotgan Rossiya Premer-ligasida ham keng muhokama qilinmoqda.
Sports.uz portali rossiyalik futbol ekspertlarining Abbosbek Fayzullaevning ushbu muvaffaqiyatiga qanday munosabat bildirganini havola etadi.
Valeriy Gazzaev, TsSKAning sobiq bosh murabbiyi:
Fayzullaev yoshga nisbatan ancha etuk futbol namoyish qilmoqda. Uning o‘yinini tomosha qilish juda qiziq. Abbosbek tezkor, texnikasi zo‘r, futbol bo‘yicha yaxshi ta’lim olgan o‘yinchi. U eng yaxshi sifatlarini namoyish qilmoqda va O‘zbekistonda eng yaxshi futbolchi, deb e’tirof etilgani ham bejiz emas.
Biz uning qobiliyati borligini ko‘rib turibmiz, lekin Fayzullaev o‘z iqtidorini rivojlantirishdan to‘xtamasligi kerak. U maydonda katta ishtiyoq bilan o‘ynayapti. Bu TsSKA uchun juda zo‘r transfer bo‘ldi.
Vladimir Ponomaryov, TsSKA sobiq futbolchisi:
Rossiya Premer-ligasi o‘yinchilarining texnik darajasi past. Fayzullaev bundan mustasno. O‘zbek futbolchisi vaziyatlarni bir o‘zi hal qilishga qodir.
Afsuski, chempionatda individual jihatdan TsSKAdan Abbosbek Fayzullaev va “Dinamo”dan Konstantin Tyukavindan boshqa kimnidir ajratib ko‘rsatish qiyin..
Faqatgina Fayzullaev to‘p bilan yugura oladi va dribling qo‘llaydi. Buni boshqa hech uddalay olmaydi. Tyukavin esa, to‘pni bexato qabul qilib olishga usta.
Valeriy Masalitin, futbol eksperti:
Fayzullaev O‘zbekistonning eng yaxshi futbolchisi bo‘lishga munosib. To‘g‘risini aytsam uning terma jamoadagi o‘yinlarini kuzatganim yo‘q. Agar O‘zbekistonda uni eng zo‘ri, deb topishibdimi, demak, Abbosbek bu sovringa loyiq.
Bugungi kunda Fayzullaev TsSKAning eng yaxshi futbolchisi. “Armiyachilar” hujumida katta foyda keltiryapti.
Yuriy Syomin, “Lokomotiv” sobiq bosh murabbiyi:
Fayzullaev — iste’dodli futbolchi. Texnikasi kuchli. Hozirgi paytda raqibga qo‘rqmay bostirib boradigan, birga bir vaziyatda yoki bir necha raqibni aldab o‘tib ketadigan o‘yinchilar ko‘p emas. Bu qobiliyat juda qadrlanadi. Fayzullaev to‘pni va to‘p bilan ishlashni yaxshi ko‘rishi shunday ko‘rinib turibdi. Bu borada u Xvicha Kvaratsxeliyaga o‘xshaydi.
Fikrlar